YAOGYAW 50
50
Krub Ka Daux Pa Rahsee
1Siyiex Cao pa ting sibrawm, tawx lox ka haktiex plak lih singaix tom sidah plak klip singaix heue. 2Pa riang Siyiex, pa jhan riang pa grum ceu pa mhawm grang, lih ka piang gawng Zion heue. 3Siyiex ex hoik hoek mai Nawh Cao ang ot yiien yawg tix, ngu hax sivoe ngai Nawh Cao mai hawt dex sivie siveng Nawh, koe lhiex ting mai bhaung ting heue. 4Nawh Cao kok ka raoma mai haktiex, sonsang chawk cheng tix prawng ca ka pui Nawh khankix ah nin, 5“Kieh pui pa moh Aux mai pa hoik tan hoik lu pa hoik yuh sijax mukheu mai Aux, khrawm paox ti hoek ka Aux heue.” 6Raoma khankix, plak jhi grawng pa hoik yuh Nawh Cao pa rahsee, mawh kheu tokaux Siyiex mawh Cao pa prawng ca pa rahsee heue. 7Pui Aux khankix eue, nghiet awx, Aux tak sang krai heue, ceu pui Isarelax eue, Aux tak kham sakse plak pex heue. Aux mawh Siyiex pex heue. 8Aux ang deuh phimap ka pex, grawng pa gleeing pex tix tan mai pa tan lu pex kuceu, hoik koe sivoe ngai Aux jheung jheung heue. 9Aux ang mhaing ti cie mawie daux nyiex maix mai pex mhaing pa koe daux kawg maix. 10Totiag mai totiag, kaing rheng mai pa ot ka piang gawng khankix mawh cie Aux khawmuik heue. 11Aux tawng sim pa ot ka piang gawng khankix khawmuik mai totiag khankix, ot mai Aux heue. 12Phan Aux cai rhawm Aux ang krai ka maix, haktiex mai can pa koe ka haktiex mawh cie Aux heue. 13Khex tak sang ih Aux nex mawie lie? Khex tak sang nyaux Aux nham pex lie? 14Tan lu ceu pa yaogyaw bwanson ka Siyiex awx. Tawx ceu pa tan lu maix ka Siyiex Cao pa ting lhaong awm pa hoik deuh maix sijax mukheu awx. 15Yam hoek krax khi rhawm kok yo ka Aux mai Aux tak taoh maix heue. Maix tak yaogyaw ka min plakngai Aux heue. 16Siyiex ah nin ka pui pa ang rahsee khankix maix chix krai ka lox lai beenli Aux mai sijax mukheu Aux, dex dawd mai maix yuh ka mawx? 17Maix koeng ka lox pa sidiex gau Aux mai tik lox Aux plak khaix tix ang mawh lie? 18Yam yaox maix pui pa briex, rhawm maix awm nawh mai maix chix yuh paox pie ka pui pa phit vao ka moeng kawn pui heue. 19Jheeh maix chix ah lox pa caox caig mai dak maix chix ah lox pie lhen heue. 20Maix ngawm mai krai lox pa lah cha ka puxaik tix mai salao ka kawn pa keh miex maix heue. 21Aux glaik tix ka ceu pa yuh maix kawx maix ce Aux mawh awm maix nhieh, mai phimap pa yuh maix, Aux tak sang plak jhi maix yaox sivoe ngai maix heue. 22Pui pa pi awm ka Siyiex khankix eue, doh keud ka grawng inkix awx. Phan ang mawh nan, nu ka ang Cao taoh pex koe, Aux tak rud ti tik pex, baux mawx baux an heue. 23Pui pa tan lu mai pa yaogyaw ka bwanson Aux mawh pui pa kieh min plakngai Aux sidawng heue. Daux krax pa keud pa hu nawh kawx, Aux tak plak jhi bwanson Siyiex Cao pa taoh heue.
Currently Selected:
YAOGYAW 50: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
