YAWBAX 38
38
Siyiex Jhi Siawp Sibrawm Ka Yawbax
1Khaix an Siyiex pawk lox Yawbax khaing daux bhaung ting ah nin, 2“Mawh pui mawx pa kieh krax keud Aux faik ka lox sikah pa ang koe krax tawng yung lie? 3Yam in rawd nyoi maix awm mawh tix simex tix kaux, aux tak chawk ka maix mai deeh pawk lox chawk Aux ka maix heue. 4“Yam sum Aux ka num riah haktiex khankix mawh ot maix dee mawx lie? Phan maix hoik tawng ka inkix krai Aux mhong heue. 5Mawh pui mawx pa pon tiag ka diag koe haktiex, phan maix tawng krai Aux mhong, phan ang mawh nan mawh pui mawx pa pawd ti deuh rhoi mee nawh piang an lie? 6Mawh hoik phyawk num riah haktiex tix ka patix lie? phan ang mawh nan mawh pui mawx pa sum ti deuh lon simaox daog nawh lie? 7Yam khrawm simuing ponngawb paox tix rhax lai mai yam hoik riag yo cub kawn praix Siyiex khankix tau mai pa gaux rhawm. 8“Phan ang mawh nan, mawh pui mawx pa hoik nyeep ti deuh siviex rawm sigrit sigra, yam hoik breeng nawh tix lih keh khaing daux vaig miex tix, 9yam hoik yuh Aux paiawm khankix mawh kraung ceep nawh mai kieh pa kied vhaik an mawh man leem pa pua ka mee koe an, 10yam hoik yuh aux ti deuh mee pa tat aux khankix kaux son an mai hoik sau ti deuh siviex mai jhong siviex, 11ah nin, maix tak pon tix hoek singai die pie in, viang mawh nan maix paw lai luan singai khaing in, mai krax pukpak rawm pa lhaong rhawm maix kieh kaog tin heue.#Ye 5:22 12Mawh sax tawm maix lox ka ponngawb tom yam jah maix tix keh mai mawh hoik khre maix ka dah dee ot bah riang praix lie? 13Sonsang mawh pa riang ponngawb an pa giex tom ka yoh haktiex mai khruah pui caox caig lih khaing daux haktiex lie? 14Haktiex hoik awm glaox pa koe greem cum tix mu mai cung tix lih awm kraung ceep pa mhawm heue. 15Pa riang pui caox caig khankix hoik grai khaing kix mai plawng taix pa yaog tix kawx hoik grai heue. 16Mawh hoik sax laig maix ka daux rawm keut ka daux rawm sigrit sigra khankix lie? Phan ang mawh nan mawh hoik sax laig lailing maix ka daux kawn moik lie? 17Mawh hoik sax paoh siviex meung yum tix ka son maix lie? hoik sax yaox maix ka diang siviex yum khankix lie? 18Mawh hoik sax tah tum grum tawng maix ka haktiex in khawmuik lie? phan maix tawng uik, krai aux mhong. 19“Mawh koe krax pa sang thong hu ka dee koe pa riang dee mawx? mai koe dee ot pa faik ka dee mawx? 20Mawh sang pon viex maix kix hoek ka dee ot dee koe kix mai sang pon tawng maix ka daux krax pa sang hoek ka nyiex nawh lie? 21Maix tee tawng ka grawng pa hoik dawg keh tix mai pa kied lang ju tix heue. 22Mawh hoik sax laig maix ka daux nyiex krao sinngao rawm rha, phan ang mawh nan mawh hoik sax yaox maix ka nyiex krao sinngao rawm pre khankix, 23ka pa hoik khre aux ti deuh son bawg yam krax pa kha rhawm mai son singaix bawg yam puing naing daux naing khankix lie? 24Mawh tah hu pa riang ka daux krax yuh ka mawx? Phan ang mawh nan mawh hoik tah hu bhaung plak lih singaix piang haktiex yuh ka mawx? 25Mawh pui mawx pa hoik paoh ti deuh rhoi hu rawm raoh, sonsang ba rawm, phan ang mawh nan rhoi grawng krax hu sah, 26sonsang kieh nawh lhiex lih piang haktiex, ka dee ang pui ot tix kaux kawx mai ka daux tiagtu, ka dee ang pui ot tix kaux kawx, 27sonsang tawx haktiex yi, leet ka rawm mai kieh rawm klawng lih hu kieh rib awn kuah ting lhaong heue. 28Mawh koe keeing lhiex lie? Phan ang mawh nan mawh pui mawx pa kieh rawm ciex lih koe lie? 29Mawh kaoh rawm sidap khaing daux vaig pui mawx lie? klon rawm ciex daux raoma mawh pui mawx pa keh nawh lie? 30Rawm khankix kiien awm simaox mai ka dee raux rawm hoik mawh lon heue. 31Mawh pon khrawm maix tix phyawk ka simuing khimax, #Yaw 9:9; Amo 5:8 simuing grawng lat khankix ot tau, phan ang mawh nan mawh chix yah maix maox vien rawb simuing pa kied riang an lie? 32Mawh pon plih maix simuing Mazarot lih ka daux bawg yam cie nawh lie? Phan ang mawh nan, mawh pon thung bung maix ka simuing krih ting grang hu tau mai cub simuing iak khankix lie? 33Mawh tawng maix ka been pa koe raoma lie? Mawh pon deuh maix been an mawh pa kwang piang ca haktiex lie? 34“Mawh pon pao maix lox tix hoek ka daux paiawm, sonsang pon kheem rawm lhiex tom nie ka maix lie? 35Mawh pon ploi maix pa riang plukplak praix lih, sonsang hu kix mai ah nin ka maix lie? ‘Yix koe tin heue.’ 36Mawh pui mawx pa sau ti deuh pingnya cuyi ka daux tokaux lie? mawh pui mawx pa sau krax tawng yung ka daux rhawm lie? 37Mawh pui mawx pa pon simin ka paiawm ka pingnya cuyi tix lie? phan ang mawh nan mawh pui mawx pa pon lhauk si ngiien rawm raoma khankix lie? 38Yam klao phawng tiex tix kiien tau mai klon tiex khankix mai deeh kab tix mawh tiex tau mai paox tix lie? 39Mawh pon leue maix totiag sonsang ih sivai sangsi, phan ang mawh nan mawh sang pon tawx maix kawn sivai sangsi awm ju pa cai rhawm an sak lie? 40Yam kawn tum kix ka daux rang, phan ang mawh nan yam kawn nyat kix tix ka daux yeem daux yaw mai jawm kix tix pau lie? 41Mawh pui mawx pa tawx lak ih priex, yam riag yo kawn lak ka Siyiex mai vung viang kheu ang pa ih kix koe lie?
Currently Selected:
YAWBAX 38: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
