LOX KAB 18
18
1Pui pa ang yuh paox pie mai pui tang kaux mai pui pa koe rhawm tix sawg ka pingnya krax tawng yung awm pa simie nawh, mawh pui pa chix sawg ka pingnya heue. 2Pui caox ang chix gaux rhawm ka daux pingnya, lheu khaing chix jhi nawh rhawm caox pa keud tix khaing. 3Yam hoek pui pa ang rahsee khankix, yaox ti kham ceu pa ang cee cag mai yam laux min plakngai, yaox ti kham ka pa salao heue. 4Lox lih khaing jheeh, awm rawm pa kied raux, rawm keut pingnya, awm rawm klawng ting pa lih hu khankix heue. 5Yam prawng see, ang khaw ti jhak plakngai pui pa ang rahsee ka son sang som pui rahsee heue. 6Siyieb jheeh pui caox khankix, chix kieh pui yuh simah, jheeh nawh kawx chix sawg ka krax ciyang phimap heue. 7Jheeh pui caox khankix, mawh pa yuh tokaux tix laux, siyieb jheeh nawh kawx mawh jhawk son ju nawh heue. 8Lox chix kieh pa simah khankix, nyawm awm pa ih, chix laig ka daux vaig daux tu heue. 9Pui pa nieh yuh kaing khankix, mawh puxaik pui pa cai mau khri som nai heue. 10Ceu kaux Siyiex, mawh tab pa kaux cong mai pui pa rahsee khankix, to tix laig tan mai luan khaing krax khi rhawm heue. 11Pui pa mi koe mau khri ah nin, sinngao aux awm veng pa kaux cong mai nawh keud ce awm guh veng pa lhaong heue. 12Num krax laux leeing mawh pa ting rhawm heue. Num min plakngai mawh pa tiem rhawm tiem rhi heue. 13Pui pa prawng ca ka pui, ka sivoe ang nyang bax chawk cheng ka grawng kuceu, mawh pui caox, pa koe phimap mai pon krax kaig tua heue. 14Ju khwan kawn pui, pon kham ka jhawm saux tix, pui mawx pa pon gun yeung ka krax khrup rhawm rhi tix lie? 15Pui pa chix deuh rhawm satix khankix, mawh pui pa chix priex ka pingnya heue. Yhaok pui pa koe pingnya, chix sawg ka pingnya heue. 16Mawh kheu totaix pa viex kawn pui, koe akhwang pon ti laig ka sivoe pui ting khankix heue. 17Pui pa hoek pau tix ah see sivoe, viang nawh ah lox pa rahsee kawx, paox plawg nawh, kawn hoek tix chawk cheng ka nawh heue. 18Nieb kieh pui cawk silak, sonsang kieh pa thung thiang yiien mhawm mai tat dud ka see pui pa ting riang an khankix heue. 19Pa viang ti yuh pa simah ka puxaik tix, nie lheu nu khaing veng pa kaux cong, pui pa yuh krax simah ka puxaik khankix, awm jhong siviex pa tieb ka tab heue. 20Vaig pui naog ka plix jheeh tix mai nawh yaox tix sak ka kaing pa lih khaing siyieb jheeh tix heue. 21Dak mawh pa kwang ka ju pa im mai ju pa yum heue. Pui pa moh dak tix, yaox ti ih plix dak tix. 22Pui pa pon moeng, pon ceu pa mhawm, pon bwanson khaing Siyiex heue. 23Pui hot sibhawm, chix khyox khaw ka pui, phan mawh pui pa mi koe khankix, chix pawk lox riex lox si oh heue. 24Pui Pa haoh hun paox grawm khankix, chix laux leeing, phan mawh paox grawm pa mhawm, nie lheu ot dex ex khaing puxaik dex heue.
Currently Selected:
LOX KAB 18: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
