YAOGYAW 69
69
Lox Pa Kok Sonsang Teem
1Siyiex eue, taoh aux liak, grawh grawng nawh, rawm hoik hoek mee ngawg aux heue. 2Caong aux ang koe dee dig, hoik blawn daux glaox dee raux heue. Aux hoik hoek dee raux rawm mai pukpak rawm hoik kheem hoik lhop ka aux. 3Aux kied taug mao mai hoik si oh ghok ka kok yo tix Maix, ngai aux kawx hoik meu ka maong ti jhak Maix, pa mawh Siyiex aux heue. 4Pui pa nieb koeng ka aux, #Yaog 35:19; Yo 15:25 nie lheu khaing hauk kaing aux heue. Pui pa simie ti yuh aux laux khankix, nie lheu ting riang khaing aux, aux yaox ti deeh viied kraung pa ang aux teei heue. 5Siyiex eue, Maix hoik tawng mawh aux pui pa caox mai phimap aux ang pon ti mox sivoe ngai Maix heue. 6Siyiex Cao kru naing raoma eue, mawh kheu aux, paw kieh pui pa krox jun ka Maix hoek krax pa kaig tua liak. Siyiex ceu pui Isarelax eue, mawh kheu aux, paw kieh pui pa sawg ka Maix hoek krax lhat graung liak. 7Aux hoik yaox ti kham krax pa salao mai krax pa kaig tua hoik naog ka ngai aux kheu Maix heue. 8Aux hoik awm nyo ka daux puxaik aux mai awm pui tang praix sivoe ngai kawn nyiex kawn ma aux khankix heue. 9Krax khi rhawm pa dex mai nyiex Maix hoik bleet ka aux heue. Lox pa salao kix ka Maix hoik hoek ka piang aux heue. 10Yam yiiem aux khawm rhawm khawm rhi tix mai twah pa ih kawx, kix salao ka aux heue. 11Yam ceep aux kraung chee rhix, kix ah lox jiem lak law ka aux heue. 12Yam ngawm kix bang kum daux siviex lawng mai yoek ka plai mai ah lox rhax grawng aux heue. 13Siyiex eue, phan mawh aux, rawg bwan ka Maix, bawg yam pa khaw pa mhawm, Siyiex eue, awm pa grum naog krax caux rhawm Maix mai sijax mukheu Maix, deeh pawk lox aux mai taoh aux liak. 14Taoh aux lih khaing daux glaox mai paw kieh aux blawn liak, kieh aux luat luan khaing tawm taix pui pa koeng ka aux mai rawm pa raux liak. 15Paw kieh rawm huan kheem aux liak, paw kieh aux glip dee raux liak, paw kieh rawm kheem eet aux liak. 16Siyiex eue, mawh kheu bwanson pa mhawm pa yuh Maix mai nghiet lox aux liak, veeh ngai Maix ka aux, ka daux pa caux rhawm, krax moh krax rhawm Maix tom nie liak. 17Paw mox ngai Maix khaing aux pa mawh siliex Maix liak, krax pa khi rhawm hoik hoek ka piang aux, nghiet lox aux laung laung liak. 18Greed ti hoek dex ka ju aux mai taoh aux liak, mawh kheu kied haoh pui pa koeng ka aux, kieh aux luan khaing kix liak. 19Maix hoik tawng grawng pa yaox aux ti kham geu, ka pa salao mai pa kaig tua mai laux min plakngai mai pui pa koeng ka aux khankix, hoik sidawng sivoe ngai Maix heue. 20Mawh kheu lox pa salao, aux kied khi rhawm mai laux rhawm mai sawg pui pa sang caux rhawm ka aux ang koe tix kaux kawx mai aux sawg pui pa sang kieh aux nyawm rhawm kawx, ang yaox tix kaux kawx heue. 21Pie sang ih aux kawx, kix tawx aux ih sidah song, pie sang nyaux aux rawm kawx, kix tawx aux nyaux sidah niex heue.#Mat 27:48; Mak 15:36; Yo 19:28-29 22Kieh pheen sawm kix mawh kie pa hoik taong sivoe ngai kix, pa yuh kix kieh deeh hoek ka piang kix liak. 23Kieh ngai kix dug, son ang kix sang yaox mai kieh nyoi kix siyaung hu jheung jheung liak. 24Kieh krax song rhawm Maix Cao hieh ka piang kix mai kieh krax meet rhawm Maix hawt krup kix liak.#Ro 11:9-10 25Kieh dee ot kix yiien tom ang mhong lox tidtix, pie pa ot daux nyiex gox kix kawx, paw lai kieh koe ti kaux kawx. 26Grawh grawng nawh, kix tuktiaktukte ka pui pa sivied Maix mai kix baox lux ka pui pa hoik kieh Maix kix saux heue. 27Baox thie phimap ka piang phimap ka kix, paw kieh kix laig ka daux pa rahsee Maix. 28Maix preet ti tik ceu kaux kix ka daux carang pa im ju#Jhi 3:5, 13:8, 17:8 mai paw lai tiiem ti deuh ceu kaux kix tau mai pui pa rahsee. 29Phan mawh aux hot sibhawm mai kha rhawm tix heue. Siyiex eue, bwanson krax taoh Maix tak yaog aux ting lhaong heue. 30Aux rhax lai yaogyaw ka ceu kaux Siyiex mai plak jhi ka bwanson Nawh Cao heue. 31Pa yuh nan nie lheu khaw rhawm Siyiex, khaing mawie pa grum koe khawm rung khawm kloh heue. 32Pui pa awn rhawm awn rhi khankix yaox mai gaux rhawm gaux rhi heue. Pui pa sawg ka Siyiex khankix eue, kieh pex koe riang rao liak. 33Siyiex nghiet ka lox pui hot pui sibhawm mai Nawh ang nieb yuh ka pui Nawh, pa hoik giex hoik laung khankix heue, 34Kieh raoma haktiex rawm sigrit sigra mai kawn pui khawmuik yaogyaw ka Siyiex heue, 35Siyiex taoh ka veng Zion mai deeh cox veng Yudax, kix ot tan mai giex kaing heue. 36Ceu cad kawn praix siliex Nawh khankix, tak pon ti cie sin veng an mai pui pa moh ka ceu kaux Nawh Cao khankix yaox ti ot tan heue.
Currently Selected:
YAOGYAW 69: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
