LOX KAB 27
27
1Paw lai deuh ti ting rhawm rhawm son pasax, grawh grawng nawh, ka daux tix singaix khaing tak sang lih mawh yuh ka mawx maix ang chix tawng?#Yak 4:13-16 2Paw lai yaw ka tokaux tix, kieh pui tang kaux yaw maix, jheeh maix paw lai yaw tokaux tix, kieh pui pa ang dex dawd mai: maix yaogyaw maix. 3Simaox mai mhaik mawh pa cien heue. Pa song rhawm pui caox nie lheu cien khaing an ra ceu heue. 4Pa ting rhawm lih koe rhawm caox heue. Pa song rhawm, lih mawh pa luan yuh, pui mawx pon kham tix tiebtie ka pa boh rhawm. 5Pa sidiex raw sidawng ka pui deuh phimap, nie lheu mhawm khaing pa briex moh dee glip heue. 6Yam ciyang paox grawm ka maix, nawh kawn kaux sijax mai priex maix, yam ngheet pui koeng ka maix, mawh pa sang tieh ka maix heue. 7Pui pa hoik sawm sak, via hu khaing rawm kaing hia heue. Pui pa cai rhawm khankix, ceu pa song kawx chix keud mawh ceu pa tie. 8Pui pa tik vud dee ot tix mai vuvie khankix, awm sim pa tik vud mheem tix mai to heue. 9Rawm sidah bhawng mai rawm sidah bee, awm kieh rhawm gaux rhawm mai lox pa tawx krax keud paox grawm pa moh, mawh mhai pa chix kieh gaux rhawm heue. 10Paw lai tik ka paox grawm maix mai paox grawm keeing maix, bawg yam hoek see piang maix, paw vi hu ka nyiex puxaik maix, nyiex paox plawg pa ot dex maix, nie lheu mhawm khaing puxaik lih pa ot dee singai heue. 11Kawn simex aux eue, kieh koe pingnya awx. Kieh aux nyawm rhawm tom chix deeh pawk ka lox pui pa salao ka aux heue. 12Pui pa koe satix, nawh hoik grux tawng see, ceu pa khi rhawm pa sang hoek piang tix mai chix mox tix heue. Pui pa ang koe pingnya, hu awm pa hu nawh mai hu yaox see krax khi rhawm heue. 13Phan kham sakse son pui pa ang maix tawng mai son bun pa ang mhawm been, teei ti deuh kraung nawh tix ceuceu heue. 14Pui pa kaoh ponngawb caocao mai ah lox sinum mai nawb bwanson ka paox grawm nawh khankix, awm pa jhax lawg ka paox grawm tix heue. 15Bun pa chix yuh krax simah ka pui, awm singaix lih lhiex ting, lih jah ang jud ang jai heue. 16Pui pa priex ti deuh ka bun an, awm pui pa priex ti deuh ka bhaung.Awm ang chix mox ka taix khawn dawm pa kraix ka rawm bee. 17Awm rhiem yuh paox rhiem lawm, pui chix kieh plakngai paox grawm tix mhawm. 18Pui pa priex ka khaox ruh yaox ti ih plix ruh, awm an pui pa yuh kaing simiang pon min plakngai heue. 19Awm lih pakngai pui ti awm paox tix daux rawm, rhawm kawn pui kawx awm paox tix, tix kaux lai tix kaux heue. 20Awm meung yum mai meung laux leeing ang chix fah rhawm, ngai kawn pui kawx ang chix sak ka jhak tix heue. 21Sonsang cheu tix yaox mau, aw cheu, sonsang cheu tix yaox khri mawh jhah ngu, sonsang cheu tix yaox kawn pui, mawh lox yaogyaw pui tang kaux. 22Pui caox khankix, teei tix tah daux po tau mai nghox kawx, ang cu tix lih khaing nawh heue. 23Coca kieh yuh tix tawng grawng cub yung maix, cub mawie maix kawx jawg tix jeung ngai maix mai jhak mhawm mhawm awx. 24Sinngao ang chix kaux cong jheung jheung, sinngao simiang kawx ang chix kaux cong leeing ju. 25Rib riem chix kuah, pa sum pa van kawx, chix plaung, plix toma tokoi kawx, yaox tix priex heue. 26Kawn yung khankix, mawh son kraung ceep, pex khankix, mawh son ngawh haktiex heue. 27Son pa sang ih maix mai kawn nyiex kawn ma maix mai khawm siliex bun khan kix, maix tak sang kub ka rawm teeih pex heue.
Currently Selected:
LOX KAB 27: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
