YAOGYAW 102
102
Lox Rawg Bwan Pui Khi Rhawm
1Siyiex eue, nghiet ka lox pa rawg aux bwan mai lox pa kok yo aux kieh hoek ka Maix liak. 2Paw lai mox ngai Maix khaing aux, ngaix yam yaox aux krax pa khi rhawm mai yam kok yo aux ka Maix, nghiet lox aux mai nied tix pawk ka lox aux liak. 3Grawh grawng nawh, singaix bawg yam aux uik hu, awm taox ngu mai si-ang aux uik hax awm gaox ngu heue. 4Rhawm aux hoik sang hoik mat, awm rib riem pa hoik fit hoik kroh mai hoik pi awm ti sawm rheep heue. 5Mawh kheu lox pa ngia pa riag aux, aux hoik krawx, deuk ngie si-ang heue. 6Aux hoik awm sim “vampo” pa ot ka daux tiagtu mai awm sim pang plawh, pa ot ka gwang yaong prim pa hoik laux heue. 7Aux pau nong nong, awm sim pa ot ka piang braux nyiex tix mu khaing heue. 8Pui pa koeng ka aux khankix, salao ka aux, leeing lang singaix heue. Can pui pa ot tang plak khankix, ah pa ang cee ang cag mai map ka aux mai jhax lawg ka aux heue. 9Aux yaox ti ih nyaox, awm ih blah mai yam nyaux aux, yaox tix nyaux mai rawm ngai, kheu ang Maix fah rhawm ka aux mai Maix song rhawm ka aux heue. 10Maix hoik yaog aux ting lhaong mai deeh tik vud ka aux heue. 11Singaix bawg yam aux, awm veei peue pa lang mai aux hoik fit hoik kroh hu, awm rib riem heue. 12Siyiex eue, Maix mawh Siyiex leeing ju mai doh keud ka ceu kaux Maix ku ju leeing ju heue. 13Maix kaoh mai caux rhawm ka veng Zion heue. Bawg yam pa caux rhawm ka nawh mai bawg yam pa hoik ciak Maix ti deuh hoik hoek heue. 14Siliex Maix khankix, moh ka simaox Nawh khankix mai caux rhawm ka phawng tiex Nawh khankix heue. 15Pui tang ceu khankix tak lhat graung ka ceu kaux Siyiex mai simiang haktiex khankix khawmuik, tak lhat graung ka min plakngai Maix heue. 16Grawh grawng nawh, Siyiex, yuh veng Zion mai viex min plakngai Nawh sidawng heue. 17Nawh Cao deuh ti tawng lox pa rawg kix bwan, pui pa ang koe dee peung pan khankix, Nawh ang nieb nunai ka pa rawg kix bwan heue. 18Grawh grawng nawh, Nawh hoik tiem ti deuh son pui pa tak sang mawh phao khaix mai pui pa hoik phan hoik yuh Nawh khankix, tak sang yaogyaw ka Siyiex heue. 19Siyiex ot dee lhaong, ka dee singax singeh mai num ti jhak khaing raoma mai yaox ka haktiex heue. 20Kieh nghiet ka lox pa riag pui pa ot ka daux thawng mai ploi lih ka pui pa hoik bak kix ti pah yum. 21Kieh kawn pui khankix, teei ka ceu kaux Siyiex mai plak jhi sidawng ka piang gawng Zion mai yaogyaw ka bwanson Nawh Cao mai plak jhi sidawng ka daux veng Yerusaliem heue. 22Yam ceu pui kuceu ku ru mai pui ku meung kudah, kraix khrawm pui tix mai krub ka Siyiex heue. 23Nawh Cao kieh riang rao aux dieh hu, ka daux krax pa hu aux mai kieh singaix bawg yam aux dawd hu heue. 24Siyiex aux eue, aux krai yuh nin, paw nyang teei ju aux lih, yam kawn awn ju aux liak. Jhong khix mee num Maix kaux cong ku ju leeing ju heue. 25Simiang aux eue, ka daux yam jah, Maix hoik kaw num haktiex heue. raoma kawx, mawh khaix taix Maix heue. 26Ceu an khankix tak sang laux leeing, viang mawh nan, Maix kawn ca kaux koe heue. Ceu an khankix tak sang prim hu awm kraung ceep mai Maix tak sang pua ka ceu an khankix, awm man vhua mai tak sang dee thai loh ceu an khankix awm kraung ceep heue. 27Viang mawh nan, Maix ca awm paox tix mai jhong khix mee num Maix, ang chix uik chix sidah heue.#He 1:10-12 28Maix ot mai kawn praix siliex Maix khankix mai ru kix kawx, tak kaux cong sivoe ngai Maix heue.
Currently Selected:
YAOGYAW 102: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
