ROMAX 15
15
Ang Lai Mawh Son Tokaux
1Ex pa mawh pa ting riang rao, khaw ti yeung ka ceu pa iak riang rao kix pa ang koe riang khankix mai ang khaw ti yuh ceu pa khaw rhawm tokaux tix heue. 2Kieh ex ku kaux daux pui yuh pa khaw caw rhawm paox plawg tix, ka son ceu pa mhawm, tom sang ting lhaong nawh kah heue. 3Grawh grawng nawh pie Cao Khrit kawx, ang lai yuh pa khaw caw rhawm tokaux tix heue. Viang mawh nan awm pa hoik tiiem ti deuh ah nin, “Lox pa salao kix mai pa salao ka Maix, hoik hoek piang Aux heue.”#Yaog 69:9
4Can pa hoik tiiem ti deuh glang ka in dix, mawh pa hoik tiiem sonsang gau ka ex, sonsang koe krax keud pot jun pot, kheu pa chix gun yeung mai pa nyawm rhawm kheu phuk lai sigang khri heue. 5Kieh Siyiex pa tawx krax chix gun yeung mai krax nyawm rhawm, kieh pex tix kaux lai tix kaux, koe rhawm tix mu khaing, awm pa khaw ka Yesux Khrit, 6son sang chix viex pex rhawm tix mu, jheeh tix mu, ti yaogyaw Siyiex mai Keeing, Simiang ex Yesux Khrit liak heue.
Lox Bwan Tah Hu Ka Pui Tang Ceu
7Mawh kheu nan pex tix kaux lai tix kaux rieb ti teei ka paox tix, awm Cao Khrit hoik rieb ti teei ka pex, sonsang koe min pakngai Siyiex kah heue. 8Grawh grawng nawh pa sang ah aux mawh nin, Cao Khrit hoik lih mawh pui cau soi ceu pui pa pat hak, sonsang sidawng pa mawh meh Siyiex, ka daux pa yuh ti kieh mawh, lox mukheu pa hoik tawx ka tax du ex khankix, 9mai yuh ka mawx pui tang ceu khankix tak sang yaogyaw ka Siyiex, son bwanson Nawh Cao awm pa hoik tiiem ti deuh ah nin, “Mawh kheu nan aux tak sang yaogyaw ka Maix, ka daux pui tang ceu khankix mai aux tak sang rhax lai yaogyaw ka ceu kaux Maix heue.”#2Sa 22:50; Yaog 18:49 10Nawh baox deeh ah nin, “Pui tang ceu khankix eue, pex gaux rhawm tau mai pui cie Nawh heue.”#Pi 32:43
11Baox deeh ah nin, “Pui tang ceu khawmuik eue, yaogyaw ka Siyiex heue. Kieh ceu pui khawmuik yaogyaw Nawh heue.”#Yaog 117:1 12Isayax baox deeh ah nin, “Tak sang koe riah Yessie mai Kaw pa sang kaoh ti giex kaing pui tang ceu tak sang koe krax keud pot jun pot ka Nawh heue.”#Isa 11:10 13Kieh Siyiex pa tawx krax keud pot jun pot, kieh pex naog ka krax gaux rhawm mai krax nhim khawmuik ka daux pa yum rhawm, son sang nie lheu ting krax keud pot jun pot pex ka daux sibrawm Khuan Singax Singeh heue.
