ISAYAX 14
14
Krax Caux Rhawm Piang Pui Yakop
1Siyiex koe krax caux rhawm ka ceu pui Yakop mai tak sang laug ti teei ceu pui Isarelax khankix mai deuh kix ot ka daux haktiex cao kix, mai pui tang meung tak hoek ti yuh paox pie mai kix, kix tak kap ti ot tau mai ceu pui Yakop heue. 2Pui tang ceu tak teei kix mai tawx dee ot kix mai ceu pui Isarelax tak sang teei ti cau kix, sonsang mawh siliex simex siliex bun tix ka daux haktiex Siyiex heue. Kix tak deeh giex gang ka pui pa hoik gang ka kix mai pui pa tuktiak ka kix, kix deeh tuktiak ka kix mai kwang ka piang kix heue.
Grawng Som Nai Simiang Veng Babulon
3Bawg yam an Siyiex tak sang teei maix lih khaing pa nu pa khawm mai pa laux rhawm mai krax pa thux pa khin mai pui maix mawh siliex pa yuh kaing pa nu; 4Maix tak sang teei ti viex gumlox kab in hoek ka simiang Babulon ah nin, “Pui pa yeen ya piang pui hoik deek die veng khri kawx hoik deek die; 5Siyiex hoik raig pot ka khaox grix pui pa caox caig mai gawng khaox pa giex cao kwang haktiex khankix, 6pa hoik sivied pui khankix ka daux krax pa song rhawm mai krax pa sivied jheung jheung, pa hoik kwang ceu pui khankix ka daux krax pa song rhawm, yuh krax pa tuktiak mai koe pui mawx pon tieb tie kah. 7Haktiex khawmuik koe krax pa laux lee mai krax pa yiien yawg mai kix gaux rhawm mai ah lox lai rhax sinum heue. 8Khaox gix mai khaox Arit Lebanon khankix gaux rhwm ah nin, glang khaix hoik kid maix goh, pui kid khaox ang lai pon ti deeh hoek ka ex pie tix kaux kawx heue.” 9Meung yum plak greem hoik yaox rhawm rhi maix, ka grawng maix, sonsang sipub ti yaox maix ka bawg yam bleeh maix tix hoek, kheu maix hoik so cao kaing meung yum haktiex an khankix, can pa mawh simiang haktiex khawmuik hoik yaog ti kaoh khaing dang ngeung pa ngawm tix heue. 10Kix khawmuik tak sang krai mai ah nin ka maix, mawh hoik lih maix ti mawh pa iak riang iak rao awm yix lie? Mawh hoik lih maix ti awm yix lie? 11Min sibrawm maix mai khawm lox sinum ting maix khankix hoik viex ti laig ka daux meung yum, pa tawm tix ka greem maix mawh graik, pa lhop ka piang maix mawh ngaw heue.
Grawng Rau Kawncau Lusifa
12Simuing griang ngawb mai kawn simex ponngawb eue, maix hoik rau khaing raoma yuh ka mawx! #Jhi 8:10 maix pa yuh krax tuktiak ka ku meung khankix eue maix lai hoik kid ti goh ka piang tiex yuh ka mawx! 13Maix hoik ah nin ka daux rhawm tix, aux tak sang haok ka piang raoma heue. Aux tak sang yaog dang ngeung aux deuh ka piang simuing Siyiex khankix, aux tak sang ngawm ka piang gawng pui hun pa kied singai plak laong heue. 14Aux tak sang haok plak piang dee lhaong paiawm khankix, aux tak sang mawh pa awm cao pa ot dee pa kied lhaong heue.” 15Viang mawh nan maix tak sang mawh pa rau ka daux meung yum,#Mat 11:23; Luk 10:15 ka daux simeeig pa kied raux heue. 16Can pui pa yaox ka maix khankix, jeung ngai tix jhak ka maix ka daux krax pa daox pa deng mai keud ti yaox grawng maix ah nin, “Mawh in pui pa hoik yuh haktiex sikua, pa hoik yung yiang yuh meung haktiex an khankix, 17pa hoik kieh haktiex awm daux tiagtu mai hoik kieh veng khankix laux leeing, pa ang ploi pui ot daux thawng deeh ing ka nyiex tix mawh kaw in lie? 18Simiang haktiex ceu pui khankix mai kix tak it ka daux simeeig min pakngai tix, ku kaux ku pui heue. 19Phan mawh maix hoik tik khaing daux simeeig maix, pa awm kak khaox pa seeing brai, awm kraung ceep pui pa hoik yum, pa suat tix ka lawm vaig mai pa rau ka daux simeeig lon simaox an khankix, awm tokaux pui yum pa hoik dig greem caong tix heue. 20Maix tak ang pon tix sipaung tau maix kix, grawh grawng nawh maix hoik laux leeing yuh haktiex cao maix mai hoik pah ka pui tix khankix heue. Kawn praix pa yuh ceu pa caox khankix, tak ang pon ti sum ceu kaux heue. 21Khre rien grawng krax pah son kawn praix nawh, kheu jao phimap phighram keeing kix heue. Phan ang yuh nan, ha kix yaog ti kaoh mai teei ti cie haktiex an mai naog yuh piang haktiex ka veng khankix heue.”
