CAO PRAWNG 3
3
Pui Pa kawn Deuk Dau Haktiex
1Inkix mawh pui pa prah Simiang Siyiex sonsang cheuk ti yaox ka pui Isarelax khankix, pa ang nyang tawng ka grawng puing naing ka daux haktiex Khanan tix bawg kawx heue. 2In hoik mawh sonsang gau doeh ru pui Isarelax khankix tix tawng grawng naing, ka pui an khankix, pa ang nyang sax tawng grawng naing glang ka singaix an heue. 3Pui pa hoik prah Simiang Siyiex khankix, mawh simiang haktiex Philitix phwan kaux, pui Khanan, pui Sidom mai pui Hiwix khankix, pa ot ka piang gawng Lebanon, khaing gawng Balax Hamon, tom hoek ka daux dee laig kix ka veng Hamat heue. 4Mai kix mawh pa prah Simiang Siyiex sang cheuk ti yaox pui Isarelax khankix, ka grawng sang tawng Nawh Cao ka pon cu pon nghiet kix ka gumlox tawm pingnyap Simiang Siyiex, pa hoik tawm Nawh Cao ka keeing kix, ka daux tawm taix Mose heue. 5Mawh kheu nan pui Isarelax khankix, hoik ot ka daux sinax pui Khanan, pui Hetax, pui Amawrix, pui Pherazix, pui Hiwix mai pui Yebusix khankix heue. 6Kix teei ti moeng kawn bun kix khankix mai deeh tawx kawn bun ti ka kawn simex kix mai hoik yuh kaing jhaw siyiex kix heue.
Grawng Awtanelax
7Pui Isarelax khankix hoik yuh pa caox caig ka plak sivoe ngai Simiang Siyiex, kix hoik piawm Simiang Siyiex tix mai yuh kaing jhaw siyiex Balax mai krub ka Asharat heue.Asharat mawh ceu kaux siyiex bun pa krub pui baoh an heue. 8Krax pa kied song rhawm Simiang Siyiex hoik lih ka piang pui Isarelax khankix heue. Mai Nawh Cao coh kix ka Khushan Rishatem, simiang haktiex Mesopotemia mai pui Isarelax khankix yaox ti yuh kaing jhaw simiang Khushan Rishatem daix num heue. 9Yam riag yo pui Isarelax ka Simiang Siyiex, yam an Simiang Siyiex tawx cao pa taoh son kix tix kaux sonsang taoh ka kix, nawh mawh Awtanelax kawn simex Kenat pux Kaliep heue. 10Khwan singax Simiang Siyiex lih ka piang nawh mai nawh prawng see ka pui Isarelax khankix, nawh thong kix daux naing, Simiang Siyiex ap Khushan Rishatem, pa mawh simiang haktiex Mesopotemia ka daux tawm taix nawh mai nawh pex ka simiang an heue. 11Mawh kheu nan haktiex an hoik yiien yawg tix tixpon num, khaix an Awtanelax kawn simex Kenat yum daux haktiex an heue.
Grawng Ehudax
12Pui Isarelax khankix dee yuh pa caox caig ka plak sivoe ngai Simiang Siyiex, mawh kheu nan Simiang Siyiex kieh Egalon pa mawh simiang haktiex Mawbax, ting riang rao khaing pui Isarelax khankix, 13Nawh khrawm pui Amon mai pui Amaliet hoek puing ka pui Isarelax mai teei ti cie veng khaox jhie yaong khankix heue. 14Mawh kheu nan pui Isarelax yaox ti yuh kaing Egalon pa mawh simiang haktiex Mawbax kao daix num heue. 15Yam hoik riag yo pui Isarelax ka Simiang Siyiex, Simiang Siyiex deeh tawx cao pa taoh tix kaux ka son kix, pa kaux Ehudax kawn simex Gerax pui Benyamin, nawh mawh pui pa koe riang plak khawn gwiex yam an pui Isarelax khankix ap totaix ka taix nawh sonsang tawx ka simiang Mawbax heue. 16Ehudax yuh gawn pa lawm khawm ra plak pa lang tix sawk mai gieb ti deuh an ka greem kraung ceep ba viang plak khawn dawm tix heue. 17Nawh viex totaix an hoek ka Egalon simiang haktiex Mawbax, simiang Egalon mawh pui pa kied kluing heue. 18Khaix hoik tawx nawh totaix an, nawh ploi pui pa klawm totaix khankix deeh ing heue. 19Viang mawh nan nawh deeh veeh ti ing khaing rong simaox, pa koe hawt veng Gilagalax ah nin, “simiang eue, aux koe lox grawng pa mox tix krai ka maix tix ceu, ” simiang deeh ah nin, “Ot yiien yawg, ” can pa ot vung viang nawh khankix lih hu khaing nawh heue. 20Simiang Egalon ngawm ka lawg plak piang nyiex laux lee nawh tix, yam rung praix nong nong, yam an Ehudax ah nin, “Aux koe lox khaing Simiang Siyiex ka son maix, ” khaix an simiang yaog ti kaoh ngawm heue. 21Ehudax neh taix khawn gwiex tix lih, teei gawn khaing ba viang khawn dawm tix mai blung vaig simiang ka heue. 22Sidux gawn mai gawn hoik glip daux vaig mai bee hoik kheem ka piang gawn, mawh kheu nan nawh ang lai pon toek gawn lih, khaing daux vaig nawh mai roing nawh hoik lih ka plak praix heue. 23Khaix an Ehuda lih plak praix mai nyeep siviex, ka lawg plak piang khaix tix mai sau ti deuh saw heue. 24Khaix hoik lih hu nawh ka plak praix, kawncau khankix hoek ti jhak mai kix yaox hoik sau saw siviex lawg plak piang tix, mawh kheu nan kix ah nin, “Nawh kawn it mai laux lee ti ka daux lawg pa sikied nawh heue.” 25Mawh kheu nan kix pau nawh tom rheung mai ang yaox lih nawh awm bawg yam pa lih tix, mawh kheu nan kix teei saw mai paoh siviex ka mai kix yaox ka hoik goh simiang ti yum ka piang meeh nyiex heue. 26Ehudax to ti klawd glang kawn pau kix mai nawh tiang ti hu, ka plak toi rong simaox an mai hoek ka yaong Sirax heue. 27Yam hoik bleeh nawh mai nawh phlu teettawng ka piang gawng Epharem mai pui Isarelax khankix lih hu tau mai nawh, khaing piang gawng mai nawh thong kix hu heue. 28Nawh ah nin ka kix, “Hawt khaix aux Simiang Siyiex hoik ap pui koeng pex ka daux tawm taix pex, ” mawh kheu nan kix lih hawt khaix nawh mai rhim ti teei tab khankix pa koe hawt diang rawm Yawdan, pa hu kix ka haktiex Mawbax mai ang lai ploi pui tiang toi plak an tix kaux kawx heue. 29Yam an kix pah pui haktiex Mawbax tix mheen kaux, ka pui pa ting riang rao vao rhawm khankix heue. Pui tix kaux kawx ang lai pon glawd heue. 30Mawh kheu nan haktiex Mawbax hoik ot greem pa kwang pui Isarelax khankix mai haktiex hoik yiien yaog daux tixdaix num heue.
Grawng Shamga
31Khaix Ehudax, Shamga kawn simex Anat, baox lih koe tix kaux mai pah pui Philitix yum liah yieh kaux ka gawng khaox lawm pa grheu kix mawie mai nawh mawh pui pa deeh taoh ka pui Isarelax khankix heue.
Wa Common Language Bible © Bible Society of Myanmar, 2012