AMOT 9
9
Krax Laux Leeing Ceu Pui Isarelax
1Aux yaox ka cung Siyiex hawt khu dee tan mai nawh ah nin “Tawk rong kaing siviex laux, sonsang yung yiang siviex mai yuk yaig ankix rau ka piang kaing pui khawmuik heue. Aux tak sang pah pui pa kawn deuk khaing daux kix yum ka vaid khawmuik, ang lai koe pui pa pon to mai ang lai koe pui pa pon glawd ti luan tix kaux kawx heue. 2Viang kix kaong daux tom hoek ka daux meung yum kawx, taix Aux tak sang teei kix khaing tan, viang kix haok ka piang raoma kawx Aux tak deeh teei kix lih khaing tan heue. 3Viang kix mox tix ka piang choek gawng Kharamelax kawx, aux tak sang sawg kix mai teei kix lih khaing tan, viang kix mox tix ka greem rawm sigrit sigra khaing plak sivoe ngai aux kawx, Aux tak sang tawx gumlox tix ka siyawng mai kieh lawd kix khaing tan heue. 4Viang kix hu ka daux krax pa giex laung ka plak sivoe pui koeng kix kawx, Aux tak sang tawx gumlox tix ka vaid mai tak sang pah kix yum khaing tan heue. Aux tak sang jeung ngai tix jhak ka piang kix, sonsang tawx krax pa kha rhawm mai ang lai mawh son ceu pa mhawm heue.” 5Siyiex, pa mawh cao kru naing raoma hu teeh ka tiex mai tiex lih ti rawm mai can pui pa ot ka piang haktiex khankix khawmuik, tak sang koe krax khi glawh, an khawmuik, tak sang keeh ti haok awm rawm klawng Nilax mai awm puk pak rawm klawng meung Ejiptux heue. 6Kaw pa sum lawg ot tix khankix ka piang raoma mai pa hoik pang num riah daog raoma ka piang haktiex pa kok rawm sigrit sigra khankix mai see lih ka piang haktiex, ceu kaux nawh mawh Siyiex heue. 7Siyiex ah nin, “Ceu pui Isarelax khankix eue, mawh ang Aux jhak pex awm pui haktiex Ethiopiya khankix lie? Mawh ang Aux hoik teei ceu pui Isarelax khankix lih khaing daux meung Ejiptux mai khaing haktiex Kaptawrax mai pui Surix khankix lih khaing haktiex Kirax lie? 8Ngai Siyiex hoik jhak ka piang meung haktiex pa koe map grham mai tak sang laux yuh meung an kix khaing ka piang haktiex heue. Aux tak ang lai laux yuh nyiex ma Yakop pak lawg. Siyiex ah nan heue. 9“Grawh grawng nawh Aux tak sang tawx gumlox tix lih mai tak sang grheeng cub nyiex ma ceu pui Isarelax khankix khaing daux sinax ceu pui khankix khawmuik, awm grheeng nghox pa hoik grheeng tix ka daux grheeng mai ang tie cod ka piang tiex tix sok kawx heue. 10Pui pa koe phimap khankix khaing daux pui aux pa ah nin, “Krax kha rhawm tak ang pon krup ka yix mai ang pon ti sipub yix, kix tak yum ka lawm vaid heue.”
Pui Isarelax Deeh Yaog Ti Kaoh
11Ka daux singaix an Aux tak deeh cox sum nyiex gox Davit pa hoik grhup hoik goh mai deeh cox dee pa laux leeing khankix heue. Aux tak sang deeh yaog ti sum dee pa laux leeing nawh mai deeh sum nawh, awm pa koe ka daux singaix an dix heue. 12Pa kieh ceu pui Isarelax pon ti cie ceu pui Edom, pa kawn deuk khankix mai ceu pui tang ceu khawmuik, pa hoik kok ka ceu kaux Aux heue. Siyiex pa yuh ceu inkix pa ah yuh nin heue.#Cau 15:16-18 13“Singaix an khankix tak sang hoek, pa thai kaung tak sang krup bawg yam pa vawg nghox mai pa biiet rawm plix siiet tak sang krup bawg yam pa rhuat simie, gawng khankix tak sang jah lih rawm plix siiet pa tie mai ton tak sang rawm ti hu tau mai ankix heue. 14Aux tak sang deeh viex pui pa giex laung ceu pui Aux Isarelax khankix hoek, kix tak sang deeh cox sum veng pa laux leeing an mai deeh pang ti ot ka daux veng an kix, kix tak sang sum ti cie sipeem plix siiet mai nyaux rawm plix siiet pa kaoh khaing ankix heue. Kix tak sang baox deeh yuh sipeem mai ih plix khaox plix ox khaing daux ankix heue. 15Aux tak sum ti deuh kix ka daux haktiex cao kix mai kix tak ang lai mawh pa deeh reeig tix baox tix bawg khaix in, khaing daux haktiex pa hoik tawx Aux ka kix heue. “Siyiex pa mawh Siyiex maix ah nan heue.
Currently Selected:
AMOT 9: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012