SIMIN 24
24
1Yam yaox Balam koe rhawm Simiang Siyiex ti sang nawb bwan ka pui Isarelax khankix, nawh ang lai hu awm ku bawg, sonsang chawk tix jhai mai nawh veeh ngai tix hu ka plak daux tiag. 2Balam maong ti jhak mai yaox ka bang ceu pui Isarelax khankix, awm pa koe doeh ru kix tix ceu hoik tix ceu mai khwan singax Siyiex lih ka piang nawh, 3mai nawh krai lox jhai tix ah nin, “Gumlox pa plak jhi khaing Balam kawn simex Bawrax, gumlox pa plak jhi khaing pui pa hoik riang ngai, 4Pui pa pon mhong gumlox Siyiex khaing pui pa hoik plak jhi mai pui pa yaox riang susai khaing kaw pa ting siawp sibrawm tau mai pa goh gup tix mai ngai nawh hoik baoh. 5Pui Yakop eue, nyiex gox maix khankix mawh pa mhawm grang miex ding, pui Isarelax khankix eue, dee ot maix khankix mawh pa mhawm grang miex ding! 6Awm daux ngawd pa vieh tom hoek dee singai, awm sipeem pa koe hawt praok rawm klawng khankix mai awm khaox nyawng pa hoik sum Simiang Siyiex khankix. Awm khaox Arit pa kuah hawt praok rawm khankix. 7Rawm tak lih khaing daux pung rawm nawh khankix mai simie nawh tak koe ka daux dee nie rawm khankix mai simiang nawh tak ting lhaong khaing Agat mai meung haktiex nawh tak mawh pa blon ao min. 8Siyiex viex nawh lih khaing meung Ejiptux, nawh hoik koe riang rao awm mawie praix, nawh tak kiied ti ih ceu pui khankix, pa mawh pui koeng nawh khankix, nawh tak raig ti tik si-ang kix graig siag mawx siag an mai te ak nawh tak phlat ka kix. 9Nawh tum mai nyat tix awm sivai sangsi mhaing mai awm sivai sangsi shiang, pui mawx pa sang pon so nawh kaoh lie?#Jah 49:9 pui pa nawb bwan ka maix tak pon bwanson mai pui pa jhax lawg ka maix tak pon krax pa jhax lawg.”#Jah 12:3
Lox Jhai Balam
10Baliet song rhawm ka Balam mai dieh taix ti, simiang Baliet ah nin ka Balam, aux kok maix sonsang jhax lawg ka pui pa koeng tix, jhak heue maix hoik nawb bwan ka piang kix tom loe bawg. 11“Mawh kheu nan yam in nied to ing ka dee ot maix, aux hoik ah ti sang tawx min ka maix, viang mawh nan Simiang Siyiex hoik kieh maix veeh ti khaing pa tawx min plakngai.” 12Balam deeh ah nin ka simiang Baliet, “Aux hoik krai ka pui cau maix khankix pa ploi maix hoek ka aux, 13Viang simiang Baliet sang tawx mau khri tom naog ka nyiex haw tix kawx aux tak ang pon lheu lox tawm Simiang Siyiex tix, sonsang yuh aux kaing ceu pa mhawm ang ah, ceu pa caox ang ah, son alo tokaux tix, aux tak krai ngie lox pa hoik krai Simiang Siyiex ka aux khaing ang mawh lie? 14Aux tak sang deeh hu ka ceu pui tix khankix, hoek heue, Aux tak sang kieh maix tawng pa sang yuh pui in khankix ka piang ceu pui maix khankix daux singaix khaix heue.” 15Nawh krai lox jhai tix ah nin, “Gumlox pa plak jhi khaing Balam kawn simex Bawrax mai gumlox pa plak jhi khaing pui pa hoik riang ngai, 16Pui pa pon mhong gumlox Siyiex khaing pui pa hoik plak jhi mai tawng ka pingnya khaing kaw pa ting lhaong mai pui pa yaox riang susai khaing kaw pa ting siawp sibrawm tau mai pa goh gup tix mai ngai hoik baoh.” 17Aux yaox ka Nawh Cao, viang mawh nan ang nyang mawh yam in, aux simi ka Nawh Cao, viang mawh nan ang nyang mawh pa dex, simuing tak lih khaing daux ceu pui Yakop, pliah Simiang tix giang tak lih kaoh khaing ceu pui Isarelax, mai tak tawk ka dongre ceu pui Mawbax mai yuh kawn simex Shetax laux lak pak leeing. 18Nawh tak rhim ka haktiex Edom mai gawng Sirax kawx tak mawh cie pui koeng nawh khankix, viang mawh nan ceu pui Isarelax khankix tak koe rhawm vao rhawm kwa. 19Pui pa kwang tix kaux tak lih hoek khaing ceu pui Yakop mai yuh veng pa kawn deuk khankix laux leeing!” 20Nawh jhak ka piang haktiex Amaliet mai nawh krai lox jhai ah nin, “Viang ceu pui Amaliet mawh pa kied cheung sinax ceu pui khankix kawx, dee sidah nawh tak mawh pa grai grup.” 21Nawh jhak ka piang ceu pui Kenix mai nawh krai lox jhai ah nin, “Dee ot maix mawh pa kaux pa cong mai tak deuh mheem maix daux rang, 22Viang mawh nan ceu pui Kenix tak laux leeing, tom hoek bawg yam viex Simiang Ashux pex hu mawh pui pa giex laung rheung miex ding lie?” 23Nawh krai lox jhai ah nin, “A lo! pui mawx pa sang im ju, yam yuh Siyiex inkix lie?” 24Reu sang phaw khankix tak hoek khaing haktiex Kitim mai yuh ka meung Ashux mai meung Heba, mai pui Amaliet khankix kawx tak laux leeing tau.” 25Khaix an Balam kaoh mai ing ka dee ot tix, mai Simiang Baliet kawx deeh hu krax hu tix heue.
Wa Common Language Bible © Bible Society of Myanmar, 2012