2 कुरिन्थियों 12
12
पौलुसनी दिव्य दर्शन
1अपड़ि तारीफ कांनी मिंडै तेईनी जरूरी भौ गियोरी आ, हलाँकि ऐत मझ कोई फायदा ना, ऐठणीरै तेईनी आंउ प्रभुरी मर्जी ला दितौरा दिव्य दर्शना जां जै लुहाओरू आ, तेसैरी मूं चर्चा कांनी। 2आंउ मसीहरै तैन्हांं विश्वासिया मझां एकिरै बारै मझ जांणता, जै चोउधा साल पेहिलै सभनियांं उथड़ै स्वर्गा मझ लै न्यौरा थ्या। मूं ना पता, कि ऐ भूंणा पन बि सैक्या मैहणु शरीरा मझ थ्या या बिना शरीरै थ्या; पण परमेश्वरा अच्छै तरीकै सिंउ पता।
3फिरी, आंउ ऐ ना जांणता कि ऐतियु हकीकत मझ भौरू थियु या ऐ अक दर्शन थ्या ऐ सिर्फ परमेश्वर जांणता। 4ऐ मैहणु स्वर्गानि उठाई ग्या, जां ऐतेई गलै शुणि जै शुणांईयो नति; जां ऐतेई गलै जैन्हां केरै बारै मझ शुणाणैरी कोस मैहणुनी अनुमति ना। 5वास्तव मझ ऐतियै मैहणु पन घमण्ड कांना मिंडै तेईनी सही आ; जेनि ऐतिया दर्शन लधौरा, पण ऐपु पन अपड़ि कमजोरिया छडि करि, अपड़ै बारै मझ घमण्ड ना करैला। 6केईनी कि अगर आंउ घमण्ड कांना चाहूं ता, तांबि आंउ मूर्ख ना भूंणा, केईनी कि मूं सच बोलणु; पण आंउ अपांणा ऐतिया घमण्ड कांना किना रौकता, ताकि जै मैहणु मूं तकांतै जां मूं किना शुणतै, तेत किना बधि करि मूं किछ बि ना समझिया।
7पण मूं तैन्हांं अदभुत चीजा केरै बारै मझ घमण्ड ना कांना चेहिंथा, जै परमेश्वरै मूंनी लुहाओरी अत्ति। ऐठणीरै तेईनी मिंडै शरीरा मझ अक कंडा चुभाउरा। शैतानेरी तरफ सिंउ मूंनी अक दूत मांनेरै तेईनी दितौरा, ताकि आंउ घमण्डी ना भौ गंहूँ। 8ऐठणीरै तेईनी मीं त्रा बारी प्रभु सिंउ विनती की, कि ऐस परेशानि किना आंउ छुड़खी गहूँ। 9पण प्रभु मूंनी बौलु, “मिंडा अनुग्रह तिंडै तेईनी बड़ा; केईनी कि मिंडी सामर्थ कमजोरिया मझ प्रकट भूंती।” ऐठणीरै तेईनी आंउ अपड़ि कमजोरिया पन गर्व काता, ताकि मसीहरी सामर्थ मूं मझ बंणी रिय्हा। 10ऐठणीरै तेईनी आंउ मसीहरै तेईनी कमजोरिया, अपमाना मझ जां गरीबी मझ जां दुखा-मुसीबतिया मझ खुश रींहथा; केईनी कि जेख्णी आंउ कमजौर भूंता, ता मसीहरी ताकत मूं ताकतवर बंणा दींति।
कुरिन्थ कलीसियेरा मैहणुवां केरै तेईनी पौलुसेरी चिन्ता
