HEBRIE 5
5
1Grawh grawng nawh cao giex kaing li pa ting ku kaux, pa hoik laug ti teei khaing ka daux kawn pui, hoik ciak ti deuh son kawn pui, ka grawh grawng ceu pa dex dawd ka Siyiex, sonsang mawh nawh cao tan ka totaix mai ceu pa tan khankix son phimap heue. 2Nawh mawh pa chix gun yeung ka pui pa ang tawng mai ka pui pa lud khankix mhawm mhawm, kheu khawm tokaux nawh kawx mawh pa iak riang, 3mawh kheu jao an nawh kawx tak lai tan ceu pa tan son phimap tokaux tix, awm pa tan nawh son phimap kawn pui tang kaux khankix heue.#Krub 9:7 4Pui tix kaux kawx ang tang pon teei ka ara pa koe min pakngai an nong nong, pon ti teei ngie yam kok Siyiex ka nawh, awm pa hoik kok ka Arun heue.#Lih 28:1 5Awm an viang Cao Khrit kawx ang lai tang yaog tokaux tix ting nong nong, ti mawh cao giex kaing li pa ting, mawh Kaw pa hoik ah nin ka Nawh, “Maix mawh kawn simex Aux, Aux hoik kieh Maix keh ka daux singaix in heue.”#Yaog 2:7 6Awm pa hoik ah Nawh Cao nin tang dah, “Maix mawh Cao giex kaing li tom leeing ju, awm pa khaw mai ara Melakhizediek.”#Yaog 110:4
7Ka daux bawg yam singaix pa ot Cao Khrit ka daux nex nham, Nawh kok yo lox ting mai roik rawm ngai, rawg bwan mai khyox khaw ka Kaw pa chix taoh Nawh khaing krax yum,#Mat 26:36-46; Mak 14:32-42; Luk 22:39-46 hoik nghiet ka lox Nawh an kheu chix nab yam Nawh 8viang Nawh mawh Kawn tete kawx, Nawh hoik gau ti chix cu nghiet ka ceu pa kham geu Nawh khankix, 9mai khaix hoik kieh Nawh grum mhawm, Nawh Cao tom lih mawh Cao pa yuh krax taoh leeing ju, ka son can kix pa cu nghiet ka Nawh khawmuik, 10Siyiex hoik sum ceu kaux Nawh mawh cao giex kaing li pa ting, awm pa khaw mai ara Melakhizediek heue.
Kieh Pui Lud Rien Rhawm Tix
11Ex koe lox sang krai grawng Nawh tom nie ceu, pa mawh ceu pa kied nu ti tawng dee bleeh, mawh kheu hoik lih mawh pex pa ang hiex chix nghiet mhong heue. 12Phan keud grawng pa hoik luan bawg yam jih jang glang gleeing, pex khaw ti uik mawh cao gau, viang mawh nan pex baox deeh lo cao pa gau pex ka num lox lai beenli Siyiex khankix mai pex hoik lih mawh pa lo rawm teeih mai pa ang lo pa ih pa mawh to heue. 13Grawh grawng nawh pa ih rawm teeih ku kaux daux pui ang lai tawng ka gumlox pa rahsee, mawh kheu mawh nawh kawn ngie heue.#1Kaw 3:2 14Pa ih pa mawh to, mawh son pui pa uik grum die huan, pa mawh kix pa sax shiao ka kraung grang dee chix tawng kix, tom hoik gau ti chix gwieh ti tawng, mawh pa yuh ka mawx, mawh pa mhawm mai pa ang mhawm heue.
Currently Selected:
HEBRIE 5: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
