YAM JAH 38
38
Grawng Yudax Mai Tama
1Yam an, Yudax gwieh ti hu khaing puxaik nawh khankix, hu ot mai ceu pui Adulan tix kaux pa kaux Hirax heue. 2Yudax yaox kawn bun ceu pui Khanan pa kaux Shua mai nawh teei tix moeng heue. 3Nawh koe kaux mai keh kawn simex tix kaux, nawh kok ceu kaux nawh mawh Erax heue. 4Nawh baox koe kaux mai keh kawn simex tix kaux mai nawh kok ceu kaux nawh mawh Awnan heue. 5Nawh baox koe kaux mai keh kawn simex tix kaux mai nawh kok ceu kaux nawh mawh Shelax. Nawh ot daux veng Khezip yam keh tix Shelax heue. 6Khaix an Yudax teei kawn Ai tix Erax koe moeng tix kaux mai ceu kaux nawh mawh Tama heue. 7Viang mawh nan, kawn Ai Yudax pa mawh Erax yuh pa caox caig ka sivoe ngai Simiang Siyiex mai Simiang Siyiex pah nawh yum heue. 8Yudax ah nin ka Awnan, “Hu ka moeng puxke maix mai teei ti moeng, sonsang deeh plud doeh puxke maix heue.” 9Viang mawh nan, Awnan tawng ka kawn an, ang lai yaox ti kok mawh kawn tix yam hu it nawh mai moeng puxke tix, nawh kieh rawm ngang tix lih piang tiex, mawh kheu ang rhawm kieh kawn tix plud ka doeh puxke tix heue. 10Can pa yuh nawh, Siyiex ang lai khaw rhawm, mawh kheu nan, Nawh cao baox pah nawh yum heue. 11Khaix an Yudax ah nin ka mun tix Tama, “Ing ot awm miex mai ka nyiex keeing maix, glang ang kawn simex aux Shelax nyang ting” mawh kheu lhat Yudax Shelax yum awm puxke tix khankix, mawh kheu nan Tama lih hu mai deeh ot ka nyiex keeing tix heue. 12Khaix hoik rheung bawg yam, kawn bun Shua pa mawh moeng Yudax yum, Yam hoik deeh nyawm rhawm nawh, Yudax hu ka pui pa rhip hauk yung tix, daux veng Timanax tau mai paox grawm tix Hirax, ceu pui Adulan heue. 13Pui krai ka Tama ah nin, “Jhak heue, paox maix hoik hu sonsang rhip hauk yung ka veng Timanax heue.” 14Nawh peeik kraung ceep miexmai mai kheem tix ka man tawb ngai mai lhop ka tokaux tix mai nawh ngawm plak krax laig ka veng Timanax, kheu hoik yaox nawh ting Shelax mai nawh ang nyang bax yaox ti mawh moeng Shelax heue. 15Yam yaox Yudax ka nawh, Yudax keud nawh mawh bun coh kaux, kheu kheem nawh pakngai tix heue. 16Khaix an nawh hu ka nawh praok krax tan ah nin, “Kieh aux hoek ka maix” mawh kheu ang Yudax tawng mawh nawh mun tix heue. Bun an ah nin, “Phan maix sang hoek ka aux, sang tawx maix, patix ka aux lie?” 17Yudax ah nin, “Aux tak tawx kawn pex ka maix tix mu khaing tobrie aux heue.” Nawh baox ah nin, “Sivoe ang maix nyang bax tawx ceu an, pon tawx maix aux priex kraung sakse tix ceuceu lie?” 18Nawh ah nin, “Sang kieh maix aux tawx kraung sakse ceu pa yuh ka mawx ka ti lie?” Nawh deeh pawk lox ah nin, “Tang maix deuh cum tix, maox rawd nyoi tix mai khaox gix tix, khankix pa koe daux tawm taix maix heue.” Mawh kheu nan nawh tawx ceu ankix ka nawh mai hu it tau mai nawh, bun an koe kaux heue. 19Khaix an bun an kaoh hu mai peeik man tawb ngai tix mai deeh ceep ka kraung ceep miexmai heue. 20Sonsang deeh teei Yudax kraung pa hoik tang tix ka bun an, nawh ploi paox grawm tix, ceu pui Adulan hu tawx kawn pex ka nawh, viang mawh nan, nawh ang yaox ka bun an heue. 21Nawh chawk ka pui pa ot baoh an ah nin, “Bun pa coh kaux an, pa yie ot praok krax tin, ot dee mawx?” kix deeh ah nin, “Bun pa coh kaux ang koe tin tix kaux kawx heue.” 22Nawh deeh ing ka Yudax ah nin, “Ang aux yaox nawh, pui pa koe baoh an kawx, krai ka ang bun coh kaux koe tan heue.” 23Yudax ah nin, aux hoik tawx kawn pex in mai maix ang tie yaox ka nawh, kieh nawh teei ti cie kraung khrai an khankix mawh kheu lhat ex tix kaig tua ka jao an heue. 24Khaix hoik luan loe khix, kix krai Yudax mhong ah nin, “Mun maix Tama, hoik yuh bun coh kaux, lheu khaing an nawh hoik koe kaux kheu sipiag yuh ti bun coh kaux” Yudax ah nin, viex nawh lih ka praix mai gleeing nawh heue.” 25Yam viex kix Tama lih ka praix, nawh tawm lox mai sipaox kraung ka paox tix, ah nin, “Kraung in mawh cie pui mawx? aux hoik koe kaux mai nawh heue.” mai nawh baox ah nin, “Yuh bwanson jhi aux yaox, cao kraung inkix, pa mawh cum mai maox rawd nyoi mai khaox gix heue.” 26Khaix an Yudax tawng kraung an mawh cie tix ah nin, “Nawh hoik nie rahsee khaing aux, kheu ang aux tawx kawn simex tix Shelax ka nawh” Yudax ang lai dex mai nawh khaix an heue. 27Khaix an yam hoek bawg yam sang keh Tama, jhak heue, kawn brawm koe daux vaig nawh heue. 28Yam keh nawh, an tix kaux plih taix tix lih ka praix mai bun cao pa priex keh nawh teei keei raoh tix nyaing mai phyawk ka taix nawh ah nin, “In mawh pa sang keh sivoe heue.” 29Viang mawh nan, kawn an deeh leed taix tix laig mai puxke nawh deeh tieh tix lih sivoe mai bun cao pa priex keh an ah nin, “Kheu maix lai sigrhang tix lih? Kieh see in, hoek piang maix!” Mawh kheu nan kix kok ceu kaux nawh mawh Pharet. 30Khaix an pux nawh pa phyawk keei raoh ka taix lih keh mai kix kok ceu kaux nawh mawh Zerax heue.
Currently Selected:
YAM JAH 38: WCL
Highlight
Share
Compare
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
