YAWBAX 32
32
Elihux Thiang Ka Yawbax
1Mawh kheu nan pui inkix loe kaux hoik yaog tix mai pawk lox Yawbax, mawh kheu jao hoik ah nawh mawh tix pui rahsee heue. 2Khaix an Elihux kawn simex Barakhelax ceu pui Buzix, pa mawh doeh ru Ramax song rhawm ka Yawbax heue. Krax song rhawm nawh hoik lih kheu jao jhi nawh grawng rahsee khaing Siyiex heue. 3Krax song rhawm nawh hoik baox lih piang paox grawm nawh khankix loe kaux, kheu jao yaox nawh ka ang kix lai pawk lox tix mai kix prawng ca deuh Yawbax koe phimap heue. 4Yam in kheu mawh kix loe kaux pa riex ju khaing Elihux nawh hoik pau ti sang sikah mai Yawbax heue. 5Yam yaox Elihux ka ang jheeh kix loe kaux lai pawk lox tidtix nawh kied song rhawm ka kix heue. 6Mawh kheu nan Elihux kawn simex Barakhelax ceu pui Buzi, pawk lox ah nin “Aux mawh pa awn ju mai pex mawh pa kied riex ju, mawh kheu nan aux koe krax lhat graung mai ang lai kan paoh grawng pa yaox tix ka pex heue.” 7Aux ah nin, pui riex ju khaw ti mawh pa krai lox mai pui pa kied lang ju khankix khaw ti mawh cao pa sidiex gau krax koe pingnya cuyi heue. 8Viang mawh nan khwan koe ka daux kawn pui mai bhawm pa phlu Cao pa ting sibrawm tix sau mawh pa kieh nawh koe krax tawng heue. 9Pui pa ting lhaong khankix ang lai mawh pa koe pingnya cuyi jheung jheung mai pui riex ju khankix ang mawh pa tawng ka pa mawh meh jheung jheung heue. 10“Mawh kheu nan aux sang ah nin, nghiet ka lox krai aux, aux tak sang krai pao grawng krax pa yaox aux heue. 11Aux hoik pau tix mhong ka lox krai pex khankix, aux hoik krox tix nghiet ka grawh grawng pa rien pex tix sang krai heue. 12Aux hoik jawg ti nghiet ka pex mhawm mhawm mai pui khaing daux pex tix kaux kawx, ang pex ka Yawbax mai ang pon pawk lox nawh heue. 13Paw lai ah yuh nin, yix hoik yaox ka pingnya cuyi, mawh Siyiex pa kieh nawh pex mai ang lai mawh kawn pui heue. 14Yam in nawh ang lai pon jhi lox sikah tix ka aux, mawh kheu nan aux ang lai pawk lox ka nawh, tau mai lox pa hoik ah nawh heue. 15Kix hoik daox deng mai ang lai baox pawk mai kix ang lai koe lox sang krai tix gum kawx heue. 16Yam pau aux tix nghiet mai kix ang ah tidtix, kix cung ot yawg tix mai ang lai baox pawk lox tix bawg kawx heue. 17Aux sang baox krai ka cie tix mai aux sang krai pao krax grawng pa yaox tix heue. 18Grawh grawng nawh aux koe lox pa grum naog ti sang krai, khwan ka daux aux hoik so aux yuh an heue. 19Jhak heue, vaig aux awm rawm plix siiet ang koe daux sang lih, mai an awm hau hak rawm plix siiet pa khraox pa dex sang bih heue. 20Aux sang sikah sonsang nghie rhawm tix, aux sang ang jheeh tix mai deeh pawk ka heue. 21Aux ang lai jhak ka pakngai pui tix kaux kawx mai paw kieh aux yaogyaw mai glaw pui pie tix kaux kawx heue. 22Grawh grawng nawh phan aux yaogyaw mai glaw pui tang kaux cao pa phan pa deuh aux tak sang teei ti tik aux heue.
Currently Selected:
YAWBAX 32: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
