YAOGYAW 80
80
Lox Rawg Bwan Sonsang Deeh Cox Haktiex
1Cao liang yung Isarelax mai pa thong ka ceu pui Yosiep awm cub yung eue, veeh yhaok Maix nghiet liak, Cao pa ot ka piang Cherubin#Lih 25:22 eue, ploi pa riang Maix liak. 2Jhi sibrawm Maix ka sivoe ngai ceu pui Epharim, Binyamin, Manashe mai hoek tix taoh ka ex liak. 3Siyiex eue, kieh ex deeh tieh loh mai jhi pa riang pakngai Maix liak, phan yuh nan, ex tak sang hoek krax taoh heue. 4Siyiex Cao kru naing raoma eue, krax pa song rhawm song rhi Maix, kawn sang kieh koe ka piang pui Maix pa rawg bwan ka Maix rheung miex grheung? 5Maix tawx kix ih blah rawm ngai mai tawx kix nyaux rawm ngai tom sak tix heue. 6Kieh paox plawg ex khankix, thung thiang ka ex heue. Pui pa koeng ka ex khankix, ah lox map mai nyiah ka ex heue. 7Siyiex Cao kru naing raoma eue, kieh ex deeh tieh loh mai jhi pa riang pakngai Maix liak, phan yuh nan, ex tak sang hoek krax taoh heue. 8Maix hoik viex tix sum nhu plix siiet khaing meung Ejiptux mai grheu pui tang ceu khankix to heue. 9Maix hoik rien hoik cox dee ot nawh mai riah nawh khankix, hoik tah hu ku meung heue. 10Veei nawh hoik tah hoik kheem ka gawng khankix mai kak nawh khankix kawx, kheem veei ka piang khaox piakvan pa kied ting kied lhaong khankix heue. 11Nawh kieh kak nawh khankix, ting lhaong hu tom sidaing hoek ka rawm sigrit sigra mai nyoig rao nawh kawx, tah hu tom hoek ka rawm klawng ting, Upharat heue. 12Mawh kheu patix yam in, Maix lai yieh ti tik khaox vie nawh mai can pui pa hu krax dex nawh khankix, pieh tix ih plix nawh. 13Prieh keeh nhu nawh dud mai totiag pa caox hoik ih ka heue. 14Siyiex Cao kru naing raoma eue, ex khyox khaw ka Maix, deeh hoek ha tix bawg liak, ot piang meung raoma mai kia ngien ka ex liak. Hoek tix jhak ka nhu plix siiet khankix liak. 15Ka nhu pa hoik sum taix khawn dawm Maix ti deuh, priex kix, sonsang haok hwan mai kaux cong son Maix. 16Hoik gleeing ka ngu mai hoik kid ti tik heue. Mawh kheu pakngai Maix, pa sidiex kix hoik hoek krax pa laux leeing heue. 17Teei taix Maix deuh ka piang pui pa dex mai taix khawn dawm Maix mai kieh kawn pui grum ting riang ting rao son Maix liak. 18Phan yuh nan, ex ang lai deeh yawn plak khaix khaing Maix, kieh ex im ju liak, ex tak rawg bwan ka ceu kaux Maix heue. 19Siyiex Cao kru naing raoma eue, kieh ex deeh tieh deeh loh mai jhi pa riang pakngai Maix liak, phan yuh nan, ex tak hoek krax taoh heue.
Currently Selected:
YAOGYAW 80: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
