YAWBAX 34
34
Elihux Krai Pa Rahsee Siyiex
1Elihux deeh pawk lox ah nin, 2“Pex pa koe pingnya cuyi khankix eue, nghiet lox pa krai aux, pex pa koe krax tawng khankix daong jhaok ti nghiet ka aux, 3mawh kheu yhaok chix cheuk ka lox, awm chix cim jheeh ti yaox ka priex preem khankix heue. 4Kieh ex laug ti teei pa rahsee son tokaux tix, kieh tokaux ex tawng mawh ceu patix pa mhawm ka son cao ex heue.” 5“Mawh kheu Yawbax ah nin, aux mawh pui rahsee, viang mawh nan, Siyiex hoik kieh pa rahsee aux som, 6mawh sang pie lhen aux maix krai lud tix ka daux pa rahsee tix lie? Viang aux ang koe krax lud kawx, jhawm saux pa ang lai chix moi koe ka aux heue. 7Mawh pui mawx pa awm Yawbax pa nyaux ka lox sibriem khankix awm rawm, 8kix mawh pui yuh paox hu krax tau mai pui caox mai lailing hu tau mai pui ang rahsee heue. 9Kheu hoik ah nin, pa gaux rhawm nawh ka daux Siyiex ang mawh pa tawx bwanson ka pui tix ceu kawx heue. 10Mawh kheu nan, can pex pa koe krax tawng, nghiet ka lox aux kieh pa caox caig mai pa yuh phimap mawh pa singai khaing Siyiex Cao pa ting sibrawm heue. 11Nawh Cao tak deeh viied ka nawh#Yaog 62:12 awm kaing yuh nawh mai kieh lih koe ka nawh, awm pa yuh nawh heue. 12Tete te lai, Siyiex ang sax yuh pa caox caig tete, cao pa ting sibrawm tak ang koe krax tieh loh ka krax rahsee tix heue. 13Mawh pui mawx pa hoik tawx beeh glawm kwang haktiex in ka Nawh Cao lie? Phan ang mawh nan mawh pui mawx pa hoik yaog Nawh Cao mawh pa kwang khawm bee haktiex lie? 14Phan Nawh Cao ang koe alo ka pui mai phan Nawh Cao teei tix priex ka khwan ju Nawh Cao deeh hoek ka tix, 15nex nham kawn pui khankix tak mawh pa laux leeing mai pui deeh ing ka tiex heue. 16Phan maix koe krax tawng, keud ti yaox ka lox aux khankix. 17Mawh tak sang kwang pui koeng ka pa rahsee ka haktiex lie? Mawh sang prawng ca maix ka Cao pa ting sibrawm pa mawh pui pa kied rahsee lie? 18Mawh khaw ti ah nin ka simiang, maix mawh pa giex going mai khaw tix ah ka pui ting lhaong khankix mawh kix pui caox caig lie? 19Viang yuh nan Nawh Cao ang tie mawh pa jhak ka plakngai kawn lauxsimiang, Nawh Cao ang tie mawh pa khan ka ngai cao mi lheu khaing pui hot shia, grawh grawng nawh kix mawh pa phan pa deuh Nawh Cao ka taix tix khawmuik heue. 20Ka daux tivud ticu kix tak yum daux greung sawm, pui khankix hoik siyaung mai grai hu, pui pa ting riang rao khankix hoik teei ti tik ka daux pa ang taix pui tiah kix heue. 21Grawh grawng nawh ngai Nawh jhak piang krax hu kawn pui khankix, Nawh Cao yaox ka diang caong hu kix khawmuik heue. 22Pa faik mai veei yum ang lai pon mox tokaux pui yuh krax lud heue. 23Grawh grawng nawh, Nawh Cao ang lai lo tix prawng ca ka daux pa chawk cheng, ka plak sivoe ngai Siyiex lawlawx heue. 24Nawh Cao raig ti tik ka pui pa ting riang rao khankix tom phawk, tau mai pa ang tix lai chawk cheng mai yaog ti deuh pui tang kaux plud ka dah dee ot kix heue. 25Mawh kheu nan Nawh Cao tawng ka kaing yuh kix, Nawh Cao tik kix laig ka daux pa faik ponsawm mai kix hoik mawh pa phawng laux leeing heue. 26Nawh Cao tawk ka kix awm pui caox caig ka sivoe ngai pui hun khankix heue. 27Grawh grawng nawh kix deeh veeh tix hu khaing Nawh Cao mai ang lai keud grawng krax Nawh Cao tix ceu kawx heue. 28Mawh kheu nan kix hoik kieh lox yiiem pui hot shia hoek ka Nawh Cao, grawh grawng nawh Nawh Cao mhong ka lox yiiem pui pa kha rhawm khankix heue. 29Yam tawx Nawh Cao krax pa yiien yawg, khaix an mawh pui mawx pa sang pon tuktiak tukte ka lie? yam mox Nawh Cao pakngai tix, khaix an mawh pui mawx pa sang pon yaox ka Nawh Cao, pui tix meung ang ah mai pui tix kaux kaux ang ah, sang pon yaox ka Nawh Cao lie? 30Son ang pui caox caig sang pon kwang mai lhat pui khankix krix ka jhawk taong heue. 31Grawh grawng nawh koe pui mawx pa ah nin ka Siyiex, aux hoik yaox ti kham krax pa sidiex gau mai aux tak ang lai baox yuh krax lud tix bawg kawx, 32gau aux ka ceu pa ang aux chix yaox, phan aux hoik yuh krax lud, aux tak ang lai yuh tix bawg kawx heue. 33Mawh keud maix tix sang pon bwanson khaing Nawh Cao, ka daux pa yuh alo tix kheu jao thiang maix ka kaing yuh Nawh Cao lie? Maix tak yaox tix laug ti teei an mai ang mawh aux, mawh kheu an krai ceu pa tawng maix heue. 34Kieh pui koe krax tawng yung khankix krai ka aux mai kieh pui koe pingnya khankix nghiet ka lox aux, 35Yawbax krai lox tau mai pa ang tix koe krax tawng yung, lox nawh khankix mawh lox pa ang koe pingnya heue. 36Kieh Yawbax mawh pa kham geu tom sidah, grawh grawng nawh lox pawk nawh khankix awm lox pui caox caig khankix heue. 37Grawh grawng nawh, nawh baox naok krax tieh feen piang phimap tix, nawh dieh taix tix ka sinax ex mai baox nie ah lox pa tieh feen ka Siyiex heue.”
Currently Selected:
YAWBAX 34: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