11आंउ मूर्खा सैयि कंम काता, केईनी कि तुहैं ऐपुवै मूं किना ऐहीं कराउरू आ; तुहां मैहणुवां मिंडी तारीफ कांनी चेहिंथी थी, हलाँकि आंउ किछ बि ना, पण तुवाड़ा तैन्हांं खास चैला किना कुनि हिसाबै घट बि ना। 12जेख्णी आंउ तुहां सिंउ थ्या, ता मीं ऐ साबित कियु, कि आंउ अक खास चैला, केईनी कि मीं धीरज सिंउ तुहां मझ बड़ै चिन्ह जां अदभुत कंम जां सामर्थी बाऐ कंम क्यै। 13अक कंम जै मीं तुहां सेईतै ना केया, जै मीं होरनियां कलीसियै मझ केया; सैक्या ऐ आ, कि आंउ कदि पेईंसा केरै तेईनी तुहां पन बौझ ना बंणा। तुवाड़ु ऐहीं सौचणु गलत आ, कि मीं ऐहीं करि-करि तुहां सिंउ गलत क्यौरू आ।
14अबै आंउ त्रीं बारी तुहां किनि ऐईंणनी तियार आ जां मूं तुहां किना किछ ना मगणु; केईनी कि आंउ तुवाड़ा पेईंसा ना, पण तुहां चांहथा। केईनी कि बच्चा, मयि-बबेरै तेईनी पेईंसै ना किट्ठैनै चेहिंथै; पण मयि-बबा बच्चा केरै तेईनी पेईंसै किट्ठैनै चेहिंथै। 15मूं तुहांनि बड़ै खुश भौ-करि अपड़ु सभ-किछ दी दींणु जां तुवाड़ी मजत कांनेरै तेईनी अपड़ि जांन बि दी दींणी। आंउ तुहां सिंउ प्रेम काता, पण ऐहीं लगतु, कि तुवे मूं सिंउ जादा प्रेम ना कातै। 16तुवे सहमत अत्तै, कि आंउ तुवाड़ै तेईनी कोई बौझ ना थ्या; पण होरनियां लगतु आ, कि आंउ चालाक आ जां मीं तुहांनि पूरी तरह सिंउ धोखा दितौरा, जै कि अक झूठ आ। 17मीं तुहां किना पेईंसै लींणेरै तेईनी तीतुसा या कोसक्यै होरैरा इस्तेमाल ना क्यौरा। 18मीं तीतुसा सिंउ विनती करि-करि तैस सिंउ, सैक्या विश्वासी भाई भेईजा; पण तीतुसै तुहांनि कोई धोखा ना दितौरा, पण तीतुसै जां मीं अकै मकसद पूरा कांनेरै तेईनी सेईतै कंम क्यौरा।
19अबै तुवे क्या सौचतै अत्तै, कि बड़ै टैंमा किना असै तुहां किनि अपड़ा बचाव कातै अत्तै। मिंडै विश्वासी भाईयो, असै जै किछ मसीह मझ कातै अत्तै, ऐ तुहां विश्वासा मझ मजबूत कांनेरै तेईनी परमेश्वरा मझ बोलतै अत्तै। 20केईनी कि मूं डर आ, कि किहींक्यै ऐहीं ना भुईया, कि आंउ अईछी करि तुहां तेतिया ना तकाउ, जेतिया आंउ तुहां तकांणा चांहथा जां मूं बि जेतिया तुवे ना चांहथै, तेतिया तकाईया। मूं डर आ कि तुहां मझ झगड़ै, योकिया केरा दुख, गुस्सा, स्वार्थ, चुगली कांनी जां उल्टै-सिधै कंम भुईया। 21किहींक्यै ऐहीं ना भुईया, कि जेख्णी मूं वापस ऐईंणु, मिंडा परमेश्वर मूं लज्जित करिया। जां मूं बड़ा मैहणुवां केरै तेईनी दुख मनांणा पुईया, जैन्हैं पेहिलै पाप क्यै जां अपड़ै गंदै कंम, यौन सम्बंधी, शर्मनाक जेतिया कंमा केरै तेईनी पश्चाताप ना क्यौरा।
Currently Selected:
2 कुरिन्थियों 12: CDJNT
Highlight
Share
Compare
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
