YONAX 2
2
Lox Rawg Yonax Bwan
1Khaix an Yonax ot ka daux vaig kax ting mai rawg bwan ka Siyiex tix, 2“Yam yaox aux krax kha rhawm aux kok yo ka Siyiex mai Nawh Cao pawk lox aux heue. Yam ot aux daux meung yum mai riag yo, Maix mhong ka lox aux heue. 3Mawh kheu Maix hoik teei ti sau aux daux dee raux sigreung rawm, rawm sigrit sigra hoik vung viang aux mai puk pak rawm cie Maix khankix hoik kheem ka piang aux heue. 4Aux ah nin, kheu mawh aux pui pa hoik tik tix khaing sivoe ngai Maix, aux keud ti ang lai yaox ka nyiex bwan pa singax singeh Maix heue 5Rawm khankix hoik rob vung viang aux, tom dex sang yum aux mai dee pa raux sigreung rawm hoik ot vung viang aux, rib riem rawm sigrit sigra khankix hoik vung fiien ka kaing aux heue. 6Aux hoik lih bleeh ka num caong gawng mai jhong siviex haktiex hoik nyeep ka aux leeing ju, viang mawh nan Siyiex aux eue, Maix tak sang taoh ju aux lih khaing dung raux daux nu heue. 7Yam khrup rhawm rhi aux, aux doh keud ka Siyiex mai lox rawg aux bwan hoik laig hoek ka plak sivoe ngai Maix, ka daux nyiex bwan pa singax singeh Maix heue. 8Pui pa yungyi ka riang grang pa giex going khankix, kix hoik tik vud krax caux rhawm siyiex tix heue. 9Viang mawh nan, aux tak sang yaog yaw ka Maix ka daux pa tan pa lu pa ap pong ka Maix mai tak yuh sijax mukheu awm pa hoik ah aux ti yuh heue. Bwanson krax taoh mawh pa kaoh khaing Siyiex heue.” 10Khaix an Siyiex tawx lox ka kax ting, kax ting an hao Yonax lih caong raog ka dee kroh tiex heue.
Currently Selected:
YONAX 2: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
