YOLAX 3
3
Siyiex Ciyang Ka Ceu Pui Khankix
1Jhak heue, ka daux singaix bawg yam an, Aux tak deeh viex pui pa giex laung haktiex Yudax mai pui veng Yerusaliem khankix hoek, 2Aux tak sang deeh baox kraix khrawm ceu pui khawmuik mai viex kix hoek ka daux lung Yehoshaphat mai Aux tak sang ciyang ka kix tan, mawh kheu kieh kix pui Aux mai sinngao Aux Isarelax khankix hoik prung prang ti ot ka daux sinax haktiex khankix mai kix hoik baox deeh gwieh ti teei haktiex Aux heue. 3Kix hoik yuh nieb ka son pui Aux, kix teei kawn nyawm simex loh ka bun coh kaux mai hoik coh kawn nyawm bun mai liag ti nyaux rawm plix siiet kah heue. 4Veng Turux mai veng Sidom,#Isa 23:1-18; Yez 26:1—28:26; Amo 1:9-10; Zak 9:1-4; Mat 11:21-22; Luk 10:13-14mai baoh rawb rim haktiex Philitix khankix eue,#Isa 14:29-31; Ye 47:1-7; Yez 25:15-17; Amo 1:6-8; Ze 2:4-7; Zak 9:5-7? mawh koe pa sang deeh pawk bix tix ka Aux mai Aux tak sang dee nied ti tawx krax pawk bix hoek phai phai piang kaing pex, 5kheu pex hoik rhim ti teei mau khri Aux mai khawm kraung khrai sinngao totaix pa hoik pon Aux ti cie khankix laig ka daux nyiex vad pex heue. 6Pex hoik baox deeh coh pui Yudax mai pui veng Yerusaliem ka ceu pui Helasax, sonsang luan kix dee singai khaing mee haktiex tix heue. 7Jhak heue, Aux tak sang yaog kix lih khaing dee pa hoik coh pex kix mai Aux tak sang deeh viied ti pawk bix hoek piang kaing pex heue. 8Aux tak sang coh kawn simex kawn bun pex khankix, ka daux tawm taix pui Yudax mai kix tak deeh coh ka pui haktiex Sheba pa ot dee singai heue. Siyiex ah nin heue. 9Pao ti krai grawng in daux sinax ceu pui khankix heue, khre rien son naing so kaoh ka pui pa kied ting riang rao khankix, kieh pui naing khawmuik greed tix dex kieh kix haok heue. 10Tawk to thai pex khankix mawh vaig lawm mai sivawg pex mawh pliah,#Isa 2:4; Mi 4:3 kieh pa iak riang ah nin, Aux mawh pa koe riang rao heue. 11Pex pa mawh pui tang ceu pa ot hawt vung viang khankix eue, khrawm paox tix tau heue. Siyiex eue, kieh pui pa kied ting riang rao Maix khankix lih hoek heue. 12Kieh ceu pui khawmuik so ti kaoh mai haok ka daux ngawd Yehoshaphat heue. Grawh grawng nawh, Aux tak sang ngawm ti ciyang ka ceu pui pa ot hawt vung viang khankix khawmuik heue. 13Khre sivawg heue, mawh kheu nghox pa sang vawg hoik kaux heue.#Jhi 14:14-16 Hoek mai laig biiet heue.#Jhi 14:19-20, 19:15. Grawh grawng nawh, dee krid rawm plix siiet hoik naog heue. Ang mai aw khankix hoik kreh hoik naog, grawh grawng nawh, ceu pa caox yuh kix mawh pa kied ting lhaong heue.” 14Pui kied haoh hun ot ka daux lung dee tat see heue. Grawh grawng nawh, singaix Siyiex hoik dex hoek daux lung dee tat see heue. 15Singaix mai khix tak sang lih ti mawh pa faik mai simuing khankix tak ang jhan pa riang tix heue. 16Siyiex tak briah lox tix khaing piang gawng Zion mai yo lox tix lih khaing veng Yerusaliem,#Amo 1:2 raoma mai haktiex tak sang yung yiang, viang mawh nan, Siyiex tak mawh dee peung ka son pui Nawh Cao mai mawh dee cong ceu pui Isarelax khankix heue. 17Pex tak tawng ka mawh Aux Siyiex, pa mawh Siyiex pex, pa ot piang gawng Zion pa mawh gawng pa singax singeh Aux heue. Yam an veng Yerusaliem tak sang mawh pa singax singeh mai pui tang ceu khankix tak ang lai yaox ti tiang ka daux nawh khaix in heue.
Siyiex Nawb Bwan Piang Pui Nawh
18Hoek ka daux singaix an, rawm plix siiet tie tak sang jauh ti lih ka gawng khankix, rawm teeh tak sang lih khaing ton khankix mai klawng haktiex Yudax khankix tak sang mawh pa lih hu rawm ka daux khawmuik, tak koe daux rawm keut pa lih hu khaing nyiex bwan Siyiex mai caux yuh daux lung Shitem heue. 19Meung Ejiptux tak sang mawh dee yiien hu pui mai haktiex Edom tak sang mawh daux tiagtu, pa hoik yiien hu pui, kheu krax pa kin yuh pui khankix piang pui Yudax heue. Kheu kix hoik jauh yuh nham pa ang koe phimap ka daux haktiex kix heue. 20Viang mawh nan haktiex Yudax, tak sang mawh pa koe leeing ju mai veng Yerusaliem tak sang mawh pa koe ku ju leeing ju heue. 21Aux tak sang pawk bix ka nham phimap pa lih yuh kix, ka pui pa ang Aux nyang bax pawk bix ka pui pa koe map koe grham heue. Grawh grawng nawh, Siyiex ot piang gawng Zion heue.
Wa Common Language Bible © Bible Society of Myanmar, 2012