LOX KAB 1
1
Gumlox Pa Jah
1Gumlox pa kied raux lai lox kab pa tiiem Sawlamon#1Sim 4:32 kawn simex Davit simiang Isarelax ti deuh. 2Kieh tawng ka cuyi pingnya, ka pa rahsee mai tawng ka been lox sidiex gau pa rahsee. 3Kieh rieb ti teei ka ceu pa gau cuyi pingnya mai yuh pa rahsee mai prawng ca rahsee mai yuh ka daux pa rahsee heue. 4Kieh pui caox deeh lhak haing mai tawx grum naog krax tawng yung pingnya satix ka sinaw khankix heue. 5Mawh kheu pui pa koe cuyi pingnya khankix, nghiet mai tak sang ting lhaong ka cuyi pingnya heue. 6Pui pa mhawm dong keud khankix, chix tawng ka dee bleeh lox pa raux mox mai tak mawh sara pa ting pingnya heue.
Num Cuyi Pingnya
7Rhawm pa lhat graung ka Siyiex mawh num riah pingnya#Bax 28:28; Yaog 111:10; Kab 9:10heue. Pui pa caox yuh pa ang cee ang cag ka been lox pa gau mai ka pingnya khankix heue.
Lox Pa Tawx Riang Rao Satix
8Kawn simex aux eue, nghiet ka been lox sidiex gau keeing maix mai paw lai tik ka ceu pa sidiex gau miex maix awx. 9Lox ceu an khankix, mawh lawk kaing pa mhawm grang son kaing maix mai mawh min plakngai soi pa tauk ka ngawg maix heue. 10Kawn simex aux eue, phan pui caox nyaw glaw ka maix paw lai nghiet. 11Phan kix ah nin ka maix, hawt hu mai ex, ex kuan ti pah ju pui yum mai ex jawm ka kix pa ang koe phimap heue. 12Awm pa bleet meung yum ti ih ka pui pa laig ka daux simeeig khankix, ex kawx bleet ti ih ka pui pa im ju khankix heue. 13Phan ex yaox kraung khrai pa ngawh kuceu, ex tud rhim ti teei mai sau tom naog ka daux nyiex ex heue. 14Rom ti yuh paox pie tau mai ex mai ex gwieh kraung khrai pa pon ex sidu awm paox tix ah nan kawx, 15Kawn simex aux eue, paw lai hu tau mai kix, via khaing krax pa hu kix. 16Grawh grawng nawh, caong kix phai to ka daux phimap mai kix phai sonsang pah ju pui yum heue. 17Rub pa nah ti deuh sivoe ngai sim mai mawh pa giex going, ang lih ti mawh tidtix. 18Pui caox an khankix, pau mai hieh nham tokaux tix mai jawm ti pah ka ju tokaux tix heue. 19Pui pa sawg mau khri, kraung khrai ka daux krax pa ang rahsee khankix khawmuik, bwanson pa sawg kix an, chix kieh ju tokaux kix yum heue. 20Cuyi pingnya kok yo ka praix mai chix ploi lox tix lih ka daux krax khankix heue. 21Lox pa kok yo nawh, ka dee kum kawng ang ah, ka diang siviex veng ang ah, ka daux veng ang ah mai krai lox#Kab 8:1-3 ah nin, 22Pui caox khankix eue, pex moh ka pa caox caig, pui pa chix salao mai gaux rhawm ka daux pa salao mai pui pa caox khankix, chix koeng ka cuyi pingnya rheung miex grheung? 23Nghiet ka lox pa sidiex gau aux, deeh tieh loh tix, jhak heue, Aux prauk Khwan Aux lih piang pex mai pex tak tawng dee bleeh lox Aux pa raux mox heue. 24Aux kok ka pex, kheu thiang pex ti tik mai Aux daong taix tix ka pex mai pex ang kieh koe mu. 25Pex tik ka lox pa tawx Aux satix ka pex, mawh kheu ang pex rhawm nghiet ka lox pa sidiex Aux tix gum kawx. 26Yam yaox pex krax khi glawh Aux tak nyiah heue. Yam hoek pex krax pa lhat graung Aux nyiah maung pex heue. 27Yam yaox pex awm phlu bhaung keu kang lux mai yam yaox pex krax laux leeing, awm hoek bhaung caox piang pex mai yam yaox pex pa hot sibhawm mai pa kha rhawm, piang pex mai kix kok yo Aux kawx, Aux ang lai pawk. 28Viang kix coca tix sawg Aux kawx, ang lai yaox Aux. 29Grawh grawng nawh, kix koeng ka cuyi pingnya mai kix ang koe rhawm pa lhat graung kah. 30Kix ang nghiet ka lox pa tawx aux satix mai kix yuh ceu pa ang cee ang cag ka can ceu pa sidiex aux khawmuik heue. 31Mawh kheu nan, kix yaox ti ih plix phimap pa hoik yuh tix mai kix sak ka ceu pa keud kix heue. 32Pui pa ang koe pingnya, lud krax mai hoek krax som ju heue. Pui caox khankix, ang koe satix mai hoek krax laux leeing heue. 33Pui pa nghiet ka lox aux khankix, ang yaox krax lhat graung, yaox ti ot yiien yawg tix mhawm mhawm heue.
Currently Selected:
LOX KAB 1: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012