YAM JAH 48
48
Yakop Nawb Bwan Piang Yosiep
1Yam in khaix hoik luan bawg yam ceu inkix, kix krai Yosiep mhong grawng keeing nawh ah nin, “Keeing maix kied saux tete heue.” Nawh viex kawn simex tix ra kaux, Manashe mai Epharen hu heue. 2Pui krai Yakop mhong, ka hoek kawn simex nawh, “Jhak heue, kawn simex maix Yosiep hoek ka maix phao” Isarelax teei riang tix mai kaoh ngawm piang ku it tix heue. 3Yakop ah nin ka Yosiep, “Siyiex pa ting sibrawm hoik lih bleeh ka aux, ka veng Luza daux haktiex Khanan mai nawb bwan ka aux, 4“ah nin ka aux, Jhak heue, Aux tak sang kieh maix pre haoh hun mai kieh ru maix lih mawh ceu pui tom nie mai Aux tak tawx haktiex in ka doeh ru maix mai mawh cie kix leeing ju khaix maix heue.#Jah 28:13-14 5“Yam in kawn simex maix ra kaux, Epharem mai Manashe, pa pon maix, daux haktiex Ejiptux, sivoe hoek aux ka maix daux Ejiptux tin, caw ti mawh kawn simex aux, awm Rubin mai Simion heue.” 6Kawn praix pa baox pon maix khaix in, tak mawh kawn praix maix, maix tak kok kix, ka greem ceu kaux puxke kix, son sinngao kix heue. 7“Yam hoek aux khaing Padan-aram, Rakhelax yum hawt krax meung Khanan, dex hoek ka Epharat, mai aux sipaung kiex tan dex krax hu ka veng Epharat”, Epharat#Jah 35:16-19 pa mawh Bieliehiem in singaix heue.” 8Yam yaox Isarelax ka kawn simex Yosiep khankiex, nawh chawk ah nin, “In kiex mawh pui mawx lie?” 9Yosiep ah nin ka keeing tix, “Kiex mawh kawn simex aux, pa tawx Siyiex ka aux ka dee in” nawh ah nin, “Viex kiex hoek ka aux, aux tak sang nawb bwan ka kiex heue.” 10Yam in ngai Isarelax ang lai chix yaox kheu hoik riex ju nawh, Yosiep viex kiex hoek dex nawh mai nawh kawm tix ngheet kiex heue. 11Isarelax ah nin ka Yosiep, “Aux keud ti ang lai yaox ka pakngai maix, yam in, Siyiex hoik jhi aux yaox khawm kawn praix maix heue.” 12Khaix an Yosiep teei kiex lih khaing ngawng nawh mai nawh gup pakngai ti piang tiex heue. 13Yosiep teei kiex khawm ra kaux mai teei taix khawn dawm tix, giex ka Epharem mai deuh khawn gwiex Isarelax mai nawh teei taix khawn gwiex giex ka Manashe mai deuh dex plak khawn dawm Isarelax heue. 14Isarelax neh taix khawn dawm tix mai deuh piang kaing Epharem pa mawh pux mai taix khawn gwiex tix piang kaing Manashe, viang nawh tawng Manashe mawh kawn Ai kawx heue. 15Nawh nawb bwan ka Yosiep ah nin, “Siyiex pa dawg koe pa krub keeing aux Abraham mai Icak, Siyiex pa tawx pa ih ka aux leeing ju, tom hoek in singaix, 16kawncau Siyiex pa taoh aux khaing pa caox caig, nawb bwan ka kawn nyawm in kiex mai kieh ceu kaux aux, ceu kaux keeing aux, Abraham mai Icak koe piang kiex mai kieh kiex ting lhaong, haok hwan tom nie piang haktiex in heue.” 17Yam yaox Yosiep keeing ti deuh taix khawn dawm nawh piang kaing Epharem, nawh ang nyawm rhawm ka mai nawh sang teei taix keeing khaing kaing Epharem mai gah ti deuh piang kaing Manashe heue. 18Yosiep ah nin ka keeing tix, “Keeing aux eue, ang caw, mawh kheu mawh in kawn Ai, deuh taix khawn dawm maix piang kaing nawh liak” 19mai keeing nawh thiang ah nin, “Kawn simex aux eue, aux tawng, aux tawng, nawh tak lih ti mawh ceu pui pa ting tix cub, viang mawh nan, pux nawh, tak nie lheu ting khaing nawh mai doeh ru nawh khankix tak lih ti mawh ceu pui ku cub heue.” 20Nawh nawb bwan ka kix#He 11:21 daux singaix an ah nin, “Mawh kheu maix pui Isarelax tak pon bwanson, kieh Siyiex kieh maix awm Epharem mai Manashe” Mawh kheu nan, nawh yaog Epharem ting sivoe Manashe heue. 21“Khaix an Isarelax ah nin ka Yosiep, “Jhak heue, hoik hoek bawg yam dex sang yum aux, viang mawh nan Siyiex tak ot tau mai pex, mai tak deeh viex pex hoek ka haktiex keeing pex tix bawg heue. 22Lheu khaing an, aux tak tawx haktiex Shekhem ka maix pa pon teei ka lawm vaig mai ak, khaing daux tawm taix Amawrix, lheu khaing pa tawx aux ka puxke maix heue.”
Currently Selected:
YAM JAH 48: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
