MATHIEX 4
4
Kham Geu Pa Nyaw Phicaox
(Mak 11:2-13; Luk 4:1-13)
1Yam an Khuan Cao tuk Yesux hu ka daux tiagtu, sonsang kham geu pa nyaw phicaox heue. 2Nawh twah pa ih, tixpon ngaix, tixpon sawm, Nawh tom cai rhawm heue. 3Yam an cao nyaw hoek mai ah nin ka Nawh, “Phan Maix mawh Kawn Siyiex tawx lox kieh simaox in khankix mawh blah heue.” 4Viang mawh nan Nawh Cao pawk lox ah nin, “Hoik tiiem ti deuh ah nin, #Pi 8:3 Pui tak im kheu blah nong nong ang mawh, viang mawh nan, im kheu lox pa lih khaing jheeh Siyiex ku gum heue.” 5Yam an Phicaox baoh viex Nawh hu ka daux veng singax mai deuh Nawh piang dee choek nyiex bwan. 6Ah nin ka Nawh Cao, “Phan Maix mawh Kawn Siyiex, kieh tokaux tix rau sen. Kheu hoik tiiem ti deuh, #Yaog 91:11-12 Nawh tak tawm lox grawh grawng Maix, ka kawncau Siyiex Nawh khankix mai kix tak yaog Maix piang tawm taix kix, son ang caong Maix sang krox ka simaox.” 7Yesux baoh ah nin ka nawh, “Baox hoik tiiem ti deuh ah nin, #Pi 6:13 Maix paw vi nyaw ka Siyiex Maix” 8Yam an phicaox baox viex Nawh Cao hu tix bawg piang gawng kied lhaong tix mu mai jhi Nawh yaox meung piang haktiex khawmuik mai min plakngai cie meung khankix, 9mai ah nin ka Nawh Cao, “Phan Maix grux ngawng tix krub ka aux, ceu in khawmuik aux sang tawx ka Maix heue.” 10Yam an Yesux baoh ah nin ka nawh, “Satan eue, lih hu heue, kheu hoik tiiem ti deuh, #Pi 6:13 Maix tak sang krub ka Siyiex maix mai yuh son Nawh khaing.” 11Yam an phicaox hu khaing Nawh Cao mai jhak heue, kawncau Siyiex khankix hoek ti khan kheu ka Nawh heue.
Yesux Jah Ti Yuh Kaing
(Mak 1:39; Luk 4:14-15)
12Yam an khaix hoik mhong Nawh Cao grawh grawng hoik sau Yohan ka daux thawng Nawh lih hu ka daux meung Galilie heue. 13Nawh Cao prah veng Nazariet mai hoek ot ka daux veng Kapeniom, pa koe dex praok nhawng daux mee haktiex Zebulun mai Napthalix heue. 14Kheu sonsang naog gumlox pa hoik krai cao jhai Isayax pa ah nin, 15#Isa 9:1-2 “Haktiex Zebulun mai haktiex Napthalix, pa koe dex krax pa hawt praok nhawng mai bleeh plak toi rawm Yawdan, Galilie dee ot pui tang ceu. 16Pui pa ot ka daux pa faik khankix, pon yaox pa riang pa ting mai piang kix pa ot daux haktiex veei krax yum, pa riang hoik lih jhan heue.” 17Jah tom yam an Yesux jah ti sidiex gau ah nin, “Doh keud doh sawn ka phimap tix, kheu Meung Raoma dex sang hoek heue.”
Kok Kawncau Pon Kaux
(Mak 1:16-20; Luk 5:1-11; Yo 1:35-42)
18Yam hu Nawh dex rawm nhawng Galilie, Nawh yaox puxaik ra kaux pa mawh Simon pa kok mawh Petrux mai pux nawh Andare, ploi rub ka daux rawm nhawng, kheu mawh kiex pui pa teei kax heue. 19Yesux ah nin ka kiex, “Hawt khaix Aux mai Aux tak kieh pax mawh pui pa teei pui heue.” 20Dom mawx dom an kiex prah rub khankix tan mai hawt khaix Nawh Cao, 21Nawh hu sivoe ceeix mai Nawh Cao yaox puxaik tang kaux ra kaux, pa mawh Yakop, kawn Zebedie mai pux nawh Yohan, ot ka daux reu tau mai keeing kiex Zebedie mai cox rub cie kix, Nawh kok kiex. 22Dom mawx dom an kiex prah reu mai keeing tix mai hawt khaix Nawh Cao. 23Yesux hu lailing ka daux meung Galilie kudah dee mai gau ka daux nyiex sidiex khankix mai sidiex lox bwan gaux rhawm, pa dex dawd mai Meung Siyiex mai cox jhawm saux kuceu moi sinax pui khankix heue. 24Min plakngai Nawh Cao tah ka daux meung Surix kudah dee mai kix viex pui pa koe jhawm saux ku ceu mai pa kha rhawm mai pa laig phicaox khankix mai pui saux laung khankix mai pui yum taix yum caong khankix mai Nawh cox kix moi heue. 25Cub pui haoh hun hawt khaix Nawh Cao, pa kaoh khaing meung Galilie mai haktiex Dekapolix mai veng Yerusaliem mai meung Yudax mai plak toi rawm Yawdan khankix heue.
Currently Selected:
MATHIEX 4: WCL
Highlight
Share
Compare
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
