YAM JAH 42
42
Puxaik Yosiep Hu Meung Ejiptux
1Yam mhong Yakop koe nghox daux Ejiptux, Yakop ah nin ka kawn simex tix khankix, “Yuh ka mawx, pex lai jhak paox tix, tix kaux lai tix kaux?” 2Mai nawh ah nin, “Aux hoik mhong koe nghox daux meung Ejiptux tete; hu ka dee an mai liag ti viex nghox son ex, sonsang im ju ex mai ang yaox ti yum ka heue.”#Cau 7:12 3Puxke Yosiep kao kaux hu meung Ejiptux sonsang liag kix nghox heue. 4Yakop ang kieh Binyamin, pux Yosiep, hu mai puxke nawh khankix, kheu lhat nawh ceu pa kha rhawm hoek piang nawh heue. 5#Cau 7:11 Kawn simex Isarelax khankix, hu liag nghox tau mai pui hoek liag nghox, mawh kheu sibhawm praix hoik lih ka daux haktiex Khanan heue. 6Yosiep mawh cao kwang ka haktiex, mai nawh mawh cao coh nghox ka pui haktiex, puxke Yosiep khankix hoek mai gup ngai tix piang tiex sivoe ngai nawh heue. 7Yosiep yaox ka puxke tix khankix mai tawng ka kix, viang mawh nan nawh yuh ti ang tawng mai briah ka kix ah nin, “Kaoh pex khaing dee mawx?” Mai kix ah nin, “Yix kaoh khaing haktiex Khanan, sonsang liag pa ih.” 8Viang Yosiep tawng ka puxke nawh khankix kawx, kix ang lai tawng ka nawh heue. 9Yosiep doh keud ka camaox tix, pa hoik camaox nawh grawng kix#Jah 37:5-10 ah nin ka kix, “Pex mawh pui hoek ti jiang ka ceu pa iak riang yix, daux haktiex in heue.” 10Kix ah nin ka nawh, “Simiang eue, ang doh mawh nan, yix mawh kawncau maix pa hoek ti liag pa ih khaing. 11Yix mawh kawn keeing tix kaux khaing, yix mawh pui rahsee, kawncau maix inkix ang mawh pui jiang.” 12Nawh ah nin ka kix, “Ang mawh, pex hoek ti jhak ceu pa iak riang daux haktiex in.” 13Kix ah nin, “Yix pa mawh kawncau maix, koe puxaik kao ra kaux mai mawh kawn keeing tix kaux khaing daux haktiex Khanan, pux ghoik ot mai keeing yix tom yam in mai an tix kaux ang lai koe heue.” 14Yosiep baox ah nin ka kix, “Hoik mawh awm pa ah aux ka pex, pex mawh pui jiang. 15Tak yaox ti cheuk cheu ka pex, phan pex ang viex pux ghoik tix hoek, awm im ju Pharaw, pex tak ang lai yaox ti lih khaing tin heue. 16Ploi pui tix kaux daux pex ing mai kieh nawh viex pux pex hoek, pex pa kawn deuk, tak sau daux thawng, awm im ju Pharaw, lox krai pex, mawh ang mawh, tak cheuk ti yaox ka, pex rug mawh pui jiang heue.” 17Nawh sau kix daux thawng loe singaix heue. 18Khaix hoik naog loe singaix, Yosiep ah nin ka kix, “Yuh awm in sonsang im ju pex, kheu mawh aux pui lhat graung ka Siyiex, 19phan pex mawh pui rahsee, kieh puxaik daux pex tix kaux kaux ot daux thawng, kieh pui deuk khankix viex nghox ing ka nyiex pex, dee sibhawm praix, 20viex pux ghoik pex hoek ka aux, sonsang tawng aux rug mawh lox pex pa mawh meh mai pex tak ang yaox ti yum.” Mai kix yuh awm an heue. 21Khaix an kix ah nin ka paox tix, “Ex hoik lud ka pux tix tete, grawh grawng nawh, ex hoik yaox krax kha nawh rhawm tix mai yam khyox khaw nawh ka ex, ex ang nghiet, mawh kheu nan, krax pa kha rhawm in hoik hoek piang ex phao heue.” 22Rubin deeh ah nin ka kix, “Aux hoik krai ka pex paw yuh phimap pa lud ka kawn nyawm#Jah 37:21-22 in, ang mawh lie?, viang mawh nan, pex ang nghiet. Mawh kheu nan, krax ciyang son nham nawh hoik hoek piang ex phao heue.” 23Kix ang tawng Yosiep hoik tawng ka pa krai tix, mawh kheu sikah Yosiep mai kix, ka pui pa toe lox heue. 24Nawh veeh ti hu khaing kix mai yiiem; mai nawh deeh hoek sikah mai kix. Nawh teei Simion khaing kix mai phyawk nawh sivoe ngai kix heue.
