YAOGYAW 38
38
Lox Rawg Bwan Pui Kha Rhawm
1Siyiex eue, viang Maix song rhawm kawx, paw lai deuh phimap ka aux liak. Paw lai sivied ti gau aux ka pa kied song rhawm Maix liak. 2Te Maix hoik laig ka aux mai taix Maix hoik yeen ka aux. 3Mawh kheu lih krax pa song rhawm Maix, nex aux ang koe krax nyawm ot, mawh kheu phimap aux, ang koe krax brax krax moi. 4Phimap pa yuh aux hoek ka piang kaing aux, awm kraung pa cien pa ang aux lai pex ti klawm heue. 5Mawh kheu mawh aux pui pa seeing brai mai pon jhawm saux pa brai pa cux heue. 6Aux kied yaox ti kham geu dee tiiem mai ceep kraung caox mai lailing tix leeing lang singaix heue. 7Nyoi aux pon jhawm saux si aoh hax mai nex aux ang koe dee nyawm ot. 8Rhawm aux bih mai siyaung tix mai riag yo heue. 9Siyiex eue, can pa lo aux khawmuik hoik koe sivoe ngai Maix, lox pa ngia aux kawx, kieh Maix tawng heue. 10Rhawm aux siyaung mai riang rao aux kawx, hoik grai khaing aux heue. 11Mawh kheu saux ngia aux, paox meed aux mai paox grawm aux khankix cung dee singai mai puxaik aux khankix kawx, via ti tik aux heue. 12Pui pa sawg ka ju aux khankix, taong kie ka aux heue. Pui pa sawg ti yuh pa caox caig ka aux khankix kawx krai lox pa ang khaw mai nieb keud ti yuh pa caox leeing lang singaix heue. 13Phan mawh aux yuh tix ang mhong awm pui pa lheet yhaok mai yuh tix ang chix sikah awm pui aw heue. 14Aux awm pui pa ang chix mhong mai awm pui pa ang chix pawk lox sikah heue. 15Grawh grawng nawh, Siyiex eue, aux deuh rhawm ka Maix pa mawh Siyiex aux, deeh pawk ka lox aux liak. 16Phan ang mawh nan, ha kix kox gaux rhawm ka piang aux, yam cang klad aux, pui pa ot tang plak khankix, 17ha kix kox yaw tokaux ti ah nin, yam dex goh aux mai yam saux ngia aux doh deud ka heue. 18Aux krai doh ka phimap tix, aux khi rhawm kheu hoik yuh aux phimap heue. 19Pui pa koeng ka aux khankix, kix nyawm ot mai ting riang mai pui pa koeng ka aux ka daux pa ang mawh meh kawx, kied haoh hun heue. 20Mawh kheu yuh aux pa mhawm mai ceu pa rahsee kix deeh tawx pa caox ka pa yuh aux pa mhawm heue. 21Siyiex eue, paw lai tik vud aux liak, Siyiex eue, paw lai ot singai khaing aux liak. 22Siyiex Cao pa taoh ka aux eue, nied Maix lih teem ka aux liak.
Currently Selected:
YAOGYAW 38: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
