MATHIEX 24
24
Yesux Grux Krai
(Mak 13:1-2; Luk 21:5-6)
1Yam lih hu Yesux khaing daux nyiex bwan, kawncau Nawh khankix hoek ka Nawh Cao sonsang jhi Nawh yaox nyiex bwan khankix heue. 2Viang mawh nan Nawh Cao ah nin ka kix, “Pex yaox ceu in khawmuik ang mawh lie? Aux krai lox tete ka pex, tak ang grham simaox koe tin kieh koe piang paox tix, tix lon kawx, pa tak ang yieh ti tik heue.”
Mhai Rug Bawg Yam Sidah
(Mak 3:3-13; Luk 2:17-19)
3Yam ngawm Nawh Cao piang gawng Sanlun, kawncau khankix hoek ka Nawh Cao dee ang pui ot ah nin, “Ceu in khankix tak sang mawh yam mawx? Mhai rug grawng sang deeh hoek Maix mai grawng sang sidah haktiex in, tak sang mawh pa yuh ka mawx? krai ex mhong liak.” 4Yesux pawk lox ah nin ka kix, “Kheu son ang pui sang kieh krax lawng pex lud, rien rhawm tix kah heue. 5Kheu pui tom nie tak sang hoek mai ceu kaux Aux ah nin, Aux mawh Khrit heue. Tak kieh pui tom nie lud krax lawng tix heue. 6Pex tak mhong grawng naing mai lox susiah grawng naing heue. Rien rhawm tix son ang pex sang khi rhawm ka, kheu ceu in tak sang mawh, viang mawh nan ang nyang bax mawh bawg yam sidah heue. 7Mawh kheu pui tix ceu mai tix ceu, tix meung mai tix meung tak puing paox tix mai praix tak sang sibhawm, saux preng tak sang lih mai tuk kla reem tak sang tuk dah dee tom nie heue. 8Viang mawh nan ceu in khawmuik mawh pa jah tix kha rhawm awm bun jah tix saux yam sang keh heue. 9Bawg yam an, kix tak sang teei ti tawx pex sonsang kha pex pa tuktiak mai tak sang teei pex yum mai pui kuceu khawmuik tak sang koeng ka pex, kheu ceu kaux Aux heue. 10Yam an, pui tom nie tak sang goh grhup mai teei ti tawx ka paox tix mai koeng ka paox tix, tix kaux lai tix kaux heue. 11Cao jhai pa ang mawh meh tak sang lih koe tom nie mai tak jeeh nyaw ka pui tom nie heue. 12Kheu pa ang khaw ang jiet baox nie lih koe, krax moh krax rhawm pui tom nie tak sang iak hu heue. 13Viang mawh nan pui pa kaux cong tom sidah, tak sang pon krax taoh heue.#Mat 10:22; Cau 27 14Lox bwan gaux rhawm pa dex dawd mai Meung An, tak sang sidiex gau piang haktiex khawmuik, sonsang mawh mhai jhi ka ceu pui khawmuik mai khaix an bawg yam sidah tak sang hoek heue.”
Ceu Pa Kied Kha Rhawm
(Mak 13:14-23; Luk 21:20-24)
15“Mawh kheu nan yam yaox pex ceu pa seeing, ceu pa yuh laux grawng pa hoik krai cao jhai Danyelax, yam cung dee singax.#Dan 9:27—11:31, 12:11 Kieh kaw pa phat grawh grawng an tawng heue. 16Yam an kieh kix pa ot ka daux meung Yudax to hu piang gawng khankix heue. 17Pui pa ot piang prang nyiex, paw kieh nawh lih ti teei kraung pa koe ka daux nyiex tix. 18Pui pa ot ka daux ma paw kieh nawh deeh ing ti teei kraung ceep tix heue. 19Bun pa koe kaux mai bun pa tawx kawn tix peuex ka daux bawg yam ngaix an khankix, tak kha rhawm heue. 20Pex rawg bwan, yuh ka mawx son ang caw bawg yam kuat praix mai ngaix twah heue. 21Mawh kheu yam an, tak sang koe pa kied kha rhawm, ceu pa ang sax koe, tom yam jah ti kaw haktiex dix, tom sidah hoek bawg yam in mai khaix an kawx tak ang lai baox koe heue. 22Phan bawg yam singaix an khankix ang mawh singaix pa dawd, tix kaux kawx ang pon ti luan, viang mawh nan son pui pa hoik laug Siyiex tak mawh bawg yam singaix pa dawd heue. 23Yam an, phan pui tix kaux kaux ah nin ka pex, “Jhak heue, Khrit ot tin, phan ang mawh nan ot tan”, paw yum rhawm kah. 24Khrit pa ang mawh meh khankix mai cao jhai pa ang mawh meh khankix tak sang lih hoek mai plak jhi mhai mai ceu pa daox deng ceu pa kied ting, sonsang pon nyaw glaw ka pui hu krax lud, phan chix tix, ka pui pa hoik laug Siyiex kawx heue. 25Aux hoik grux krai ka pex heue. 26Mawh kheu nan, phan kix ah nin ka pex, Nawh ot daux tiag tu, paw hu. Phan ah Nawh ot daux lawg plak daux paw yum rhawm kah. 27Awm pluk plak praix lih hoek khaing plak lih singaix mai phlat ti riang tom hoek plak klip singaix, Kawn kawn pui tak sang hoek awm an heue. 28Tokaux yum koe dee mawx ang ah, klang preng tak khrawm tix tan heue.”
