KRUB 9
9
Kaing Jhaw Cao Giex Kaing Li
1Yam hoek daux daix singaix, Mose kok ka Arun mai kawn simex nawh khankix mai kwad song ceu pui Isarelax, 2Nawh ah nin ka Arun, “Teei kawn mawie iak tix mu son krax tan pa pluat ploi phimap mai kawn yung tix mu son krax tan pa gleeing, pa loig khawm ra mu mai tan an ka sivoe Simiang Siyiex. 3Krai ah nin ka ceu pui Isarelax, teei kawn pex mhaing iak tix mu son krax tan pa pluat ploi phimap, kawn mawie iak tix mu mai kawn yung iak tix mu, pa hoik naog num pa loig khawm ra mu son krax tan pa gleeing. 4Teei mawie mhaing tix mu mai kawn yung mhaing tix mu, son krax tan pa nhim, son pa sang appong tix sivoe Simiang Siyiex mai krax tan phawng nghox ca im pa hoik klao tau mai bee, Siyiex tak lih bleeh ka pex ka daux in singaix.” 5Kix viex can pa hoik tawm Mose sivoe nyiex gox bwan man bang kum, mai cub pui hun greed dex mai cung sivoe Simiang Siyiex. 6Mose ah nin, “In mawh pa hoik tawm Simiang Siyiex pex yuh, mai min plakngai Siyiex tak lih bleeh ka pex.” 7Mose ah nin ka Arun, “Hu ka khu dee tan mai tan krax tan son pa pluat ploi phimap mai khawm krax tan pa gleeing, mai yuh krax khyox khaw pa pluat ploi phimap son tokaux maix mai son pui khankix, tan krax tan pa viex pui hoek mai yuh krax khyox khaw son kix, awm gumlox pa hoik tawm Simiang Siyiex.” 8Arun hu ka khu dee tan mai pah kawn mawie iak son krax tan pa pluat ploi phimap ka son cao tix. 9Kawn simex Arun khankix viex nham hoek ka nawh, nawh cub giien taix tix ka daux nham sau piang rung khu dee tan mai hieh nham pa kawn deuk an hawt caong khu dee tan, 10Nawh gleeing khlawp bee soklax mai khlawp bee tawm, son krax tan pa pluat ploi phimap piang khu dee tan, awm gumlox pa hoik tawm Simiang Siyiex ka Mose. 11Nawh gleeing nex mai hak tau ka daux ngu ka plak praix nyiex bang. 12Nawh pah ka to krax tan pa gleeing, mai kawn simex Arun khankix viex nham hoek plak sivoe nawh mai nawh phruah nham an khankix hawt vung viang piang khu dee tan. 13Kix deeh viex krax tan pa gleeing hoek ka plak sivoe nawh khawm khik nex mai kaing, nawh gleeing an khankix piang khu dee tan. 14Nawh sigrhah kraung vaig mai caong, nawh gleeing an khankix tau mai krax tan pa gleeing piang khu dee tan. 15Nawh viex krax tan pui khankix hoek mai teei kawn pex son krax tan pa pluat ploi phimap son pui khankix mai pah ti tan son phimap, awm pa hoik tan kix phao ka tix mu. 16Nawh baox viex krax tan pa gleeing hoek mai tan awm pa hoik koe been. 17Nawh baox viex krax tan phawng nghox ca im mai teei ka taix tix naok tix jhawp mai gleeing an piang khu dee tan, sivoe dee gleeing kix krax tan plak ponngawb. 18Nawh baox pah mawie mhaing mai kawn yung iak, pa ap kix son krax tan pa nhim son pui khankix, #Krub 3:1-11 kawn simex Arun khankix viex nham hoek, nawh phruah nham an vung viang piang khu dee tan khawmuik. 19Khlawp bee mawie mhaing mai kawn yung, khawm khlawp bee sidax mai khlawp bee pa kawb kraung vaig, soklax mai tawm, 20Kix deuh khlawp bee an khankix piang nex euk, nawh gleeing khlawp bee an khankix piang khu dee tan, 21mai Arun yang yeuh nex euk mai ba khawn dawm, son krax tan pa yang yeuh sivoe Simiang Siyiex, awm gumlox pa hoik tawm Mose. 22Arun yaog taix tix ka plak pui hun mai nawb bwan piang kix#Si 6:22-26 mai lih khaing ka dee krax tan son pa pluat ploi phimap mai krax tan pa gleeing khawm krax tan pa nhim khankix. 23Mose mai Arun laig daux nyiex gox bwan man bang kum pui hun mai deeh lih plak praix mai nawb bwan piang pui khankix. Khaix an, min plakngai Siyiex plak jhi ti ka pui khawmuik, 24Siyiex ploi ngu lih mai gleeing ka krax tan pa gleeing mai khlawp bee pa koe piang khu dee tan, yam yaox pui khankix ka an, kix kok yo mai gup ngai tix piang tiex khawmuik heue.
Wa Common Language Bible © Bible Society of Myanmar, 2012