ZAKHARIX 11
11
Laux Leeing Isarelax
1Gawng Lebanon eue, paoh daux siviex maix khankix, kieh ngu gleeing khaox piak van maix khankix heue. 2Khaox gix khankix eue, koe krax riag yo heue. Grawh grawng nawh, khaox piak van hoik goh mai khaox pa mhawm khankix hoik laux leeing heue. Khaox tiah Bashan khankix eue, koe krax riag yo heue. Grawh grawng nawh, nong raug tiag khaox hoik goh heue. 3Lox riag yo cao liang yung khankix koe baoh tan heue, Grawh grawng nawh, min plakngai kix hoik laux leeing heue. Lox brum sivai sangsi awn ju khankix koe baoh tan heue. Grawh grawng nawh, min pakngai rawm klawng Yawdan mawh pa hoik laux leeing heue.
Lox Jhai Cao Liang Yung
4Siyiex, pa mawh Siyiex aux ah nin “Liang cub phung yung khankix, son pa sang pah tix yum, 5pa mawh cao liag khankix pah ka kix mai keud tix mawh pa ang koe phimap, pui khankix pa coh ti cai kix, tak ah nin “Kieh krax pa yaogyaw bwanson koe ka Siyiex, kheu Nawh hoik kieh aux mag mi heue. Cao liang kix ang lai koe krax caux rhawm ka kix heue. 6Siyiex ah nin “Khaix in Aux tak ang lai koe krax caux rhawm ka can pui pa ot ka daux haktiex in heue. Aux tak sang ap ti tawx pui ku kaux ka daux tawm taix paox plawg kix mai ka daux tawm taix simiang kix heue. Kix tak sang puing ka haktiex in mai Aux tak ang lai deeh taoh ti teei kix lih khaing daux tawm taix kix heue. 7Mawh kheu nan, Aux hoik liang cub phung yung khankix, son pa sang pah tix yum, pa mawh cub phung yung pa blon kha rhawm tix heue. Aux hoik teei khaox grix tix ra gawng, tix gawng Aux hoik kok mawh bwanson pa mhawm grang mai an tix gawng Aux hoik kok mawh maox vien krax grum rhawm mai Aux hoik liang cub phung yung khankix heue. 8Aux hoik pluat ti tik cao liang yung khankix loe kaux, ka daux tix khix heue. Rhawm rhi Aux hoik meu ka kix mai rhawm rhi kix kawx, hoik seeing ka Aux heue. 9Khaix an, Aux ah nin Aux tak ang lai liang pex heue. Pa sang yum, kieh grham nawh yum mai pa sang grai kieh grham nawh grai heue. Can pa kawn deuk khankix grham kieh kix ra lai ih nex paox tix heue. 10Aux hoik teei khaox grix Aux pa kok mawh pa mhawm grang an mai hoik raig pot koe ra plak, mawh sonsang preet Aux ti tik gumlox sijax mukheu, pa hoik yuh tix tau mai pui khankix khawmuik heue. 11Mawh kheu hoik laux sijax mukheu an ka daux singaix an heue. Mawh kheu nan cub phung yung pa hot shia khankix, pa kawn een rhawm tix ka Aux, hoik tawng ka hoik mawh an gumlox Siyiex heue. 12Aux ah nin ka kix, “Phan mawh pa khaw rhawm ka son pex, tawx ngawh yuh aux kaing mai phan ang mawh pa khaw rhawm pex paw lai tawx heue. “Mawh kheu nan, kix hoik tawx mau tixngoe plah ka son ngawh kaing yuh aux heue. 13Siyiex krai ka aux ah nin, “Tik mau ngawh pa hoik tat kix pa kied nie an ka plak sivoe cao yuh aw heue. Mawh kheu nan, aux hoik teei mau tixngoe plah an mai hu tik ka daux nyiex bwan Siyiex, ka cao pa yuh aw heue.”#Mat 27:9-10 14Aux hoik baox raig pot ka khaox gix cie aux tang gawng an pa kok mawh maox vien koe ra plak, sonsang yieh Aux laux krax pa mawh tix puxaik ka daux sinax ceu pui Yudax mai ceu pui Isarelax khankix heue. 15Siyiex krai ka aux ah nin, “Maix baox teei kraung shiao cie cao liang yung pa pheem, 16“Aux tak sang yaog ti deuh cao liang yung tix kaux ka daux haktiex in heue. Nawh ang kia ngien son pa kham pa laux pa yum mai ang sawg ka pa prung prang mai ang lai pai pa hoik mat mai ang lai liang ka pa kawn brax viang mawh nan, nawh tak sang ih nex pa kluing mai riah ti tik gip kix heue. 17Kieh krax kha rhwm koe ka cao liang yung pa ang koe dee bleeh pa tik ka cub phung yung khankix! vaig lawm tak sang hoek ka piang plawng taix nawh mai ka ngai khawn dawm nawh heue. Plawng taix nawh tak sang fit ti kroh khawmuik mai ngai plak khawn dawm nawh tak sang faik khawmuik heue.
Currently Selected:
ZAKHARIX 11: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