Grawng Laux Leeing Veng Babulon
22Siyiex Cao kru naing raoma ah nin “Aux tak sang yaog ti deeh tieh feen ka kix mai yieh ti tik kix khaing veng Babulon, khawm min ceu kaux mai pa kawn deuk khankix mai khawm kawn saux kawn sex kix, Siyiex ah nin heue. 23Aux tak sang baox yuh an mawh dee ot goh, mai yuh mawh dee dung rawm daux bing khankix, Aux tak sang khawt ti tik laux leeing, Siyiex cao kru naing raoma ah nin heue.
Haktiex Asurix Laux Leeing
24Siyiex cao kru naing raoma hoik tiextu ti ah nin, awm krax pa keud Aux yuh ka mawx mai an tak sang mawh yuh nan heue. Awm krax pa keud pa bak aux yuh ka mawx mai an tak sang cung yuh nan heue. 25Aux tak sang raig ti tik pui Asurix #Isa 10:5-34; Na 1:1—3:19; Ze 2:13-15khankix khaing daux haktiex Aux mai dig nawh greem caong tix ka piang gawng Aux heue. Gah khaox glawm nawh khaing ceu pui Isarelax mai tah beeh cien khaing piang klip kix heue. 26In mawh krax keud krax sawn pa hoik keud ti sang yuh ka haktiex khawmuik mai in mawh khawn taix pa hoik nyeu tix lih ka piang ceu pui ku meung khawmuik heue. 27Mawh kheu Siyiex Cao kru naing raoma, hoik keud hoik sawn ti deuh an kix, mawh pui mawx pa sang pon yieh ti tik lie? Khawn taix Nawh Cao hoik nyeu tix lih mai mawh pui mawx pa sang pon kieh deeh yawn tix lie?
Haktiex Philitix Laux Leeing
28In mawh gumlox pa plak jhi hoek ka daux num yum Akhat heue.#2Sim 16:20; 2Been 28:27 29Pui haktiex Philitix khawmuik eue,#Ye 47:1-7; Yez 25:15-17; Yol 3:4-8; Amo 1:6-8; Ze 2:4-7; Zak 9:5-7 paw koe krax gaux rhawm ka hoik pot, gawng khaox pa hoik sivied ka maix awx, mawh kheu khaing num riah ceu siuing khankix, siuing pa koe jai tak bleeh ti hoek mai kawn nawh tak mawh siuing ngu pa chix po heue. 30Kawn Ai pui pa hot pa shia khankix tak yaox ti ih mai can pa koe krax cud cha khankix tak yaox ti it yiien yawg heue. Aux tak pah num riah maix khankix ka krax sibhawm praix mai pa kawn deuk maix khankix tak sang mawh pa pah yum heue. 31Siviex eue, ngia heue, veng eue yiiem yo heue, pui haktiex khawmuik eue maix hoik daox hoik aw heue, mawh kheu taox ngu tak sang hoek khaing plak laong mai cub nawh ang koe pa tang ot nong nong heue. 32Mawh pui mawx pa tak sang pon pawk lox ka pui cau haktiex an khankix lie? Siyiex hoik pang ti deuh veng Zion mai pui hot pui shia ceu pui Nawh Cao khankix tak peung ti ot ka daux veng an heue.
Currently Selected:
ISAYAX 14: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
