YAWBAX 42
42
Yawbax Doh Keud Ka Phimap Tix
1Khaix an Yawbax pawk lox Siyiex ah nin, 2“Aux tawng ka pon yuh Maix Cao kuceu mai krax keud Maix Cao, ang koe pui pa pon kieh pon thiang ka heue. 3Maix Cao hoik chawk yuh nin, mawh pui mawx pa pon mox krax keud #Bax 38:2 daux pa ang tix koe krax tawng yung lie? “Mawh kheu nan aux hoik loe tix ah, ka ceu pa ang aux tawng dee bleeh, ceu pa ang tawng khankix kieh mawh pa daox deng ka son aux heue. 4“Nghiet liak, mai kieh aux sikah liak, aux tak sang chawk cheng ka Maix, mai Maix deeh pawk lox aux liak.#Bax 38:3 5Aux hoik sax mhong grawng Maix Cao ka daux yhaok tix heue. Viang mawh nan yam in aux hoik yaox Maix Cao heue. 6Mawh kheu nan aux seeing ka tokaux tix mai doh keud ka phimap tix ka daux pa ngawm daux phawng tiex mai nyaox heue.” 7Khaix hoik ah Siyiex lox in ka Yawbax mai Siyiex deeh ah nin ka Eliphat ceu pui Teman, “Krax pa song rhawm Aux hoik lih piang maix mai paox grawm maix ra kaux heue. Grawh grawng nawh ang maix lai krai ceu pa khaw caw ka Aux awm hoik krai kawncau Aux Yawbax heue. 8Mawh kheu nan yam in teei mawie mhaing aliah mu mai yung aliah mu son maix, mai hu ka kawncau Aux Yawbax mai yuh krax tan pa gleeing ka son maix, khaix an mai kawncau Aux Yawbax tak rawg bwan son maix heue. Grawh grawng nawh Aux tak rieb ka lox bwan rawg nawh, mawh kheu nan Aux tak ang lai deuh phimap ka maix awm pa koe rhawm cao maix heue. Grawh grawng nawh maix ang lai krai ceu pa khaw caw ka Aux awm hoik krai kawncau Aux Yawbax heue.” 9Mawh kheu nan Elihux ceu pui Teman mai Biladat ceu pui Shua mai Zopha ceu pui Nemat lih hu mai yuh nawh awm gumlox pa tawm Siyiex ka kix, mawh kheu hoik rieb Siyiex ka lox rawg Yawbax bwan heue. 10Siyiex deeh tawx can pa hoik som nai Yawbax khankix, khaix hoik rawg nawh bwan ka son paox grawm tix heue. Siyiex hoik tawx lheu khaing pa koe nawh glang ka an ra son heue.#Bax 1:1-3 11Khaix an pux aik pux o nawh khankix mai pui meed pui tawng nawh glang ka in ku kaux, hoek bleeh ka nawh mai hoik ih nyaux tau mai nawh ka daux nyiex nawh mai kix tawx lox nyawm rhawm mai khu rhawm nawh, son krax pa kha rhawm pa hoik viex Siyiex hoek piang nawh khankix heue. Kix ku kaux hoik tawx mau plah mai jheep gien khri tix taix ka nawh heue. 12Siyiex hoik nawb bwan piang Yawbax, bwanson pa pon nawh baox nie lheu pon khaing pa koe nawh yam jah heue. Grawh grawng nawh, nawh hoik koe yung khankix tix mheen pon rheng mu mai kala-uk liah rheng mu mai mawie tang tix rheng mu mai la shiang tix rheng mu heue. 13Nawh baox pon kawn simex aliah kaux mai kawn bun loe kaux heue. 14Nawh kok ceu kaux kawn Yex tix mawh Yemima mai ceu kaux kawn I tix mawh Kizi mai ceu kaux kawn Am tix mawh Kerin Hapapuk heue. 15Ka daux haktiex baoh an khawmuik bun pa lheu mhawm grang khaing cub kawn bun Yawbax ang koe tix kaux kawx mai keeing kix tawx kix sidu pon sin sinax puxaik kix heue. 16Khaix an Yawbax im ju tix yieh tixpon num mai hoik yaox kawn praix mai kawn saux kawn sex tix khankix son daux ju pui pon ju heue. 17Mawh kheu nan Yawbax hoik yum mai riex ju tix mai grum naog ju tix heue.
Currently Selected:
YAWBAX 42: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
