YAOGYAW 115
115
Siyiex Koe tix Kaux Khaing
1Siyiex eue, ex ang koe min plakngai, ex ang koe min plakngai, ka daux ceu kaux Maix, krax caux rhawm mai sijax mukheu Maix, kieh koe min plakngai liak. 2Mawh kheu patix pui tang ceu khankix ah nin, “Siyiex kix koe dee mawx?” 3Siyiex ex ot ka piang meung raoma mai Nawh Cao yuh awm pa koe alo Nawh heue. 4Riang pa krub kix mawh pa yuh pui ka mau, ka khri khankix mai mawh ngie pa yuh kawn pui ka taix tix heue. 5Riang pa krub kix an, koe jheeh ang chix sikah, koe ngai ang chix yaox. 6Koe yhaok ang chix mhong, koe meeh ang chix ngheet, 7koe taix ang chix giex, koe caong ang chix hu mai ghok kix ang chix lih lox. 8Cao pa yuh khankix kawx, awm an heue. Can pui pa deuh rhawm ka an khankix kawx, awm an heue.#Yaog 135:15-18; Jhi 9:20 9Ceu pui Isarelax khankix eue, deuh rhawm ka Siyiex heue. Nawh Cao mawh Cao pa teem ka pui Isarelax mai Cao pa tiebtie ka pex heue. 10Doeh ru Arun eue, deuh rhawm ka Siyiex heue. Nawh Cao mawh Cao pa teem ka ru Arun mai Cao pa tiebtie ka pex heue. 11Can pui pa lhat graung ka Siyiex khankix eue, deuh rhawm ka Siyiex heue. Nawh Cao mawh Cao pa teem mai mawh Cao pa tiebtie ka pex heue. 12Siyiex doh keud ka ex mai nawb bwanson ka ex heue. Nawh Cao nawb bwanson ka ceu pui Isarelax mai nawb bwanson ka ru Arun heue. 13Can pui pa lhat graung ka Siyiex khankix, Nawh Cao nawb bwanson ka kix, khawm pa iak pa ting heue.#Jhi 11:18, 19:5 14Kieh Siyiex, kieh pex mai kawn praix pex, pre haoh hun liak. 15Pex mawh pui pa nawb Siyiex Cao pa phan pa yuh raoma mai haktiex bwanson ka heue. 16Raoma mawh, raoma cie Siyiex heue. Haktiex mawh pa hoik tawx Nawh ka kawn pui heue. 17Pui pa hoik yum mai pui pa hoik lih hu ka dee yiien yawg khankix, ang chix deeh yaogyaw ka Siyiex. 18Phan mawh ex, yaogyaw ka Siyiex, jah tom yam in hoek tom leeing ju heue. Haleluya!
Currently Selected:
YAOGYAW 115: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
