YAOGYAW 97
97
Siyiex Mawh Cao Pa Giex Kaing
1Siyiex mawh cao pa giex kaing mai kieh haktiex gaux rhawm. Klawn tiex pa koe ka daux rawm khankix gaux rhawm liak. 2Pai awm mai pa faik rob vung viang Nawh Cao mai krax pa prawng ca Nawh hawt beenli rahsee mai mawh jaong num dangngeung aux heue. 3Ngu hu sivoe ngai Nawh mai gleeing ka pui pa koeng ka Nawh khankix heue. 4Pukplak praix Nawh Cao, kieh haktiex riang heue. Haktiex yaox mai siyaung heue. 5Gawng lua khankix, hoik ceh awm rawm bee kax, ka plak sivoe ngai Siyiex Cao pa giex kaing haktiex khawmuik heue. 6Raoma plak jhi ka krax pa rahsee Nawh Cao mai ceu pui khawmuik yaox ka min plakngai Nawh Cao heue. 7Can pui pa krub riang grang mai pa yaw rangdi khankix, ang lai mawh tidtix mai hoek krax pa kaig tua heue. Siyiex khankix eue, krub ka Nawh Cao heue. 8Siyiex eue, veng Zion mhong mai gaux rhawm mai kawn bun Yudax khankix, gaux rhawm kheu krax prawng ca Maix heue. 9Siyiex eue, Maix mawh Cao pa ting lhaong khaing kawn pui haktiex khawmuik heue. Khaw ti nie lheu yaog Maix ting lhaong lheu khaing siyiex khawmuik heue. 10Pui pa moh ka Siyiex khankix eue, seeing brai ka ceu pa ang mhawm khankix mai Nawh tak teem ka ju pui pa moh ka Nawh mai taoh kix lih khaing daux tawm taix pui pa ang rahsee khankix heue. 11Pa riang mawh son pui pa rahsee, krax pa gaux rhawm mawh pa hoik rhuat son pui pa rahsee rhawm rhi heue. 12Pui pa rahsee khankix eue, gaux rhawm ka daux Siyiex mai yaogyaw ka ceu kaux Nawh pa singax heue.
Currently Selected:
YAOGYAW 97: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
