SIMIN 10
10
Teettawng Mau Ra Mu
1Simiang Siyiex krai ah nin ka Mose, 2“Maix tak yuh teettawng mau ra mu sonsang kraix khrawm ka pui hun mai sonsang gah ka nyiex bang. 3Yam phlu ka teettawng an khawm ra, cub pui hun khawmuik, tak kraix khawm paox ti hoek ka plak sivoe maix hawt diang siviex nyiex gox bwan man bang kum. 4Phan phlu ka teettawng tix mu ngie, cao kaing pa kwang ka piang pui tix rheng khaing daux ceu pui Isarelax khankix, tak kraix khrawm paox ti hoek ka maix. 5Yam phlu maix teettawng pa so cub nyiex bang pa ot plak lih singaix, yaog ti hu krax. 6Yam phlu teettawng pa so bawg ra, cub nyiex bang pa ot plak seh, yaog ti hu krax mai yam phlu ka teettawng pa so yam mawx ang ah, kix tak lih hu krax. 7Yam sang kraix khrawm maix pui hun tau mai paox ti maix tak phlu teettawng, viang mawh nan maix paw phlu lox teettawng pa so. 8Kawn simex Arun pa mawh cao giex kaing li khankix tak phlu teettawng. In tak mawh been pa caw pex ti hawt yuh ka daux doeh ru pex leeing ju heue. 9Yam hu puing pex naing daux haktiex tix, ka pui koeng pa yeen pa khin ka piang pex, khaix an pex tak phlu teettawng pa so sonsang mawh krax pa doh keud pex ka sivoe Simiang Siyiex tix mai pex tak pon ti lawt luan khaing pui pa koeng tix. 10Ka dau singaix koe krax gaux rhawm pex, daux bawg yam singaix yuh pex pawie mai singaix haok khix khraox pex tak phlu teettawng ka piang krax tan pa gleeing pex khankix mai krax tan pa appong krax tan pa nhim, sonsang mawh krax pa doh keud pex ka Siyiex, Aux mawh Simiang Siyiex, Siyiex pex heue.”
Lih Hu Khaing Gawng Sina
11Ka daux num ra, khix ra, haok khix tixnga ngaix, paiawm yaog tix haok khaing ka piang nyiex gox bwan man pa koe teug pa kham mhai ruk, 12mai ceu pui Isarelax khankix lih hu khaing daux tiag Sina, khaix an paiawm lih kaog daux tiag Paran. 13Mawh kheu nan kix jah ti lih hu bawg tix awm lox pa tawm Simiang Siyiex ka Mose. 14Cub nyiex bang Yudax khankix lih hu sivoe tau mai chix kru naing tix, Nashon kawn simex Aminadat mawh cao kaing naing ka piang cub pui Yudax. 15Natanelax kawn simex Zuah mawh cao kaing naing ka cub pui Issakha. 16Eliabax kawn simex Helon mawh cao kaing naing ka cub pui Zebulon. 17Yam hoik yieh nyiex gox bwan man, kawn simex Gerashon mai kawn simex Merarix khankix klawm nyiex gox bwan man an lih hu heue. 18Cub nyiex bang Rubin khankix lih hu tau mai chix kru naing tix, Elizurax kawn simex Shedurax mawh cao kaing naing ka cub pui Rubin. 19Shelumelax kawn simex Zurishadie mawh cao kaing naing ka cub pui Simion. 20Eliasap kawn simex Doelax mawh cao kaing naing ka cub pui Gat. 21Ceu pui Kawhat khankix lih hu mai klawm kraung ceu pa singax singeh mai kix sum nyiex gox bwan man sivoe ka sang hoek kix. 22Cub nyiex bang Epharem lih hu tau mai chix kru naing tix, Elishama kawn simex Amihut mawh cao kaing naing ka cub pui Epharem. 23Gamalelax kawn simex Pedazurax mawh cao kaing naing ka cub pui Manashe. 24Abidan kawn simex Gidawnix mawh cao kaing naing ka cub pui Binyamin. 25Cub nyiex bang Dan ghoit ti hu tau mai chix cub kru naing tix, Aheza kawn simex Amishadie mawh cao kaing naing ka cub pui Dan. 26Pagelax kawn simex Awkharan mawh cao kaing naing ka cub pui Asha. 27Ahirax kawn simex Enan mawh cao kaing naing ka cub pui Napthalix. 28In mawh Grawng pa sang yaog ceu pui Isarelax khankix ti lih hu krax cub mawx cub an, yam lih hu kix krax heue. 29Mose ah nin ka Hawbax kawn simex Yoelax ka ceu pui Midian pa mawh paox nawh, “Ex sang lih hu ka dee pa hoik ah Simiang Siyiex, aux tak sang tawx an ka pex, hoek tau mai yix mai ex tak yuh ceu pa mhawm ka maix, mawh kheu Simiang Siyiex hoik yuh sijax mukheu pa mhawm ka pui Isarelax.” 30Hawbax deeh ah nin ka nawh, “Aux ang hu, aux deeh ing ka haktiex cao tix ka pao nyiex tix.”#Lih 18:27 31Mose deeh ah nin, “Yuh bwanson paw prah yix liak, mawh kheu maix hoik tawng yix sang yaox ti bang ka daux tiag mawh kheu maix hoik pon ti mawh ngai yix. 32Phan maix hu tau mai yix awm yuh Simiang Siyiex pa mhawm ka yix, yix kawx tak yuh pa mhawm ka maix.” 33Cub pui Isarelax lih hu khaing gawng Simiang Siyiex, been loe singaix krax, mai teug bwan sijax mukheu Simiang Siyiex thong kix hu sivoe loe singaix krax, sonsang sawg ka dee laux son kix. 34Paiawm Simiang Siyiex koe ka piang kix ponngaix yam lih hu kix krax. 35Yam lih hu teug bwan sijax mukheu yam mawx ang ah, Mose ah nin, “Simiang Siyiex eue kaoh heue, kieh pui koeng maix khankix, prung prang rairuat, mai kieh pui koeng maix to sivoe Maix.”#Yaog 68:1 36Yam kaog teug bwan sijax mukheu, Mose ah nin, “Simiang Siyiex eue, deeh hoek heue, deeh hoek ka dee ot ceu pui Isarelax kaing rheng kaing mheen liak.”
Wa Common Language Bible © Bible Society of Myanmar, 2012