ISAYAX 2
2
Nyiex Bwan Siyiex Tak Sang Hoek
1Gumlox pa hoik pao Isayax kawn simex Amok son grawng meung Yudax mai veng Yerusaliem; 2Ka daux singaix bawg phao khaix, nyiex bwan Siyiex, tak sang pang tix ka piang choek gawng khankix mai tak sang yaog tix lhaong ka piang ton khankix mai can pui khawmuik tak lih hu ka tan heue. 3Pui khankix tom nie, tak hoek ah nin, “Hoek mai kieh ex haok ka piang gawng Siyiex, ka nyiex bwan Siyiex Yakop; Nawh Cao tak sang gau ex ka daux krax Nawh Cao mai ex tak lawng ka daux krax Nawh Cao heue. “Mawh kheu gumlox beenli tak lih khaing gawng Zion mai gumlox Siyiex tak lih hoek khaing veng Yerusaliem heue. 4Nawh Cao tak prawng ka daux sinax ceu pui khankix #Yol 3:10mai tak ah ka pui khankix tom nie kix tak lhaw vaid lawm ti mawh tothai mai deeh tawk plia ti mawh sivawg, tix meung mai tix meung tak ang lai puing puah paox tix mai kix tak ang lai yaox ti gau grawng naing tix bawg kawx heue.
Singaix Siyiex
5Nyiex ma Yokop eue, hoek mai ex hu ka daux pa riang Siyiex heue. 6Mawh kheu maix hoik tik vud ka ceu pui Maix, pa mawh cub nyiex ma Yakop, grawh grawng nawh, kix hoik mawh pa naog krax pa chix haktiex plak lih singaix kix mawh cao pa chix sibawk awm pui Philitix mai kix nyawm rhawm tau mai kawn praix haktiex tang meung khankix heue. 7Haktiex kix kawx, mawh pa naog ka mau khri mai kraung sinngao kix ang lai chix uik, haktiex kix kawx, mawh pa naog ka brung mai ling lawx naing brung kix ang lai uik simin kah heue. 8Haktiex kix kawx naog ka riang rao, kix krub ka pa yuh kix ka taix cao kix, ka pa hoik yuh kix ka gien taix cao kix heue. 9Pui khankix gup kaing tix mai pui tang yuh rhawm rhi tokaux cao tix tiem, mawh kheu nan, paw doh pluat ploi ka phimap kix. 10Laig ka daux simaox rang mai mox tix ka daux phawng tiex, khaing krax pa glhat Siyiex mai khaing min sibrawm pa ting lhaong Nawh heue.#Jhi 6:15; 2The 1:9 11Pui pa lhaong jhak khankix tak yeen tiem, pui pa ting rhawm tak gup kaing tix mai mawh Siyiex tix kaux khaing, pa yaog tix ting lhaong ka daux singaix an heue. 12Grawh grawng nawh, singaix Siyiex cao kru naing raoma, tak hoek ka piang kuceu, pa ting rhawm mai pa lhaong jhak pa tak yaox tix ka piang kuceu mai tak kieh mawh pa tiem. 13Ka piang khaox Arit Lebanon pa yaog tix lhaong khawmuik mai ka piang khaox tai Bashan khankix, 14ka piang gawng pa lhaong khawmuik mai ka piang ton pa pum tix lhaong khawmuik, 15ka piang nyiex pau tab dee lhaong ku lhang mai ka piang guh veng pa hoik kaux hoik cong ku guh, 16ka piang reu ting veng Tasux khawmuik mai ka piang reu iak pa mhawm grang khawmuik heue. 17Pui pa ting rhawm lhaong ngai tak cod rau mai pui pa ting rhawm tak yeen tiem, mawh ngie Siyiex tix kaux khaing pa yaog tix ting lhaong ka daux singaix an heue. 18Mai riang grang khankix grai grup pak lawg heue. 19Yam yaog Nawh Cao ti kaoh sonsang yung yiang ka haktiex, kix tak hu laig ka daux doh rang mai ka daux rhauk dee bieh rang khankix, kheu krax pa glhat Siyiex mai min sibrawm pa ting lhaong Nawh Cao heue. 20Ka daux singaix an pui tak tik vud ka riang rao mau mai khri pa hoik yuh kix ti krub son tokaux cao tix, ka beei mai blak khankix. 21Yam yaox Nawh Cao tix kaoh sonsang yung yiang ka haktiex, kix tak hu laig ka daux doh rang mai ka daux rhauk dee bieh rang khankix, kheu krax pa glhat Siyiex mai min sibrawm pa ting lhaong Nawh Cao heue. 22Paw lai een rhwm ka kawn pui pa toek bhawm ka daux meeh tix, nawh mawh patix lie?
Currently Selected:
ISAYAX 2: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012