SIMIN 13
13
Ploi Cao Jiang Ka Meung Khanan
(Pi 1:19-33)
1Simiang Siyiex krai ah nin ka Mose, 2“Ploi cao kaing tix cub tix kaux, khaing doeh ru keeing kix hu jiang ka meung Khanan, pa sang tawx Aux ka ceu pui Isarelax, ” 3Mose ploi kix lih hu khaing daux tiag Paran, awm lox tawm Simiang Siyiex ka cao kaing ceu pui Isarelax heue. 4In mawh ceu kaux kix, khaing ru Rubin mawh Shamua kawn simex Zakhurax, 5khaing ru Simion mawh Shaphat kawn simex Hawrix, 6khaing ru Yudax mawh Kaliep kawn simex Yiephunie, 7khaing ru Issakha mawh Igalax kawn simex Yosiep, 8khaing ru Epharon mawh Hawshe kawn simex Nun, 9khaing ru Binyamin mawh Palatix kawn simex Raphu, 10khaing ru Zebulon mawh Gadelax kawn simex Sawdix, 11khaing ru Yosiep pa kaoh khaing ru Manashe mawh Gadix kawn simex Susix, 12khaing ru Dan mawh Amelax kawn simex Gemalix, 13khaing ru Asha mawh Seturax kawn simex Mikhelax, 14khaing ru Napthalix mawh Nabix kawn simex Vophasix, 15khaing ru Gat mawh Goelax kawn simex Makhix. 16In khankix mawh ceu kaux pui ploi Mose lih hu jiang ka haktiex an. Mose sum ceu kaux Hawshe kawn simex Nun deeh mawh Yawsux. 17Mose ploi kix hu jiang ka haktiex Khanan ah nin ka kix, “Hu krax plak seh mai haok ka piang gawng, 18Jhak ti yaox ka haktiex an koe yuh ka mawh, can pui pa ot ka daux haktiex an, mawh ting riang phan ang mawh nan mawh iak riang, mawh tux phan ang mawh nan mawh hun, 19haktiex ot kix mawh mhawm mawh caox, veng ot kix mawh nyiex bang mawh nyiex kaux, 20haktiex an mhawm lie, ang mhawm lie, koe ang koe khaox ox lie, kieh pex koe rhawm kwa rhawm vao mai viex plix kix tiblah khaing daux haktiex an.” Yam an hoik mawh bawg yam jah plix siiet tix teem. 21Kix lih hu jiang ka haktiex an, khaing daux tiag Zinax ka veng Rehawbax, dex krax laig daux veng Hamat. 22Kix lih hu plak seh tom hoek ka veng Hebaron, dee ot ru Anagax pa mawh Ahiman, Sheshie mai Talamie, veng Hebaron hoik cao sum ti aliah num sivoe veng Zawnax daux meung Ejiptux. 23Kix hoek ka ngawd Eshakawlax mai tat nhu plix siiet tix kak, pa koe plix siiet tix sigleem mai klawm ka khaox glawm ra kaux, kix baox viex plix kla jiang mai plix ruh hoek tiblah. 24Dee an kok mawh ngawd Eshakaw mawh kheu tat pui Isarelax sigleem plix siiet tan. 25Khaix hoik luan tixpon singaix, kix deeh hoek khaing jiang tix haktiex an. 26Kix deeh hoek ka Mose mai Arun mai pui hun Isarelax ka daux tiag Paran baoh Kadeshax, kix viex lox satang hoek ka kiex mai pui hun mai jhi kix yaox plix khaing haktiex an. 27Kix krai ka Mose ah nin, “Yix hoik hoek ka haktiex dee ploi maix yix hu, rug mawh dee lih rawm teeih mai rawm hia, in mawh plix khaing tan. 28Can pui pa ot daux haktiex an, mawh pa ting riang mai veng kix kawx hoik sum ti tom kaux mai kied ting kied vieh, lheu khaing an yix hoik yaox ru Anagax tan. 29Pui Amaliet ot ka daux haktiex an baoh plak seh, pui Hitix, pui Yebusix mai pui Amawrix ot ka piang gawng, pui Khanan ot praok rawm sigrit sigra mai praok rawm klawng Yawdan.” 30Kaliep kieh pui hun yawg ti ka plak sivoe Mose ah nin, “Kieh ex lih hu dom mawx dom an mai teei haktiex an, mawh kheu ex koe riang ti pex ka kix.” 31Viang mawh nan can pui pa hu mai Kaliep ah nin, “Ang ex kub riang rao ti pex kix, mawh kheu ting riang rao kix khaing ex.” 32Kix pa hu jiang ka haktiex an, deeh krai grawng satang pa caox ka pui Isarelax ah nin, “Haktiex pa lih hu jiang yix, mawh haktiex pa ot pui pa bleet ti ih pui mai can pui pa hoik yaox yix tan mawh pui pa kied ting lhaong kaux hak khawmuik. 33Yix yaox pui Nefelim#Jah 6:4 pa ting lhaong, doeh ru Anagax pa kaoh khaing pui Nefelim pa ting lhaong, yix hoik awm sido ka daux pa jhak yix ka cao tix mai yix hoik mawh awm an ka daux pa yaox kix heue.”
Wa Common Language Bible © Bible Society of Myanmar, 2012