YAOGYAW 135
135
Lox Rhax Pa Yaogyaw
1Yaogyaw ka ceu kaux Siyiex heue. Siliex Siyiex khankix eue, yaogyaw ka Nawh heue. 2Pex pa cung ka daux nyiex Siyiex khankix mai pa pau ka jaong num nyiex Siyiex ex khankix eue, yaogyaw heue. 3Mawh kheu Siyiex mawh pa jiet mhawm mai yaogyaw ka Siyiex heue. Rhax lai yaogyaw ka ceu kaux Nawh heue. Pa yuh nan mawh pa mhawm grang heue. 4Grawh grawng nawh, Simiang hoik laug ti teei ka ceu Yakop son Nawh mai ceu pui Isarelax mawh kraung cie Nawh heue. 5Aux tawng grawng Siyiex ex mawh Cao pa ting khaing siyiex khawmuik heue. 6Siyiex an, awm pa simie Nawh, Nawh Cao hoik yuh raoma mai haktiex mai rawm sigrit sigra pa raux pa mox kudah kudee heue. 7Nawh Cao kieh bhawm rawm haok ka dee sidah haktiex heue. Nawh Cao yuh pukplak praix pa viex lhiex mai Nawh Cao teei bhaung lih khaing daux teug kraung Nawh heue. 8Nawh Cao plaux kawn Ai ka daux meung Ejiptux, jah ka pui tom hoek ka to brie heue. 9Meung Ejiptux eue, Nawh ploi sakse grawng ceu pa daox am khankix, hoek ka maix, jah ka Pharaw mai siliex nawh mai pui nawh khawmuik heue. 10Nawh Cao yuh ka ceu pui tom nie laux leeing mai simiang pa ting min pa mawh, 11Sihon simiang meung Amawrix mai Awgax simiang meung Bashan khankix yum mai yuh ka meung Khanan laux leeing khawmuik heue. 12Teei ti tawx haktiex an, mawh dee ot kix pa mawh sin pui Nawh Isarelax khankix heue. 13Siyiex eue, ceu kaux Maix kaux cong jheung jheung mai Siyiex eue, ceu kaux Maix mawh pa doh keud ka ku ju leeing ju heue. 14Siyiex prawng ca ka plak pui cie Nawh khankix mai doh keud ka son siliex Nawh khankix heue. 15Riang grang pa krub pui tang ceu khankix, mawh mau, mawh khri heue. Mawh kraung pa yuh pui ka taix tix heue. 16Koe jheeh kawx, ang chix sikah, kix koe ngai kawx, ang chix yaox, 17mai kix koe yhaok kawx, ang chix mhong, ka daux jheeh kix ang koe ju toek bhawm lih, bhawm laig heue. 18Cao yuh khawm cao pa deuh rhawm kah kix hoik awm paox tix heue.#Yaog 115:4-8; Jhi 9:20 19Ceu pui Isarelax eue, yaogyaw ka Siyiex heue. Ceu pui Arun eue, yaogyaw ka Siyiex heue. 20Ceu pui Lewix eue, yaogyaw ka Siyiex heue. Pex pa lhat graung ka Siyiex khankix eue, yaogyaw ka Siyiex heue. 21Kieh koe bwanson ka Siyiex pa ot ka daux veng Yerusaliem mai ka piang gawng Zion liak. Haleluya!
Currently Selected:
YAOGYAW 135: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