Pawlux Mie Ti Fi Veng Romax
14Puxaik aux khankix eue, aux hoik yum rhawm grawng tokaux pex hoik naog ka pa mhawm mhiem mai naog ka krax tawng yung khawmuik mai chix ti sidiex ka paox tix, tix kaux lai tix kaux heue. 15Aux hoik nie lheu tiiem lox kwa ka pex, tix blawng mawh sonsang kieh pex doh keud, mawh kheu bwanson pa hoik tawx Siyiex ka aux, 16sonsang mawh aux pui cau soi Yesux Khrit ka pui tang ceu khankix, ti yuh kaing cao giex kaing li ka lox bwan gaux rhawm Siyiex, kheu sang tan pui tang ceu khankix ka Nawh Cao, sonsang mawh kix pa khaw caw rhawm Nawh, pa mawh pa hoik kieh Khuan Singax Singeh nawh singax singeh kah heue. 17Mawh kheu nan pa yaw rangdi aux mawh ka daux Yesux Khrit, ka daux ceu pa dex dawd mai Siyiex heue. 18Aux ring ti krai grawng tang ceu, phan lheu khaing grawng pa hoik yuh Cao Khrit ka daux aux, sonsang kieh pui tang ceu koe krax cu nghiet, kheu gumlox mai ceu pa yuh, 19ka daux sibrawm pa mawh mhai mai pa daox deng, ka daux sibrawm Khuan Singax Singeh heue. Mawh kheu nan jah ka veng Yerusaliem mai hawt sivie tan, tom hoek ka meung Ilirikam, aux hoik grum sidiex gau lox bwan gaux rhawm Cao Khrit heue. 20Aux koe rhawm ti sang sidiex gau lox bwan gaux rhawm ngie ka dee ang nyang bax tawng ka ceu kaux Cao Khrit, son ang aux lai caw ti sum piang jaong num pa hoik kaw pui tang kaux heue. 21Awm pa khaw mai pa hoik tiiem ti deuh ah nin, “Kix pa ang pui sax krai grawh grawng Nawh tak yaox mai kix pa ang sax mhong grawng Nawh tak sang tawng heue.”#Isa 52:15
22Mawh kheu nan, pa sang hoek aux ka pex, hoik koe pa sidien tom nie bawg heue.#Ro 1:13 23Viang mawh nan, yam in, mawh kheu ang lai baox koe dee sang sidiex ka daux meung in khankix mai kheu hoik dawg simie aux tix hoek ka pex tom nie num, 24yam sang hu aux ka meung Sapenix lai mawx ang ah, aux koe krax keud pot jun pot ti sang yaox pex yam hu aux krax mai ti sang kieh pex hu tawx aux tan, khaix hoik ot aux tau mai pex tom kub fah rhawm heue. 25Viang mawh nan yam in aux kawn sang hu ka veng Yerusaliem, ti sang viex krax teem hu ka pui pa singax singeh khankix heue. 26Grawh grawng nawh pui meung Makedonix mai pui meung Akhayax hoik viex khawm rhawm, gaux rhawm ti tawx pa tan, son pui singax singeh pa hot khankix, pa ot ka daux veng Yerusaliem heue.#1Kaw 16:1-4 27Mawh heue, kix hoik viex khawm rhawm, gaux rhawm ti tawx mai kix mawh pui pa koe ceuk, ka kix heue. Grawh grawng nawh phan hoik kieh pui tang ceu mawh pa rom ti pon ceu pa dex mai khuan tau mai pui Yudax, kix kawx khaw ti deeh tawx kraung ceu pa dex mai nex nham, sonsang teem sang yuh son kix heue.#1Kaw 9:11 28Mawh kheu nan khaix hoik yuh aux kaing in tom hoik sidah mai hoik tawx hoik pong totaix pa tan ka kix mhawm mhiem aux tak sang veh ka pex mai phlat hu ka meung Sapenix heue. 29Aux tawng yam hoek aux ka pex, aux tak sang hoek ka daux pa grum naog bwanson Cao Khrit heue. 30Puxaik khankix eue, aux khyox khaw ka pex ka daux Simiang ex Yesux Khrit mai kheu krax moh krax rhawm Khuan Cao, son sang nied pex ti coca tau mai aux, ka daux pa rawg pex bwan ka Siyiex son aux heue. 31Kheu sonsang pon luan aux khaing kix pa ang koe krax cu nghiet ka daux meung Yudax mai yuh ka mawx kaing teem pa sang hu yuh aux son veng Yerusaliem tak sang mawh pa khaw caw rhawm mai pa rieb ti teei pui singax singeh khankix, 32sonsang pon hoek aux ka pex ka daux krax gaux rhawm mai ka daux pa khaw mai alo Siyiex mai sonsang pon aux ti laux lee tau mai pex heue. 33Kieh Siyiex pa tawx krax nhim ot tau mai pex khawmuik liak. Amen.
Currently Selected:
ROMAX 15: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
