LOX KAB 16
16
1Rhawm keud khawmuik mawh pa dex mai kawn pui, dak mai: lox kaoh khaing dak khawmuik, mawh cie Siyiex heue. 2Kawn pui chix fah rhawm ka kaing pa yuh tix, phan mawh Siyiex jhak ka rhawm kawn pui heue. 3Kaing pa yuh maix ap ka Siyiex awx. Phan yuh nan, kaing pa keud maix tak kaux cong heue. 4Siyiex hoik yuh khawm uik ka son Nawh heue. Nawh hoik phan ti deuh singaix sonsang ciyang ka pui caox khankix heue. 5Siyiex seeing ka pui pa ting rhawm khankix heue. Kix tok taix paox tix mai yuh cub caw kawx, ang doh pon luan khaing krax ciyang phimap heue. 6Mawh kheu krax caux rhawm mai bwanson pa rahsee, pon ti luan khaing phimap heue. Rhawm pa lhat graung ka Siyiex, mawh pa chix via hu khaing phimap heue. 7Yam khaw rhawm Siyiex ka jhawm pa yuh kawn pui, koe pui pa koeng ka paox tix kawx, Nawh deeh kieh kiex khaw paox tix heue. 8Sinngao, mau khri pa pon ka daux pa rahsee, viang mawh ceeix kawx, nie lheu mhawm khaing pa pon tom nie ka daux pa ang rahsee heue. 9Ka daux rhawm kawn pui keud krax sang hu tix, viang mawh nan, cao pa thong hu mawh Siyiex heue. 10Krax prawng ca pa rahsee, koe ka siyieb jheeh simiang, yam prawng ca nawh, ang chix lud heue. 11Jiang pa khaw mai kla jiang pa khaw, mawh cie Siyiex heue. Kla jiang pa koe ka daux bau khankix, mawh pa sang deuh tix prawng ca heue. 12Simiang pa yuh phimap, mawh ceu pa seeing brai heue. Grawh grawng nawh, kheu pa rahsee dang ngeung kaux cong heue. 13Siyieb jheeh pa rahsee mawh pa khaw rhawm simiang mai simiang moh ka pui pa ah lox pa khaw caw heue. 14Krax song rhawm simiang, awm kawncau simiang yum heue. Viang mawh nan, pui pa koe cuyi pingnya, chix kieh yiien ka pa song rhawm an heue. 15Kheu mhawm pakngai simiang, pon ju pa nyawm rhawm heue. Bwanson nawh kawx, awm rawm lhiex lha heue. 16Pa pon ka pingnya nie lheu mhawm khaing pon khri pa mhawm, pa pon pingnya krax tawng yung, nie lheu mhawm khaing pon mau pa mhawm heue. 17Krax pa hawt pui rahsee khankix, mawh pa via hu khaing phimap, pui pa ang via mai hawt krax an jheung jheung, nawh tak priex ju khwan tix heue. 18Pui pa ting rhawm khankix, krax laux leeing koe sivoe kix pui pa ting rhawm lhaong ngai khankix, tak rau hu dee tiem heue. 19Pa yuh paox pie ka pui pa awn rhawm khankix, nie lheu mhawm khaing yuh paox pie mai pui pa ting rhawm, pa gwieh tix cie kraung khrai mau khri pa pon khaing pa tud rhim heue. 20Pui pa priex tix hawt ka pingnya, tak pon pa mhawm heue. Pui pa deuh rhawm ka Siyiex, koe bwanson heue. 21Rhawm pui pa lhak lhiem, pui tak kok mawh pa koe pingnya satix heue. Jheeh pui pa chix krai lox pa nyawm pa tie kawx, chix kieh pingnya haok hwan heue. 22Pui pa pon ka pingnya khankix, pon ka rawm keut pa im ju heue. Pa sidiex gau pui caox khankix, mawh ngie ceu pa caox heue. 23Rhawm pa koe cuyi pingnya khankix, chix gau ka jheeh nawh mai baox thiem thie cuyi pingnya ka siyieb jheeh nawh heue. 24Lox pa nyawm ti nghiet khankix, awm rawm kaing hia, tie laig tom daux khwan mai kieh nyawm ot tom hoek daux si-ang heue. 25Krax pa keud kawn pui ce hoik mawh pa mawh meh kawx, dee sidah mawh krax yum heue.#Kab 14:12 26Kawn pui yuh kaing, jao son jheeh tokaux tix heue. 27Pui caox chix keud grawng pa caox, pa ang mhawm, lox sikah pa lih khaing jheeh nawh kawx, awm ngu pa kied hax heue. 28Pui pa kawk rhawm, chix ruat simie krax pa simah heue. Lox pui pa suksiep kawx, chix kieh paox grawm tang gwieh hu heue. 29Pui pa caox jhawm, chix nyaw glaw ka paox plawg mai chix viex hu ka daux krax pa ang mhawm heue. 30Yam khiep kix ngai tix mai keud ceu pa kawk vawk mai siyieb jheeh kix chuh mai lih mawh pa caox heue. 31Pui hoik paing hauk kaing, phan ot ka daux krax pa rahsee, mawh mhok khri min plakngai heue. 32Pui pa lang rhawm, nie lheu mhawm khaing pui pa ting riang rao mai pui pa gun rhawm, nie lheu mhawm khaing pui pa pon puing veng tix veng heue. 33Ex nieb ti teei lai pa koe daux bau kawx, cao pa hoik laug ti teei tete mawh Siyiex heue.
Currently Selected:
LOX KAB 16: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
