YAWBAX 28
28
Yawbax Sidiex Daux Pa Koe Pingnya
1Mau koe hawt daux rhoi mau tete mai ka dah dee koe khri pui cied ti teei khri tan heue. 2Rhiem mawh pa kaong ti teei khaing daux tiex mai tawng raoh mawh pa hoik raug tix lih khaing simaox heue. 3Kawn pui laig ka dah dee raux pa kied faik, kix sawg tix liiem ka daux pa kied raux haktiex mai kix kaong simaox ka daux pa kied faik an heue. 4Kix hu dee singai ka dee ang pui sax ot mai ang sax dig ka caong tix mai kaong ka mau heue. Kix teuk teue tix ka maox mai laig yuh kaing ka daux an heue. 5Viang priex preem lih khaing haktiex kawx, viang mawh nan ka greem haktiex tak hax awm ngu, awm an piang haktiex kawx tak hax ka ngu heue. 6Lon simaox khankix mawh num riah dee lih simaox siang raoh mai phawng tiex an koe khri ka heue. 7Krax an sim tix mu kawx ang sax tawng ka mai ngai klang kawx ang sax yaox ka heue. 8Sivai sangsi mai totiag pa vao khankix kawx ang nyang sax dig sax pha ka krax an heue. 9Nawh deuh taix tix piang simaox pa kiien mai nawh pluk pliak ka gawng lua tom hoek num riah gawng khankix heue. 10Nawh toh rawng rawm phlat khaing rang khankix mai ngai nawh chix yaox ka ceu pa kied laoh lie kuceu heue. 11Nawh klat ka rawm klawng pa lih hu an mai nawh kaong ka ceu pa mox an khankix hoek ka daux pa riang heue. 12Viang mawh nan koe pingnya cuyi dee mawx lie? koe krax tawng yung khankix dee mawx lie? 13Kawn pui ang pon tawng ka ngawh jum pingnya cuyi mai ang mawh ceu pa chix yaox ka dau pui pa im ju piang haktiex heue. 14Ka daux dee pa kied raux ah nin, an ang koe ka daux aux mai rawm sigrit sigra ah nin, an ang koe tau mai aux, 15pingnya cuyi ang mawh pa pon liag ka khri mai mawh pa ang pon ciang tix tawx jum pingnya cuyi ka mau heue. 16An ang mawh pa pon tat jum ka khri Awphirax mai ka simaox siang raoh khankix heue. 17Khri ang ah simaox siang ang ah, ang doh sidu jum awm pingnya cuyi tix ceu kawx mai ang pon loh ka kraung khrai simaox siang mai khri nawnaw khankix heue. 18Simaox siang mai siang pa pruh riang ang pon tiag ka pingnya cuyi, grawh grawng nawh ngawh jum pingnya cuyi mawh pa kied ting lhaong khaing simaox siang raoh heue. 19Simaox siang pa koe grang kuceu khaing haktiex Ethiopia kawx ang krup ka an mai ang pon tat ngawh jum an ka khri nawnaw heue. 20“Kheu nan pingnya cuyi kaoh khaing dee mawx lie? koe dee ot krax tawng yung dee mawx lie? 21An khankix mawh pa mox khaing ngai can pa im ju khawmuik mai sim khaing raoma kawx ang chix yaox ka heue. 22Krax laux leeing mai krax yum ah nin, ex hoik mhong grawng pingnya cuyi an khankix ka yhaok tix heue 23Siyiex tawng daux krax pingnya cuyi mai Nawh Cao tawng ka dee koe pingnya cuyi heue. 24Grawh grawng nawh, Nawh Cao hoik jhak tom sidah sidu haktiex mai yaox ka can ceu pa koe greem raoma khawmuik, 25Nawh Cao tiag diag ciien bhaung mai tiag ka diag pa koe rawm awm pa khaw mai diag tix heue. 26Nawh Cao yuh been koe ka son lhiex mai phan ka krax pa tuh sah mai pluk plak praix, 27Khaix an Nawh Cao hoik yaox ka pingnya cuyi mai hoik plak sidawng, Nawh Cao khre rien ti deuh mai cheuk cheu ti yaox ka heue. 28Nawh Cao ah nin ka kawn pui, jhak heue, krax lhat graung ka Siyiex mawh pingnya#Yaog 111:10; Kab 1:7, 9:10 mai pa via khaing pa caox caig mawh krax tawng yung heue.
Currently Selected:
YAWBAX 28: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
