YAOGYAW 94
94
Siyiex Cao Pa Prawng Ca Piang Khawmuik
1Siyiex eue, Maix mawh Siyiex Cao pa prawng ca heue. ploi pa riang Maix liak. 2Cao pa prawng ca ka kawn pui piang haktiex eue, kaoh heue, deeh viied ti tawx ngawh phimap ka pui pa ting rhawm khankix liak. 3Siyiex eue, pui pa yuh pa ang rahsee khankix, kawn sang gaux rhawm miex grheung? 4Can pui pa nieb yuh khankix, kawn haoh lox sikah mai ah lox ting lhaong miex grheung? 5Siyiex eue, kix yuh laux ka pui Maix mai tuktiaktukte ka sin Maix heue. 6Kix teei ka miexmai yum mai plaux ka nyo sinie mai kawn doe pa ang koe miex keeing khankix yum heue. 7Kix ah nin, “Siyiex ang yaox mai Siyiex ceu Yakop ang lai deuh tix tawng heue.” 8Pui pa koe rhawm totiag khankix eue, nghiet ti tawng heue. Pui pa caox khankix eue, pex koe cuyi pingnya mai koe satix yam mawx? 9Siyiex Cao pa hoik yuh yhaok, khex ang Nawh mhong lie? Siyiex Cao pa hoik yuh ngai, khex ang Nawh yaox lie? 10Nawh mawh Cao pa gau ka pui kuceu mai Cao pa gau cuyi pingnya ka pui khankix, khex ang Nawh tawx phimap lie? 11Siyiex tawng, grawh grawng pa keud kawn pui mawh pa giex going heue.#1Kaw 3:20 12Siyiex eue, pui pa hoik gau Maix mai pa hoik gau Maix ka beenli khankix, koe bwanson heue. 13Maix tawx krax nyawm rhawm, kieh luan khaing singaix bawg yam krax pa kha rhawm, tom sidah kaong ti deuh daux tiex son pui pa ang rahsee khankix heue. 14Siyiex ang doh tik vud ka pui Nawh khankix mai ang Nawh tik vud ka sin Nawh khankix heue. 15Krax prawng ca Nawh mawh pa rahsee mai can pui pa koe rhawm pa rahsee khankix, tak hawt khaix Nawh heue. 16Pui mawx tak kaoh cung plak aux mai tiebtie ka pui pa caox khankix, pui mawx tak kaoh cung plak aux mai tiebtie ka pui pa ang rahsee khankix. 17Phan Siyiex ang teem aux, ang lai rheung ju aux tak rau hu ka dee yiien yawg heue. 18Yam ah aux nin, caong aux cang klad mai Siyiex eue, joh jhan aux ka krax pa caux rhawm Maix liak. 19Yam haoh rhawm keud aux, Maix kieh aux nyawm rhawm mai kieh ju aux gaux rhawm heue. 20Dang ngeung pa nieb yuh mai krax pa keud pa sawn pui pa ang rahsee, khex chix yuh paox pie ka pa khaw caw ka Maix lie? 21Kix khrawm paox tix sang pah ka pui rahsee khankix mai kix pah ka pui pa ang koe phimap tidtix heue. 22Viang mawh kawx nan, Siyiex mawh tab aux mai mawh rang ting dee deuh aux rhawm heue. 23Maix tak kieh phimap kix, deeh hoek ka piang kix mai kid ti tik ka pui pa nieb yuh khankix mai Siyiex ex tak sang kid ti tik mai yuh laux leeing heue.
Currently Selected:
YAOGYAW 94: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