Yam Deeh Hoek Kawn Kawn Pui
(Mak 13:24-27; Luk 21:25-28)
29“Khaix pa kha rhawm daux bawg yam singaix an khankix, dom mawx dom an,
Singaix tak vhaik,
mai khix tak ang tawx pa riang tix,
mai simuing khankix tak sang rau khaing raoma,
mai sibrawm raoma khankix tak sang yung yiang heue.
30Yam an, mhai Kawn kawn pui tak lih ka raoma heue. Yam an ceu pui piang haktiex khawmuik tak yiiem mai kix tak sang yaox Kawn kawn pui tak hoek tau mai sibrawm mai min plakngai pa ting piang paiawm raoma heue. 31Nawh tak sang ploi kawncau raoma cie tix hu mai lox teet tawng pa kied ting kied luah mai kix tak sang khrawm pui pa hoik laug mawh cie Nawh, khaing pon plak, jah dee sidah daog raoma tix plak, tom sidah hoek daog raoma plak an heue.
Grawng Khaox Ruh
(Mak 13:28-31; Luk 21:29-33)
32“Gau khaing khaox Ruh heue.Yam awn kak nawh mai lih lhax khankix, pex tawng bawg yam rung dex sang hoek. 33Awm an yam yaox pex ceu in khankix khawmuik, pex tawng heue, Kawn kawn pui dex sang hoek, hoik bleeh dex ka siviex khankix heue. 34Aux krai lox tete ka pex, baux ju pui yam in tak ang luan, tom ceu in khankix khawmuik ang lih mawh heue. 35Raoma mai haktiex tak sang grai, viang mawh nan gumlox Aux, tak ang grai heue.”
Ang Tawng Tix Kaux Kawx
(Mak 13:32-37; Luk 17:26-30,34-36)
36Singaix mai bawg yam an ang pon tawng tix kaux kawx, pie kawncau Siyiex meung raoma khankix kawx ang tawng. Kawn Cao kawx ang tawng, mawh Keeing Cao tix kaux khaing pa tawng heue. 37Singaix pa tak sang deeh hoek Kawn kawn pui, tak awm bawg yam singaix Noax khankix heue. 38Hoik awm ka singaix kheem rawm khankix, tom hoek singaix laig Noax ka daux nyiex reu ting, kix ih mai nyaux, teei mex, teei moeng mai teei ti tawx paox tix heue. 39Kix ang tawng tom haok huan rawm mai sibloe kix hu khawmuik heue. Awm an, yam hoek Kawn kawn pui tak sang mawh nan heue. 40Yam an pui ra kaux pa ot daux ma, tak sang teei ka tix kaux mai prah ka tix kaux heue. 41Bun ra kaux pa krid mhaw tau, tak sang teei ka tix kaux mai prah ka tix kaux heue. 42Mawh kheu nan rien rhawm pex, kheu pex ang tawng bawg yam singaix sang hoek Simiang pex heue. 43Viang mawh nan tawng ka ceu in. Phan cao nyiex tawng bawg yam sang hoek pui briex, nawh tak pau mai ang kieh yieh ti laig daux nyiex tix heue.#Luk 12:39-46; 1The 5:2; Jhi 3:3, 16:15; 2Pe 3:10 44Mawh kheu nan pex kawx rien rhawm tix, kheu daux bawg yam ang pex ce, Kawn kawn pui tak sang hoek heue.”
Siliex Kaux Sijax Mai Pa Caox
(Luk 12:41-48)
45“Simiang hoik deuh siliex pa kaux sijax mai pa koe pingnya mawh cao kaing ting piang geh nyiex tix, sonsang tawx pa ih ka kix awm pa khaw bawg yam khankix heue. 46Yam deeh hoek simiang nawh mai yam yaox cao ka kaing pa yuh siliex an, kaw an tak koe bwanson heue. 47Aux krai lox tete ka pex, simiang nawh tak deuh nawh ting piang tobrie nawh khawmuik heue. 48Viang mawh nan phan siliex pa caox keud ti ah nin daux rhawm tix, Simiang aux tak sang lha hoek, 49mai tap ka paox siliex tix mai ih nyaux ceu pa yoek tau mai pui pa yoek khankix, 50mai simiang nawh tak hoek ka daux singaix pa ang nawh keud nawh ce mai daux bawg yam nari pa ang nawh tawng heue. 51Mug nawh dud mai deuh nawh tau mai pui pa pie lhen khankix, dee tak yiiem riag mai dee greeik rhang heue.”
Currently Selected:
MATHIEX 24: WCL
Highlight
Share
Compare
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
