AWBADIX 1
1
Krax Ciyang Hoek Ka Haktiex Edom
1Riang susai pa plak jhi Siyiex, Awbadix yaox ah nin son grawng haktiex Edom heue.#Isa 34:5-17, 63:1-6; Ye 49:7-22; Yez 25:12-14, 35:1-15; Amo 1:11-12; Ma 1:2-5 Ex hoik mhong lox pa pao khaing Siyiex mai cao cau pa hoik dawg ploi hu ka daux sinax ceu pui khankix ah nin, “Yaog ti kaoh mai kieh ex yaog ti kaoh puing naing ka haktiex Edom heue. 2Jhak heue, Aux tak sang kieh maix mawh pa iak ka daux sinax ceu pui khankix maix tak sang kham krax pa nu nai pui tix ka daux krax pa kied ting heue. 3Maix pa ot ka daux doh rang khankix, pa yuh dee ot dee koe tix ka dee pa lhaong khankix eue, Maix ah nin ka daux rhawm tix, mawh pui mawx pa tak sang pon bluh aux lih ka piang tiex lie? Krax lhaong rhawm maix hoik deeh pie lhen ti ih maix heue. 4Viang maix yaog tokaux tix lhaong awm po klang krih kawx, viang maix hoik yuh mheem tix daux sinax simuing khankix kawx, Aux tak sang bluh maix lih khaing tan “Siyiex ah nan heue. 5“Phan pui briex pui lak khankix hoek ka dee ot maix tan phan con cam khankix hoek ka daux pon sawm maix tak sang kham krax briex kix tix been miex ding, mawh ang kix tak sang briex, tom hoik grum naog kix lie? Phan cao pa pieh plix siiet khankix hoek ka maix tan mawh ang kix tak sang prah plix siiet khankix deuk tiblah lie? 6Dee pa glip Esaw tak lai pon yaox yuh ka mawx? Kraung sinngao pa hoik mox nawh ti deuh khankix, tak lai chix pon hoe ti lih yuh ka mawx? 7Pui pa yuh paox pie maix khankix, pie lhen ti ih maix mai kix hu tawx maix tom hoek ka mee praix; pui pa yuh krax pa nhim tau mai maix khankix, tak sang pex ka maix heue. Pui pa ih priex preem tan mai maix khankix, tak taong ti deuh kie ka son maix, ka daux rhawm maix ang lai koe krax lhak krax lhiem ceeix kawx heue. 8Siyiex ah nin ka daux singaix an, mawh ang Aux tak sang yuh can pui pa koe pingnya khankix laux leeing khaing daux haktiex Edom mai can pui pa koe krax tawng khankix khaing ka piang gawng Esaw lie?” 9Veng Teman eue, pui pa kied ting riang rao maix khankix tak sang mawh pa koe krax lhat tom hoik kung tix, tom sidah uik pah ti tik pui ku kaux khaing ka piang gawng Esaw heue.
Edom Yuh Pa Ang Khaw Caw
10Mawh kheu kin krax pa yuh maix ka piang pux tix Yakop, krax kaig tua tak sang kheem ka piang maix mai maix tak sang mawh pa hoik tat ti tik leeing ju heue. 11Ka daux singaix yam cung maix ti ot ka praok plak an ka daux singaix yam hoik teei pui tang ceu khankix sinngao Yakop hu yam hoik laig pui tang ceu khankix ka daux siviex veng nawh mai yuh nieb ka son veng Yerusaliem maix kawx hoik mawh pa awm pui ankix heue. 12Maix tak ang caw ti jeung ngai tix jhak ka daux singaix yaox pux maix krax pa nu pa khawm heue. Maix tak ang caw ti koe krax gaux rhawm ka daux singaix koe krax pa laux leeing ceu pui Yudax mai maix tak ang caw ti sikah lox ting mu ka daux singaix koe kix krax laux rhawm heue. 13Maix tak ang caw ti laig peung ka daux siviex veng pui Aux khankix, ka daux singaix koe krax pa kha rhawm kix heue. Maix tak ang caw ti jeung ngai tix jhak, ka piang krax pa kham geu kix, ka daux singaix koe krax pa kha rhawm kix mai nyeu taix tix rhim ka kraung sinngao kix, ka daux singaix koe krax pa kha rhawm kix heue. 14Maix tak ang caw ti cung ka daux gah krax, sonsang tat ti tik ka pui pa glawd ti hoek khaing ka daux sinax kix mai maix tak ang caw ti tawx pui pa kawn deuk ka daux sinax kix ka pui koeng ka daux singaix koe kix krax pa kha rhawm heue. 15Grawh grawng nawh singaix pa sang ciyang Siyiex ka piang ceu pui khankix khawmuik mawh pa hoik dex, awm krax pa hoik yuh maix mai tak sang mawh pa deeh yuh tix ka piang maix heue. Krax pa sang deeh pawk ka maix, tak sang hoek ka piang kaing maix heue. 16Awm hoik nyaux pex ka piang gawng pa singax singeh Aux, awm an ceu pui khankix khawmuik tak sang nyaux heue. Kix tak sang nyaux mai jhak, kix tak sang mawh pa awm krax pa ang kix sax koe heue.
Pa Ghoik Ceu Pui Isarelax Ti Pex
17Pui pa glawd tak sang koe ka piang gawng Zion mai krax pa singax tak sang koe ka gawng an, nyiex ma ceu pui Yakop, tak sang pon ti cie haktiex prim cie kix heue. 18Nyiex ma ceu pui Yakop, tak sang mawh ngu, nyiex ma ceu pui Yosiep tak sang mawh rao ngu mai nyiex ma ceu pui Esaw, tak sang mawh nyhee, ngu tak sang gleeing ka kix mai proe ti tik kix, pui pa kawn deuk tak ang lai koe khaing ka daux nyiex ma Esaw tix kaux kawx heue. Siyiex hoik ah yuh nin heue. 19Can pui pa ot baoh plak seh, tak sang yaox ti cie gawng Esaw, can pui pa ot ka daux dee tiiem khankix tak sang pon ti cie haktiex Philitix heue. Kix tak sang pon ti cie tong Epharem khankix mai khawm tong Samarix khankix heue. Ceu pui Benyamin khankix, tak sang pon ti cie haktiex Gilat heue. 20Ceu pui Isarelax pa giex laung tix khankix pa ot ka daux haktiex ceu pui Khananix tak sang pon ti cie haktiex tom hoek dee singai ka veng Zariepat heue. Pui pa giex laung khaing daux veng Yerusaliem khankix pa ot ka daux haktiex Siepharat tak sang pon ti cie veng khankix pa koe ka daux haktiex plak seh heue. 21Khaix an cao pa taoh tak sang hoek ka gawng Zion, sonsang prawng ca ka gawng Esaw mai meung haktiex tak sang mawh cie Siyiex heue.
Currently Selected:
AWBADIX 1: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012