ISAYAX 52
52
Siyiex Taoh Veng Yerusaliem
1Veng Zion eue, siduad heue, siduad kaoh mai teei riang rao maix heue. Veng Yerusaliem, pa mawh veng pa singax singeh eue,#Jhi 21:2,27 ceep kraung pa mhawm grang maix khankix heue. Grawh grawng nawh, pui pa ang nyang pat hak tix mai pui pa ang nyang singax singeh khankix, tak ang lai hoek ka maix khaix in heue. 2Veng Yerusaliem eue, khruah ti tik phawng tiex khaing maix, yaog ti kaoh mai ngawm ka dee lhaong heue. Kawn bun veng Zion, pa mawh pui pa giex laung eue, yah maox ceng khaing ngawg maix heue. 3Siyiex ah nin “Pex hoik coh tokaux tix ka daux pa ang pon ngawh mai maix tak sang mawh pa deeh taoh ti teei ka krax pa ang yaox ti tawx mau heue.” 4Grawh grawng nawh, Siyiex ah nin, “Pui Aux khankix hoik lih hu phao voe, ka daux haktiex meung Ejiptux sonsang peung ti ot tan, khaix an, pui Asurix khankix yeen ya ka piang kix ka daux krax pa ang koe grawng koe ceu heue. 5Yam in Siyiex ah nin, pui Aux khankix hoik teei ti hu ka daux pa ang pon ngawh, Aux sang ot yuh patix tin lie? Siyiex ah nin, “Pui an kix pa kwang ka piang kix, ah lox ting lox lhaong mai ceu kaux Aux mawh pa hoik salao leeing lang singaix heue.#Ro 2:24 6Mawh kheu nan, pui Aux khankix tak tawng ka ceu kaux Aux, mawh kheu nan, kix tak tawng ka daux singaix an, ka mawh Aux, pa sikah, “Jhak heue mawh Aux heue.” 7Pui pa krai pao krax pa nhim, pui pa viex lox bwan gaux rhawm ceu pa mhawm khankix hoek, pui pa pao grawng krax taoh, ah nin, veng Zion, Siyiex maix hoik mawh simiang pa kwang. #Na 1:15; Ro 10:15; Efe 6:15 Caong kix pa viex lox bwan gaux rhawm, mawh pa mhawm grang ti yaox ka piang gawng khankix miex ding! 8Nghiet lox cao pa pao maix khankix mai kix tak yaog lox tix lih tau mai ah lai rhax tau mai paox tix heue. Grawh grawng nawh, ngai kix tak yaox yam deeh viex Siyiex veng Zion hoek heue. 9Ka dee pa hoik laux leeing veng Yerusaliem khankix eue, yo lox tix lih ka daux krax pa gaux rhawm mai ah lai rhax tau heue. Grawh grawng nawh, Siyiex hoik tawx krax pa nyawm rhawm ka pui nawh khankix, Nawh Cao hoik deeh taoh ti teei ka veng Yerusaliem heue. 10Siyiex hoik jhi plawng taix pa singax singeh Nawh, ka plak sivoe ngai ceu pui khawmuik mai pui deeh sidah haktiex khawmuik tak yaox ka bwanson krax taoh Siyiex ex heue. 11Lih hu heue, lih hu heue, lih hu khaing tan, paw hu krox hu teeh ka ceu pa ang singax, lih hu khaing daux sigreung an heue. #2Kaw 6:17Pex pa klawm kraung pa shiao Siyiex khankix eue mai kieh tix mawh pa singaix heue. 12Pex tak ang pon ti lih hu ka daux pa nied tix mai ang pon ti to hu heue. Grawh grawng nawh, Siyiex tak hu ka plak sivoe pex mai Siyiex ceu pui Isarelax tak mawh pa pau plak khaix maix heue.
Kawncau Pa Klawm Beeh Phimap
13Jhak heue, siliex Aux tak yuh kaing ka daux krax pa koe pingnya heue. Nawh tak mawh pa yaog ti ting lhaong mai tak mawh pa kied lhaong heue. 14Awm krax pa hoik daox deng pui tom nie ka Nawh, mawh kheu grang pakngai Nawh hoik nie lheu khaing pui tang kaux mai grang grao Nawh hoik nie lheu laux khaing kawn pui khankix, 15Awm an Nawh Cao tak kieh ceu pui tom nie singax heue. Simiang khankix tak nyeep jheeh tix ka Nawh heue. Mawh kheu kix tak sang yaox can ceu pa ang sax krai ka kix mai kix tak tawng sidawng ka can ceu pa ang kix sax mhong heue.#Ro 15:21
Currently Selected:
ISAYAX 52: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
