YAWBAX 21
21
Lox Krai Yawbax Ka Pui Caox Caig
1Khaix an Yawbax pawk lox ah nin, 2“Bre ti nghiet ka lox sikah aux mai kieh mawh pa nyawm rhawm maix heue. 3Gun rhawm maix tivud ha, sonsang sikah aux mai khaix hoik sikah aux pex sang krai patix pon ti krai heue. 4Phan mawh lox son aux mawh koe lox ngau aux piang pui lie? phan an mawh ka aux yuh ka mawh aux lai sang pon gun ka lie? 5Jhak ka aux mai pa daox deng kah, teei taix pex mai thox jheeh pex ka khaing, 6yam doh keud aux ka grawng ceu in, aux hoik yaoh kah, mai kaux hak aux hoik siyaung ka heue. 7Pui caox caig khankix pon tix im ju lang ju mai ting riang ka daux pa koe sibrawm ti yuh ka mawx lie? 8Kawn praix kix tak pang ti tau mai kix ka plak sivoe kix mai cub doeh ru kix tak yaox ti ot plak sivoe ngai kix heue. 9Nyiex kix mawh pa yiien yawg khaing krax lhat graung, khaox puat Siyiex kawx ang lai hoek piang kix heue. 10Mawie mhaing kix mhawm simie ang koe krax som nai, mawie shiang kix keh kawn ang sax laux tix geh kawx heue. 11Kix tak ploi kawn nyawm iak khankix hu awm phung yung mai kawn praix kix tak graoh thiao heue. 12Kix rhax lai mai ting plah khaox mai ting sideed maox mai koe krax gaux rhawm tau mai lox pi langhai heue. 13Kix kieh singaix sawm tix khankix nai hu daux krax magmi tix mai ka daux tivud khaing kix tak lih hu ka daux meung yum heue. 14Viang mawh nan kix kawn ah nin ka Siyiex, “Lih hu khaing yix, grawh grawng nawh yix ang lai koe rhawm tix sang tawng daux krax Maix Cao heue. 15Cao pa ting sibrawm pa sang yuh yix kaing jhaw Nawh Cao mawh pui mawx lie? Phan ex rawg bwan ka Nawh Cao sang pon ex bwan ceu patix? 16Jhak heue, sinngao kix ang lai koe ka daux tawm taix kix, krax keud pui caox caig khankix hoik singai khaing aux. 17Kawk ngu cie pui caox caig khankix yeet lawlawx, krax laux leeing tak hoek piang kix lawlawx mai Siyiex tak gwieh tix tawx krax laux rhawm tau mai krax song rhawm Nawh Cao ka kix ang mawh lie? 18Kix awm nyhee nyhawk sivoe bhaung mai awm kam pa tah bhaung ting luan dee singai lawlawx heue. 19Kix ah nin, Siyiex prawng ca phimap kawn kix kheu phimap miex keeing, ang doh mawh nan, kieh kix tawng mawh Siyiex pa prawng ca phimap cao kix heue. 20Kieh ngai nawh yaox ka krax pa laux leeing nawh mai kieh nawh nyaux ka pa song rhawm cao pa ting sibrawm heue. 21Grawh grawng nawh khix num nawh hoik sidah nawh kawn sang chix priex rien ka kawn nyiex ma tix yuh ka mawx? 22Mawh pui mawx pa koe krax tawng yung tix pon gau sawn ka Siyiex pa mawh cao prawng ka pui ankix pa ot ka dee pa lhaong lie? 23Pui tix kaux yum yam kawn naog riang rao tix, ka daux pa grum naog mai pa yiien yawg tix, 24tokaux nawh mhawm kluing mai gua si-ang nawh kawx kawn mhawm caux heue. 25Pui tang kaux yum ka daux krax pa kied kha rhawm ju tix mai ang nyang sax yaox tix cim ka priex nyawm rawm lhong heue. 26Kiex khawm ra it ka daux phawng tiex, awm paox tix mai ngaw hoik kheem ka kiex heue. 27“Jhak heue, aux tawng ka krax sawn maix khankix mai khawm grawng pa sang lud maix ka aux heue. 28Mawh kheu maix ah nin, mawh koe nyiex haw kawn lauxsimiang dee mawx lie? mai koe nyiex gox dee ot pui caox caig khankix dee mawx lie? 29Mawh ang maix nyang sax chawk ka pui pa hu krax lie? ang maix tawng ka mhai rug pa yuh kix lie? 30Grawh grawng nawh yam hoek ka daux singaix pa laux leeing, pui caox caig khankix tak pon tix luad luan mai kix tak pon krax teem kieh luan khaing krax song rhawm heue. 31Mawh pui mawx pa sang pon ciak ci kaing yuh nawh ka plak sivoe ngai nawh lie? mawh pui mawx pa sang deeh viied phimap nawh son ceu pa hoik yuh nawh lie? 32Nawh tak sang mawh pa viex hu ka daux simeeig mai cao pau simeeig an cox khre ka simeeig nawh heue. 33Lon tiex pa koe daux lung an mawh pa tie ka son nawh, pui ku kaux pa hoek khaix nawh mai pa hu sivoe nawh khankix ang lai uik simin ka heue. 34Maix ang pon tawx krax nyawm rhawm aux ka lox giex going tix khankix mai ka lox pawk pa ang koe bwanson yuh ka mawh lie?”
Currently Selected:
YAWBAX 21: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
