YAKOP 3
3
Grawh Grawng Dak
1Puxaik aux khankix eue, paw phex yuh cao gau tom nie, kheu pex hoik tawng, grawng ex tak sang nie blon pon pa prawng ca heue. 2Mawh kheu ex khawmuik sideeing caong ka tom nie ceu heue. Phan pui tix kaux kaux ang sax lud lox ah sikah krai, kaw an mawh pui pa grum mhawm mai pa chix pex khawm tokaux tix khawmuik heue. 3Phan ex sau keu ka daux jheeh brung, sonsang cu kix ka ex, ex pon kieh veeh khawm tokaux kix khawmuik heue. 4Jhak ka khawm reu khankix heue, viang kix kied ting ding dod mai bhaung ting caox phlu kix kawx, chix kieh kix veeh kheu khaox saoh sidax reu pa kied iak, dee cao kia sidax reu koe rhawm ti sang kieh hu heue. 5Awm an dak mawh pa iak ka daux kraung pakpeung tokaux kawx, jiet chix yaw chix bied heue. Jhak heue, ngu iak ceeix khaing chix kieh khix nie ding gleeing heue. 6Dak kienie, mawh ngu mai mawh phimap heue. Dak kawx awm an ka sinax kraung pakpeung tokaux ex mai nawh kieh khawm tokaux tix khawmuik seeing brai mai kieh ling alo nex nham khawmuik rup awm ngu mai ngu mawnarhok kieh dak an rup heue. 7Grawh grawng nawh totiag can pa koe ku ceu mai sim khankix mai siuing mai pa chix mu hu khankix mai khawm ceu pa koe ka daux rawm sigrit sigra khawmuik, chix kieh nge mai kawn pui hoik sax yuh kieh nge heue. 8Dak kienie, pui tix kaux kawx ang chix kieh nge. Dak mawh pa caox pa ang chix gau chix pheuk mai pa naog ka pa awp pa chix kieh yum heue. 9Ex teei dak tix mai yaog yaw ka Simiang mai Keeing Cao mai ex teei dak tix lawg jhax ka kawn pui pa hoik yuh yaung Siyiex heue.#Jah 1:26 10Ka daux jheeh tix mu khaing lih lox pa yaogyaw mai khawm pa lawg pa jhax heue. Puxaik aux khankix eue, ang khaw ti mawh nan. 11Daux rawm keut tix daux, chix lih rawm pa nyawm mai khawm rawm pa song tix dom neh lie? 12Puxaik aux khankix eue, khaox ruh chix lih tix plix, plix sanlun lie? Phan ang mawh nan nhu plix siiet chix lih tix plix, plix ruh lie? Awm an rawm kih pa khien, ang chix tix lih mawh rawm pa nyawm heue.
Pingnya Cuyi Pa Kaoh Khaing Dee Long
13Ka daux pex kaux pui mawx, mawx pa koe pingnya, pa chix tawng? Kieh nawh jhi ka daux ceu pa yuh tix pa mhawm, pa awn rhawm ka pingnya heue. 14Phan pex koe pa boh rhawm mai pa ang khaw paox tix daux rhawm, paw yaw rangdi ka tokaux tix mai pie lhen ka pa mawh meh. 15Pingnya in ang mawh pa lih hoek khaing dee long, mawh pa dex dawd mai haktiex, mawh alo nex nham mai phi caox caig heue. 16Mawh kheu dee koe pa boh rhawm mai pa ang khaw paox tix, koe pa cuci mai pa yuh ceu pa caox caig ku ceu heue. 17Pingnya pa kaoh khaing dee long phao ka tix ceu mawh pa singax, lheu khaing an pa chix khaw paox tix mai pa awn rhawm mai ceu pa yie ti gau ti glaw, pa naog ka pa caux rhawm mai plix pa mhawm khankix, pa ang jhak ka pakngai pui ti yuh tang siyox mai pa ang koe pa pie lhen heue. 18Simie ceu pa rahsee khankix, mawh pa chix yuh pa nhim, kix rhuat ka daux pa nhim heue.
Currently Selected:
YAKOP 3: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
