YAOGYAW 25
25
Lox Rawg Bwan Sonsang Priex
1Siyiex eue, aux tawx ju tix ka Maix heue. 2Siyiex aux eue, aux deuh rhawm ka Maix, paw kieh aux hoek krax kaig tua mai paw kieh pui pa koeng ka aux, pex ka aux liak. 3Pui pa keud pot jun pot ka Maix tete khankix, tak ang hoek krax kaig tua mai pui pa nieb yuh pa ang tie koe grawng khankix, tak hoek krax kaig tua heue. 4Siyiex eue, jhi aux yaox daux krax Maix liak mai gau aux ka daux krax Maix liak. 5Thong aux hu ka daux krax pa mawh meh Maix mai thong gau aux liak, grawh grawng nawh, Maix mawh Siyiex Cao pa taoh aux mai aux krox jun ka Maix leeing singaix heue. 6Siyiex eue, doh keud ka krax pa caux rhawm Maix mai krax moh krax rhawm pa hoik dawg koe Maix didix. 7Paw lai doh keud ka phimap pa yuh aux, yam kawn mawh aux kawn nyawm, awm krax pa caux rhawm Maix mai doh keud ka aux, mawh kheu mawh Maix, Cao pa jiet mhawm heue. 8Siyiex mawh pa grum naog pa mhawm mhiem mai pa rahsee heue, mawh kheu in Nawh jhi daux krax ka pui pa koe phimap heue. 9Nawh thong ka pui pa awn rhawm hu ka daux krax pa khaw caw Nawh mai thong gau kix ka daux krax Nawh. 10Can pui pa hawt ka daux krax beenli Nawh mai pui pa hawt ti yuh ka sijax mukheu Nawh khankix, Nawh Cao tak sang thong kix hu ka daux krax moh krax rhawm Nawh heue. 11Siyiex eue, ka daux ceu kaux Maix, pluat ploi phimap aux pa kied ting liak. 12Pui pa lhat graung ka Siyiex, Nawh Cao jhi nawh yaox daux krax pa simie ti hu awm pa moh nawh heue. 13Daux rhawm nawh yaox ti ot nhim mhawm mhawm mai ru nawh kawx, tak pon sin ka daux meung Nawh heue. 14Siyiex yuh paox pie ka pui pa lhat graung ka Nawh khankix mai kieh kix tawng ka sijax mukheu Nawh heue. 15Ngai aux jhak ka Siyiex jheung jheung, grawh grawng nawh, Nawh Cao hoik taoh caong aux lih khaing kie heue. 16Veeh ngai Maix plak aux mai caux rhawm ka aux liak, deuk aux tix kaux khaing, kheu pa hot sibhawm heue. 17Rhawm aux hoik naog ka krax pa khi rhawm mai kieh aux luan khaing ka daux pa kha rhawm liak. 18Keud ka pa hot pa sibhawm aux mai krax pa khi rhawm aux mai pluat ploi phimap aux khawmuik liak. 19Jhak ka pui pa koeng ka aux khankix, mawh kheu kied haoh hun pui pa koeng riang cieang khoi ka aux heue. 20Priex ka ju aux mai taoh aux liak, kheu aux deuh rhawm ka Maix, paw kieh aux hoek krax kaig tua liak. 21Mawh kheu hoik krox jun aux ka Maix, kieh pa rahsee Maix priex aux liak. 22Siyiex eue, taoh pui Isarelax lih khaing ka daux pa kha rhawm khaw muik liak.
Currently Selected:
YAOGYAW 25: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
