KRUB 3
3
Krax Tan Pa Nhim
1“Phan pui tix kaux kaux yuh krax tan pa nhim mai kieh nawh tan mawie mhaing, phan ang mawh nan mawie shiang pa mhawm loig tix mu mu ka plak sivoe Simiang Siyiex. 2Nawh tak deuh taix tix piang mawie pa sang tan an mai pah hawt diang siviex nyiex gox bwan man bang kum, mai kawn simex Arun pa mawh cao giex kaing li tak phruah nham hawt vung viang piang khu dee tan. 3Nawh tak teei bee pa kheem kraung vaig khawmuik, pa mawh krax tan pa nhim mai krax tan gleeing ka ngu son Siyiex, 4soklax ra mu pa koe ka daux nyoi mai bee pa koe piang nawh mai bee pa kawb tawm khankix tak teei lih. 5Kawn simex Arun khankix tak gleeing an kix piang khu dee tan piang nawm khix pa koe ngu, kieh mawh krax tan pa gleeing ka ngu, pa sioe bhawng ka Simiang Siyiex. 6Phan sang tan krax tan pa nhim ka Siyiex, pa mawh yung, pex mai kieh nawh tan pa mawh mhaing phan ang mawh nan shiang pa mhawm loig tix mu mu. 7Phan nawh sang yuh krax tan ka kawn yung tix mu, nawh tak ap an ka sivoe Simiang Siyiex, 8nawh tak deuh taix tix piang kaing yung pa sang tan an mai pah an sivoe nyiex gox bwan man bang kum, mai kawn simex Arun khankix tak phruah nham ankix piang vung viang khu dee tan. 9Nawh tak yuh krax tan khaing krax tan pa nhim an, pa mawh krax tan pa gleeing ka ngu ka Siyiex, tak teei khlawp bee to tan an, bee pa kawb si-ang krawng tom hoek ka sidax mai bee pa kheem kraung vaig mai can bee pa koe piang kraung vaig khawmuik, 10soklax ra mu pa koe ka nyoi to tan mai bee pa koe piang an mai bee pa kawb ka tawm khankix tak teei lih, 11mai cao giex kaing li tak gleeing an kix, piang khu dee tan, awm priex preem pa mawh krax tan, pa hoik gleeing ti ka ngu son Siyiex. 12“Phan nawh sang yuh krax tan ka pex tix mu, nawh tak ap ka sivoe Simiang Siyiex, 13Nawh tak deuh taix tix piang kaing pex pa sang tan an mai pah ka sivoe nyiex gox man bang kum, mai kawn simex Arun khankix tak phruah nham ankix hawt vung viang piang khu dee tan. 14Nawh tak tan khaing an, awm krax tan pa gleeing ka ngu ka Siyiex mai bee pa kheem piang kraung vaig mai can bee pa koe piang kraung vaig khawmuik, 15soklax ra mu pa koe ka nyoi to tan mai bee pa koe piang an mai bee pa kawb piang tawm khankix tak teei lih, 16mai cao giex kaing li tak gleeing ankix piang khu dee tan, awm priex preem pa mawh krax tan pa hoik gleeing ka ngu pa sioe bhawng. Bee khawmuik mawh cie Siyiex. 17In tak mawh gumlox pingnyap sijax leeing ju ka dah dee ot doeh ru maix kudah dee, pex tak ang pon ti ih bee mai nham heue.”
Wa Common Language Bible © Bible Society of Myanmar, 2012