SAWLAMUN 8
8
1Aux simie maix awm prie lih tix, pa miex aux tawx nawh peuex rawm teeih tix, phan aux yaox maix ka plak praix, aux tak ngheet ka maix, pui mawx kawx ang pon tix ne raw ka aux heue. 2Aux tak sang thong maix mai viex maix laig ka daux nyiex miex aux, cao pa sidiex gau ka aux heue. Aux tak sang kieh maix nyaux rawm plix siiet pa hoik kuklao tix mai sidah mai rawm plix plix jiang cie aux heue.
Cub Kawn Bun Veng Yerusaliem
3Taix khawn gwiex nawh ot greem kaing aux mai taix khawn dawm nawh rawm ka aux heue. 4Kawn bun veng Yerusaliem khankix eue, aux tiextu ti deuh lox ka pex, paw lai so kaoh rhawm paox moh aux deeh siduad, paw kieh rhawm paox moh aux deeh siduat tom hoek bawg yam koe krax pa nyawm rhawm nawh heue.
Krax Moh Daux Lebanon
5In mawh pui mawx pa hoek khaing daux tiagtu, pa neung tix piang paox moh dud nawh lie? Aux so maix kaoh greem pang khaox plix kawk tie, miex maix hoik viex maix bleeh see dee an, see dee an, nawh pa hoik keh kung ka maix, hoik viex maix hoek heue.
Lox Ah Bun Shulamix
6Deuh tix priex aux awm cum ka piang rhawm maix, awm cum piang plawng taix maix, mawh kheu krax moh ting riang awm krax yum, krax boh rhawm lang teung caox awm meung yum heue. Taox nawh khankix awm taox ngu, pa kied blon hax taox heue. 7Rawm khankix ang pon preet ti tik krax moh, rawm hwan khankix ang pon kheem nawh heue. Phan pui tix kaux sang koe rhawm tix tawx son krax moh ka kraung khrai, sinngao nyiex ma nawh khankix khawmuik, tak mawh pa ang koe cee koe cak heue.
Prie Bun Shulamix
8Yix koe nan pa iak tix kaux mai nawh ang nyang koe teeih heue. Ex tak sang yuh patix ka son nan ex, ka daux singaix, yam hoek pui ti mhaing nawh lie? 9Phan nawh mawh guh veng tix mu, ex tak sang yuh nyiex choek mau piang nawh mai phan nawh mawh siviex tix mu, ex tak sang nyeep nawh ka khaox phia Arit heue.
Bun Shulamix
10Aux mawh guh veng tix mu mai teeih aux hoik awm nyiex tab lhaong, khaix an, aux hoik pon krax pa koe min plakngai ka daux ngai nawh, awm pui pa hoik yaox krax pa nhim heue. 11Simiang Sawlamon koe sipeem plix siiet tix dah ka daux haktiex Balahomon, nawh hoik vai tix tawx sipeem plix siiet an ka cao pau sipeem, pui ku kaux tak sang viex mau tix rheng plah hoek son plix an khankix heue.
Son Simiang Sawlamon
12Sipeem plix siiet cao aux koe ka plak sivoe aux heue. Simiang Sawlamon eue maix tak mawh pa pon mau tix rheng plah mai can pui ankix, pa priex rien ka plix nawh khankix, tak pon mau ra yieh plah heue.
Paox Moh Dud
13Maix pa ot ka daux sipeem an, paox grawm maix tak nghiet ka lox maix, kieh aux mhong lox an liak!
Bun Shulamix
14Paox moh dud aux eue, nied ti hoek phaiphai piang gawng pa koe sidah bhawng khankix, mai yuh ti awm kiah tix mu mai kawn cak mhaing iak tix mu heue.
Currently Selected:
SAWLAMUN 8: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
