KRUB 6
6
1Khaix an Simiang Siyiex krai ah nin ka Mose, 2“Phan pui tix kaux kaux koe pa lud loe ka Siyiex ka daux pa pie lhen tix ka paox plawg tix, son grawng kraung pa ap pui ti deuh ang ah, son kraung pa tang pui ti deuh ang ah, son kraung pa gut kheem ang ah mai son kraung pa tud rhim nawh khaing paox plawg tix ang ah, 3Phan nawh yaox ka ceu pa grai pui yuh mai pie lhen ka grawng an mai tiextu ka pa ang mawh ang meh mai lud ka ceu pa lud pui tix ceuceu. 4Yam pui tix kaux kaux lud mai lih ti mawh phimap, nawh tak deeh yaox ti viied ka kraung pa ap pui ti deuh ang ah, kraung pa tang pui ang ah kraung pa gut kheem ang ah, kraung pa tud rhim ang ah mai kraung pa grai yuh pui pa yaox nawh khankix, 5mai grawng pa hoik tiextu nawh ka daux pa ang mawh ang meh, nawh deeh yaox ti viied ngawh kraung tom naog mai deeh baox thie phwan son tix son piang an mai tawx an ka cao kraung, ka daux singaix yuh nawh krax tan pa lud. 6Nawh tak yaox ti viex kawn yung mhaing pa loig hoek ka Siyiex sivoe ngai cao giex kaing li, tau mai ngawh mau pa viied tix can krax tan pa pluat ploi pa lud tix. 7Cao giex kaing li tak yuh krax khyox khaw son nawh ka sivoe ngai Siyiex mai nawh tak pon krax pluat ploi khaing pa lud tix kuceu.”#Si 5:5-8
Been Krax Tan Pa Gleeing
8Siyiex krai ah nin ka Mose, 9“Tawx lox ka Arun mai kawn simex nawh khankix, in mawh grawng been krax tan pa gleeing. Krax tan pa gleeing tak koe piang glah ngu khu dee tan leeing sawm tom hoek plak ponngawb mai kieh glah ngu khu dee tan rup jheung jheung. 10Cao giex kaing li tak ceep sibex man tix mai khlax man piang tokaux tix mai nawh tak hok nyaox krax tan pa gleeing piang khu dee tan mai deuh ka praok khu dee tan. 11Nawh tak loh kraung ceep tix mai deeh ceep kraung tang ceu mai viex nyaox an lih ka praix nyiex bang ka dee hoik yuh kix blang. 12Ngu pa koe piang khu dee tan tak ang pon kieh yeet tix bawg kawx, tak kieh rup jheung jheung, mai cao giex kaing li tak sau khix sau ngu piang an ku ngawb mai deuh krax tan pa gleeing piang nawm khix pa rup piang khu dee tan mai yaox ti gleeing khlawp bee krax tan pa nhim. 13Ngu pa rup piang khu dee tan, tak ang pon ti kieh yeet tix bawg kawx tak kieh rup jheung jheung.
Been Krax Tan Phawng Nghox Ca Im
14“In mawh grawng been son krax tan phawng nghox ca im, kawn simex Arun khankix tak tan an piang khu dee tan, sivoe Simiang Siyiex. 15Nawh teei an khaing phawng gaox nghox ca im tix jhawp tau mai bee mai lawban pa koe daux krax tan an khawmuik mai gleeing an piang khu dee tan sonsang mawh pa sioe bhawng pa doh keud ka Siyiex. 16Pa kawn deuk an Arun mai kawn simex nawh khankix tak ih blah pa ang sau susaix kix tak ih ka dee pa singax singeh ka biang nyiex gox bwan man bang kum, tau mai blah pa ang sau susaix. 17An tak ang pon ti yuh sin tau mai susaix, mawh krax tan pa hoik tawx ka kix khaing krax tan pa gleeing, hoik mawh pa singax singeh, awm krax tan son pa pluat ploi phimap mai krax tan pa pluat ploi pa lud. 18Can pa mawh simex ka daux kawn praix Arun khawmuik, tak ih ka an, an tak mawh gumlox beenli pa hoik deuh ka son doeh ru pex ti ju hoik ti ju khaing krax tan pa gleeing pex ka ngu ka Siyiex, can pui ku kaux pa teeh ka krax tan an tak caw ti mawh pa singax singeh.” 19Simiang Siyiex ah nin ka Mose, 20“In mawh krax tan Arun mai kawn simex nawh khankix pa yaox kix ti tan phawng nghox ca im ka Siyiex jah ka daux singaix hoik kham ti rieb pa groi rawm bee ka nawh kix tak tan phawng nghox ca im kao son tix son khaing tix Epha son krax tan ku gaix, plak ponngawb tix plak mai plak ponbo tix plak. 21Sau bee tau mai phawng an yuh sin ka diang rhiem tix mu, maix tak viex hoek mai sivit ti tan mawh krax tan phawng nghox ca im, son krax tan pa sioe bhawng ka Siyiex. 22Ka daux kawn simex nawh khankix, pa kham ti rieb pa groi rawm bee tang nawh, tak yuh krax tan an, in mawh gumlox pingnyap grawng krax tan ka Siyiex leeing ju, tak yaox ti gleeing khawmuik. 23Can krax tan phawng nghox ca im kuceu son cao giex kaing li khankix, tak yaox ti gleeing khawmuik tak ang pon ti ih heue.”
Grawng Been Krax Tan Son Phimap
24Khaix an Siyiex krai ah nin ka Mose, 25“Krai ka Arun mai kawn simex nawh khankix, in mawh grawng been son krax tan pa pluat ploi phimap, krax tan son phimap an tak yaox ti pah ka dee gleeing kix krax tan pa pluat ploi phimap ka plak sivoe Simiang Siyiex, an mawh pa kied singax singeh. 26Cao giex kaing li khankix pa tan ka son phimap, tak ih an ka dee pa singax singeh tidah, pa koe ka daux nyiex gox bwan man bang kum pui hun. 27Can pui pa teeh ka nex an tak singax singeh, mai kraung ceep pa caw nham tix phreeh ka, tak deeh sidaux ka dah dee pa singax singeh. 28Aw tiex pa hoik ngaik kix nex ka daux, tak pah max, mai phan kix ngaik nex ka daux aw tawng lheung, tak caw ti thui mai lang singax ka rawm. 29Can simex daux cao giex kaing li khankix tak ih ka nex an, an mawh pa kied singax singeh. 30Viang mawh nan, krax tan son pa pluat ploi phimap pa viex kix nham laig ka daux nyiex gox bwan man bang kum, son pa sang yuh krax khyox khaw ka dee pa singax singeh, tak ang pon ti ih ka nex an, tak gleeing an ka ngu heue.
Wa Common Language Bible © Bible Society of Myanmar, 2012