MATHIEX 2
2
Hoek Ti Krub Yesux
1Yam keh Yesux daux veng Bieliehiem, meung Yudax, baux yam kwang simiang Herut, jhak heue, pui pa ting pingnya cuyi kaoh khaing plak lih singaix mai hoek ka veng Yerusaliem, 2chawk ah nin, “Kaw pa hoik keh mawh Simiang pui Yudax koe dee mawx? Mawh kheu hoik yaox ex simuing Nawh lih plak lih singaix, ex tom hoek ti krub ka Nawh Cao heue.”#Ye 23:5; Zak 9:9; Mak 15:2; Yo 1:49 3Yam mhong simiang Herut ka lox an, nawh mai pui veng Yerusaliem khawmuik sung sang rhawm kah heue, 4Nawh kieh cao giex kaing li pa ting khankix mai pui tiiem lai khawmuik khrawm paox tix mai nawh chawk kix grawh grawng tak sang keh Cao Khrit dee mawx heue. 5Kix krai ka nawh ah nin, “Tak sang keh ka daux veng Bieliehiem, meung Yudax, kheu cao jhai hoik tiiem lox pa ah nin,
6“Maix veng Bieliehiem
pa koe daux meung Yudax eue,
maix ang mawh veng
pa nie iak khaing pa kwang
simiang Yudax khankix,
kheu cao giex kaing
Tak sang lih khaing maix tix kaux,
mai Nawh tak sang kia ngien
Ka pui cie Aux,
pa mawh pui Isarelax heue.”
7Yam an simiang Herut briex kok pui pa ting pingnya cuyi mai chawk kix grawh grawng yaox kix simuing lai mawx heue. 8Nawh ploi kix hu ka veng Bieliehiem mai tawm lox ah nin, “Hu sawg Kawn nyawm an mhawm mhawm, yam hoik yaox pex ka Nawh, sonsang pon aux ti hu krub ka Nawh, deeh ing krai ka aux liak.” 9Khaix hoik mhong kix lox simiang, kix lih hu, jhak ka simuing pa yaox kix plak lih singaix pa hu sivoe kix, tom hu kaog piang dee ot Kawn nyawm an heue. 10Yam yaox kix simuing an, kix kied gaux rhawm tete.#Mat 1:18, 12:46 11Kix laig ka daux nyiex an mai yaox Kawn nyawm iak an tau mai miex Nawh Marix mai kix grux ngawng tix krub Nawh mai kix hoe sin ngao viex tix mai tawx totaix ka Nawh Cao pa mawh khri mai sidah bhawng, Lawban mai Muran heue. 12Khaix an son ang kix deeh ing ka simiang Herut, Siyiex tawx satix ka daux camaox mai kix deeh ing ka meung kix krax tang nyaing heue.
To Ka Meung Ejiptux
13Khaix hoik ing kix, kawncau Siyiex tix kaux lih bleeh ka Yosiep ka daux camaox ah nin, “Maix kaoh heue, mai teei Kawn nyawm iak mai miex Nawh mai to hu ka daux meung Ejiptux mai ot tan tom deeh krai Aux maix mhong heue. Kheu simiang Herut tak sang sawg Kawn nyawm iak in, sonsang laux yuh ka Nawh heue.” 14Yosiep kaoh teei Kawn nyawm mai miex Nawh mai lih hu ka meung Ejiptux yam ponsawm heue. 15Kix ot tan tom hoik yum simiang Herut heue. In mawh sonsang lih grum naog awm gumlox pa krai Simiang ka cao jhai pa hoik ah nin, “Aux hoik kok Kawn Aux lih khaing meung Ejiptux heue.”#Ho 11:1; Lih 4:22
Grawng Pah Kawn Iak Yum
16Yam tawng simiang Herut ka grawng pie lhien pui pa ting pingnya cuyi ka nawh, nawh kied song rhawm tete mai nawh ploi pui hu pah kawn nyawm simex yum, pa hoik koe ra num mai greem ra num khawmuik, pa ot ka daux veng Bieliehiem mai dee dex tan ku dah ku dee heue. Nawh keud ka bawg yam pa hoik mhong nawh ka pui pa ting pingnya cuyi nawh tom yuh nan heue. 17Yam an gumlox cao jhai Yeramix, pa ah nin, hoik naog heue.
18“Ka daux Ramax mhong lox pa yiiem riag, mai pa kied khi rhawm,
mawh pa yiiem Rakhelax son kawn nyawm kiex khankix,
mai ang chix kieh pa khu rhawm kiex nyawm rhawm, kheu ang kawn kiex lai deuk heue.”#Ye 31:15
Deeh Ing Ka Veng Nazariet
19Viang mawh nan Khaix hoik yum simiang Herut, jhak heue, kawncau Siyiex tix kaux lih bleeh ka Yosiep daux camaox, ka daux meung Ejiptux, #Mat 1:20, 2:13 20mai ah nin. “Maix kaoh heue, teei Kawn nyawm mai miex Nawh hu ka daux meung Isarelax, kheu pui pa sawg ti teei ju Kawn nyawm an yum khankix hoik yum heue.” 21Nawh kaoh, teei Kawn nyawm an mai miex Nawh mai hu ka meung Isarelax heue. 22Yam mhong Yosiep grawh grawng plud kawn Herut pa mawh Akhelax ti mawh cao giex kaing meung Yudax nawh lhat hu tan heue. Kheu Siyiex kieh nawh tawng ka daux camaox, nawh hu ka daux haktiex meung Galilie heue. 23Nawh hu ot ka daux veng pa kok mawh Nazariet, sonsang naog gumlox krai cao jhai khankix pa ah, “Tak kok Nawh mawh pui Nazariet heue.”
#
Mak 1:24; Luk 2:39; Yo 1:45
Currently Selected:
MATHIEX 2: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012