1 कुरिन्थियों 6
6
योकिया केरै झगड़ै निपटांणै
1अगर तुहां मझ कोसक्यै मैहणुरा कोसक्यै विश्वासिरै खिलाफ झगड़ा भूंता, ता तुहां कोस बि अदालती ना गांहणु चेहिंथु। तुहां अपड़ि कलीसियै मझ होरनियां विश्वासिया सिंउ अपड़ा फैसला कांनेरै तेईनी बोलणु चेहिंथु, कि तुहां मझ केणु सही आ। 2हकीकत मझ तुहां पता, कि भविष्य मझ परमेश्वरैरा मैहणुवां ऐस संसारैरा मैहणुवां केरा न्याय कांना। ऐठणीरै तेईनी तुवे सही मझ ऐ फैसला कांनेरै काबिल अत्तै, कि तुहां मझ केणु तुवाड़ै छोटै-मोटै झगड़ै निपटाणां मझ सही आ। 3तुहां पता, कि भविष्य मझ असु दुष्ट दूता केरा न्याय कांना, ता हकीकत मझ असै ऐस जीवनेरी साधारण गला केरा न्याय करि सकतै।
4अगर ऐतियै मामलै सांमणै ऐईंतै ता तुहां तैन्हांं मैहणुवां किना तैन्हांं झगड़ा केरा फैसला ना करांणा चेहिंथा, जैन्हां कलीसियेरै मैहणु कोई आदर बाऐ ना समझतै। 5आंउ तुहां शर्मिन्दा कांनेरै तेईनी ऐहीं बोलता। क्या सच मझ तुहां मैहणुवां मझ अक बि समझदार मैहणु ना, जै विश्वासी भाईया केरा न्याय करि सकता? 6पण ऐहीं कांनेरै बदलै अक विश्वासी होरै विश्वासिरै खिलाफ मुकदमा दर्ज काता जां अविश्वासिया किना न्याय कांना दींतै।
7जेख्णी तुहां मझां कोई दोषेरै तेईनी योकिया अदालती मझ लै गहिया, ता तेनी मसीह जेतिया व्यवहार ना लुहा। तेसेरै तेईनी ऐहै छै भूंणु कि अगर कोई हौरा विश्वासी तुहां सिंउ अन्याय करिया जां धोखा दी-करि तुहां किना किछ लै लिया, ता तेसेरै खिलाफ अदालती मझ कोई मुकदमा मेईं करा। 8पण तुवे गलत कातै अत्तै जां धोखा दींतै अत्तै जां तुवे ऐहीं अपड़ै विश्वासी भाईया सिंउ कातै अत्तै।
9तुहां पता, कि अन्याय कांने बाऐ मैहणु परमेश्वरेरै राज्यरै वारिस ना भूंणै। कोई तुहांनि धोखा दी-करि तुहां ऐ सौचणा पन मजबूर ना करिया, कि तुवे बुरै कंम करि सकतै जां तांबि परमेश्वरैरा मैहणुवां मझ अक बंणी करि रेय्ही सकतै। ना वैश्यागामी, ना मूर्तिया केरी पूजा कांनार, ना होरनियां केरी जनानि सिंउ झुलणार, ना लीचड़, योकिया सिंउ गलत कंम कांने बाऐ मड़द। 10ना चौर, ना लालची, ना पियक्कड़, ना गाई दींणार, ना अन्याय कांनार परमेश्वरेरै राज्यरै वारिस भूंणै। 11तुहां मझियें किछ मैहणु ऐतियै थ्यै, पण तुवे प्रभु यीशु मसीहरू नाँईयें ला जां असेड़ै परमेश्वरेरै आत्माय ला तुवाड़ै पाप धौ दितोरै अत्तै जां तुवे तेनी अपड़ै तेईनी अलग क्यै जां तुवे धर्मी बंणाय।
शरीर जां आत्माय मझ परमेश्वरेरी महिमा
12तुहां मझियें किछ मैहणु ऐ बोलि सकतै, कि “मूंनी सभ-किछ कांनेरी छूट आ, केईनी कि आंउ अक विश्वासी आ” पण सभ-किछ फायदेरू ना। आंउ बोलि सकता, कि “मूंनी सभ-किछ कांनेरी छूट आ; केईनी कि आंउ अक विश्वासी आ” पण मूं कोस बि चीजेरै गुलामा ना बंणनु। 13तुहां मझियें किछ मैहणु बोलि सकतै कि रोटी असेड़ि शरीरेरै तेईनी जां शरीर रोटिया केरै तेईनी आ; ऐ सच आ कि भविष्य मझ परमेश्वरा असैड़ा शरीर जां रोटी दोईयो नष्ट करि दींणै। शरीर व्यभिचार कांनेरै तेईनी ना। असैड़ा शरीर प्रभुरै तेईनी आ जां असै तेसैरी सेवा कांनेरै तेईनी बंणोरै अत्तै।
14ऐठणीरै अलावा असैड़ा शरीर महत्वपूर्ण आ, केईनी कि जिहीं चारै परमेश्वरै प्रभु यीशु मसीह मुड़दा मझां जींतैनेरै तेईनी अपड़ि सामर्थिरा इस्तेमाल केईथ्या, तेनिऐ सामर्थी ला तैस असै बि जींतै कांने। 15तुवे जरूर जांणतै कि तुवाड़ा शरीर मसीहरा अंग आ? ता क्या आंउ मसीहरा अंग लै करि वेश्यारै अंगा सिंउ जौड़ुं ऐत्यु बिल्कुल ना भुईया!
16ता तुहां पता भूंणा चेहिंथा कि जै कौ बि वैश्या सिंउ जुड़ता, सैक्या वैश्याई सिंउ अक शरीर बंणी गांहथा। केईनी कि पवित्र शास्त्रा मझ लिखोरू आ “दोईयो अक शरीर भूंणै।” 17जां जै प्रभु मझ जुड़ी रींहथा, तेसैरी आत्मा जां प्रभुरी आत्मा अक भौ गांहथी। 18व्यभिचारा किना पूरी तराहि दूर बेशा! मैहणुरै जरियै क्यौरै होरै पाप सिधै तौर पन शरीरानि घाटा ना बातै ज्योता व्याभिचार काता। व्यभिचार कांने वा अपड़ै ऐ शरीरेरै खिलाफ पाप काता। 19तुहां पता कि तुवाड़ा शरीर मन्दिर आ, जैस मझ पवित्र आत्मा रींहथा; जां पवित्र आत्मा जै तुहांनि परमेश्वरेरी तरफ सिंउ मेऔरा, सै तुहां मझ बसौरा, जां अबै तुवे अपड़ै नत्तै, परमेश्वर तुवाड़ा मालिक आ। 20परमेश्वरै तुवाड़ै तेईनी अक मोटी कीमत चुकाई, जेख्णी तेनी यीशु मसीह बलिदान केया, ऐठणीरै तेईनी अपड़ै शरीरै ला परमेश्वरेरी महिमा करा।
Currently Selected:
1 कुरिन्थियों 6: CDJNT
Highlight
Copy
Compare
Share
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
