LOX KAB 20
20
1Rawm plix siiet mawh ceu pa chix pie lhen kawn pui, plai mawh ceu pa chix kieh pui simah, pa yuh ka ceu an khankix, mawh pui pa ang koe pingnya heue. 2Ceu pa song rhawm simiang, awm graox sivai sangsi, pui pa kieh simiang song rhawm mawh pa plaux ju tix heue. 3Pui pa kieh simah yiien mhawm, koe min plakngai, viang mawh nan, pui pa caox khankix chix simah jheung jheung heue. 4Pui pa nieh khankix, ang rhawm yuh kaing kheu kwat, kheu in, yam hoek bawg yam vawg nghox nawh rawg ka pui tang kaux kawx ang pon. 5Ka daux rhawm keud kawn pui, awm rawm pa kied raux kawx, pui pa mhawm pingnya khankix, tak kin ti teei heue. 6Pui tom nie khankix, chix krai ka bwanson pa hoik yuh tix, viang mawh nan, mawh pui mawx pa pon sawg ti yaox ka pui pa kaux sijax lie? 7Pui rahsee khankix, hawt krax pa rahsee tix mai kawn saux kawn sex nawh khankix kawx, tak pon bwanson heue. 8Simiang, pa ngawm piang dang ngeung prawng ca, ngai nawh grheu ti tik ka ceu pa caox pa ang mhawm khawmuik heue. 9Pui mawx pa pon ah, aux hoik kieh rhawm tix singax mai aux hoik luan khaing phimap tix heue. 10Kla jiang pa ang khaw mai khrawng pa ang khaw khankix, mawh pa seeing Siyiex kah heue. 11Kawn nyawm kawx, ceu pa yuh nawh singax lie ang singax lie? Caw lie ang caw lie? Jhi ka kaing pa yuh nawh mai kieh sidawng ka rhawm nawh heue. 12Yhaok pa chix mhong ang ah, ngai pa chix yaox ang ah, mawh pa phan pa deuh Siyiex heue. 13Mawh kheu lhat ka hot sibhawm, paw lai koe rhawm tix it, blah ngai tix awx. Maix tak yaox tix sawm sak heue. 14Cao pa liag chix ah yuh nin, ang mhawm, ang mhawm, khaix hoik liag hu, chix deeh yaw tix heue. 15Jheeh pui pa grum naog pingnya, nie lheu ngawh khaing khri, siang raoh pa ting jum tom nie heue. 16Phan kham sakse son pui pa ang maix tawng mai son bun pa ang mhawm been, teei ti deuh kraung nawh tix ceuceu heue. 17Ceu pa pie kheem tix ih, viang nyawm kawx, sidah khaix lih mawh simaox khrap ka jheeh cao ih heue. 18Krax keud gau pa kum kawng tau, mawh pa kaux cong heue. Phan koe krax keud kum kawng tom chix yuh naing heue. 19Pui pa vuvie haoh lox sikah khankix, chix krai doh ka ceu pa khaw tix mox. Mawh kheu in paw lai yuh paox pie ka pui pa chix nyaw glaw. 20Pui mawx ang ah, pa jhax lawg ka miex keeing tix, kawk ngu nawh tak yeet ka daux pa kied vhaik heue. 21Viang phai pon sinngao yam jah kawx, dee sidah khaix mawh pa ang koe bwanson heue. 22Paw ah, aux sang deeh pawk pa caox ka pui, krox jun ka Siyiex, Nawh tak taoh ka maix heue. 23Siyiex seeing ka kla jiang pa ang khaw heue. jiang pa ang khaw kawx koe phimap heue. 24Siyiex, hoik cox daux krax hu kawn pui heue. Phan ang mawh nan, kawn pui chix tawng krax hu ti yuh ka mawx? 25Pui pa hoik tiextu tix ah, in mawh pa mhawm heue. Nawh tieh feen khaix, mawh pui pa hoik krix ka jhawk heue. 26Simiang pa koe pingnya, grheu ti tik ka pui caox khankix mai teei ling lawx mai gut heue. 27Ju khwan kawn pui mawh kawk ngu Siyiex, mawh pa sang cheuk cheu ti yaox ka kraung pakpeung pa koe ka daux tokaux tix khawmuik heue. 28Krax pa caux rhawm mai ceu pa rahsee, mawh pa chix priex ka simiang heue. Kieh dang ngeung nawh kaux cong kheu krax caux rhawm heue. 29Min plakngai sinaw khankix mawh riang rao kix. Min plakngai kuad song khankix mawh haok kaing paing kix. 30Phan sigoih ka dee mat chix sighrah pa seeng singax, rhoi khaix saux kawx chix yuh bwanson daux tokaux tix heue.
Currently Selected:
LOX KAB 20: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