Puxaik Yosiep Ing Meung Khanan
25Yosiep tawx lox mai kieh kix sau nghox naog daux chee mai deeh sau mau cie mawx cie an, daux chee kix mai kieh tawx pa ih kix son daux krax mai kix yuh awm an heue. 26Khaix an kix tang nghox piang la mai lih hu heue. 27Ka daux kix ti kaux, paoh chee cie tix, sonsang tawx la sawm, dee bang kix, nawh deeh yaox mau cie tix ka daux moing chee, 28mai nawh ah nin ka puxaik tix khankix, jhak pex yaox mau aux hoik deeh sau ti daux moing chee aux!” Kix siyaoh lhat graung ah nin ka paox tix, tix kaux lai tix kaux, “Pa yuh Siyiex ka ex in, mawh pa yuh ka mawx lie?” 29Yam bleeh kix ka keeing tix Yakop daux haktiex Khanan, kix krai nawh mhong grawng pa hoik lih mawh ka kix ah nin, 30“Pui pa mawh simiang daux haktiex an, briah ka yix mai ah yix mawh pui hoek jiang ka haktiex. 31Yix ah nin ka nawh, yix mawh pui rahsee, yix ang lai mawh pui jiang, 32yix mawh puxaik kao ra kaux, pa mawh keeing tix kaux khaing, an tix kaux ang lai koe mai pux ghoik yix ot mai keeing yix, tom yam in daux haktiex Khanan heue. 33Kaw an pa mawh simiang ka haktiex an, ah nin ka yix, sonsang tawng aux mawh pex pui rahsee, prah pui tix kaux, daux puxaik pex ka aux mai teei pa ih son nyiex ma pex pa yaox ka sibhawm praix mai lih hu heue. 34Viex pux ghoik pex hoek ka aux, sonsang tawng aux ang pex mawh pui jiang mai tawng pex mawh pui rahsee, aux tak deeh ap ka puxaik pex mai pex tak yaox ti yuh lai geu daux haktiex in heue.” 35Yam thawk kix chee ti, kix daox deng ka deeh yaox ka gie mau cie mawx cie an daux chee tix, yam yaox kix mai keeing kix gie mau an, kix yaoh ka heue. 36Keeing kix Yakop ah nin ka kix, “Pex hoik rhim ti teei kawn aux khankix khaing aux, Yosiep kawx ang lai koe mai Simion kawx ang lai koe, yam in pex kawn sang deeh viex Binyamin, ceu in hoik mawh pa tug ka aux heue.” 37Khaix an Rubin deeh krai ah nin ka keeing tix, phan aux ang lai deeh viex Binyamin hoek ka maix, pah ka kawn simex aux khawm ra kaux, ap nawh daux taix aux mai aux tak deeh viex nawh hoek ka maix heue. 38Yakop ah nin, “Ang aux doh tawx kawn simex tix hu tau mai pex, kheu hoik yum puxke nawh mai kawn deuk nawh nong nong. Phan pa caox lih ti mawh ka nawh, daux krax hu pex, pex tak viex hauk kaing paing aux laig daux simeeig tau mai krax laux rhawm heue.”
Currently Selected:
YAM JAH 42: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
