HABAKUK 2
2
1Aux tak cung dee pau mai pau ka piang grah dee pau tix mai pau ti jhak ceu pa sang ah Nawh Cao ka aux, ceu pa sang deeh pawk aux ti ah yuh ka mawx heue.
Rahsee Kheu Krax Yum Rhawm
2Siyiex deeh pawk lox aux ah nin, tiiem ti deuh riang susai ankix mai kieh mawh pa sidawng ka piang phia sonsang kieh pui pa to pon ti phat heue. 3Grawh grawng nawh, riang susai an mawh pa kawn krox jun bawg yam pa hoik tat ti deuh son nawh, hoik dex hoek bawg yam sidah, mai ang lai koe krax pie lhen heue. Viang mawh pa rheung kawx caw ti krox jun heue. Grawh grawng nawh, mawh pa tak sang hoek tete, tak ang lai rheung heue.#He 10:37 4Jhak heue, pui pa lhaong rhawm rhi ang lai koe rhawm rahsee ka daux nawh, mawh ngie pui pa rahsee, tak sang im ju kheu krax yum rhawm heue. #Ro 1:17; Ka 3:11; He 10:38
Krax Kha Rhawm Pui Caox Caig
5Kheu rawm plix siiet nawh koe krax pie lhen, nawh mawh pui pa lhaong rhawm lhaong rhi mai ang ot ka daux nyiex heue. Mawh kheu kied yuh nawh rhawm tix va awm meung yum mai nawh mawh pa awm krax yum mai ang lai pon ti koe krax pa fah rhawm fah rhi, nawh kraix khrawm ceu pui khankix khawmuik hoek ka tokaux tix mai pum ti deuh pui khankix khawmuik ka nawh heue. 6Mawh ang pui an kix khawmuik, sang mawh pa teei lox tiag ka nawh mai lox been prim mai salao ka nawh, ah nin, pui pa yuh krax haok hwan, ka kraung ceu pa ang tie mawh cie nawh rheung miex grheung lie? Mai ka nawh pa teei kraung tang pui tom nie sonsang mhawm tokaux tix koe krax kha rhawm heue. 7Mawh ang pui pa teei maix rao mau ka sang yaog ti kaoh sijaox lie? Mawh ang pui pa yuh krax tuktiak maix khankix sang siduad lie? Mai Maix tak sang lih ti mawh kraung pa tud pa rhim kix heue. 8Mawh kheu hoik tud rhim maix ka ceu pui khankix tom nie, can pui pa kawn deuk an khawmuik, tak sang deeh tud rhim ka maix, kheu maix jah yuh nham pui khankix mai krax pa lang teung kin yuh maix ka haktiex mai veng mai can pui pa ot ka daux an khawmuik heue. 9Pa khrawm kraung khrai pa caox ka daux nyiex son tix pa yuh mheem tix ka dee pa lhaong, sonsang pon nawh ti luan khaing krax pa laux leeing koe krax pa kha rhawm heue. 10Maix hoik tawx krax keud sawn pa kaig tua ka nyiex tix, pa tat ti tik pui khankix tom nie mai hoik lud ka ju maix heue. 11Lon simaox ka daux ding tak sang riag yo lox tix lih mai khaox lat nyiex khankix, tak sang deeh pawk lox heue. 12Pa sum guh veng ka krax pa jauh nham, pa pang ti deuh veng ka krax pa lud koe krax kha rhawm heue. 13Jhak heue, ang in mawh pa kaoh khaing Siyiex lie? Ka pa mawh ngu pa gleeing kaing pa yuh pui khankix mai ka pa mawh krax pa taug pa mao ceu pui khakix pa giex going heue. 14Grawh grawng nawh, haktiex tak sang mawh pa naog ka pingnya cuyi min plakngai Siyiex, awm naog rawm ka rawm sigrit sigra heue.#Isa 11:9 15Pa tawx paox plawg tix nyaux plai, pa baox saix ka daux mai kieh kix nyaux ti yoek, sonsang pon ti yaox ka pa ot ka kaung kix, koe krax kha rhawm heue. 16Maix hoik naog ka krax pa kaig tua, ang koe min plakngai heue. Maix kawx deeh nyaux mai jhi tix awm pui pa ang nyang bax pat hak tix heue. Kawk nyaux plak taix khawn dawm Siyiex, tak sang mawh pa deeh hoek ka maix mai min plakngai maix tak deeh tieh ti mawh krax kaig tua pa kied ting heue. 17Krax kin pa hoik yuh maix ka gawng Lebanon tak sang kheem ti deuh maix mai krax laux ju totiag an khankix, pa hoik kieh kix koe krax lhat graung kheu jao nham pui mai krax kin pa yuh ka haktiex mai veng mai can pui pa ot ka daux an khankix heue. 18Riang grang pa hoik saik pui ti yuh koe khankix koe bwanson patix? Riang rao pa hoik raug ti mawh cao gau krax pie lhen, cao pa raug ti yuh een, rhawm tix ka riang grang pa ang chix sikah an, koe bwanson patix lie? 19Pa ah nin ka khaox riang grang khankix, Siduad heue. Pa ah nin ka simaox pa ang chix sikah khankix yaog ti kaoh koe krax kha rhawm heue. Ankix khex sang chix gau pui lie? Jhak heue, An mawh pa hoik om tix ka rawm khri mai rawm mau mai ka daux an ang koe krax pa toek bhawm im ju heue. 20Siyiex ot ka daux nyiex bwan singax singeh Nawh Cao heue. Kieh pui haktiex khawmuik ot yiien yawg tix ka plak sivoe Nawh Cao heue.”
Currently Selected:
HABAKUK 2: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012