KALATIX 3
3
Hoek Krax Rahsee Kheu Krax Yum Rhawm
1Pui Kalatix pa daox aw khankix eue, pa hoik plak kieh sidawng grawng pa yum Yesux Khrit piang khaox lhak sivoe ngai pex, mawh mawx pa hoik kieh pex nih son ang sang nghiet ka lox pa mawh meh? 2Aux simie ti tawng ngie ceu in khaing pex, pa pon pex Khuan Cao, hoik mawh kheu twah klaung pex ka lox lai beenli lie? Phan ang mawh nan pon kheu yum rhawm ka lox bwan pa mhong pex lie? 3Pex phex daox nie ding lie? Viang pex hoik jah ti yuh ka daux Khuan Cao, yam in pex sang grum naog ka daux nex nham lie? 4Ceu pa hoik kham geu pex tom nie ceu ding dod, mawh ngie pa giex going lie? Phan mawh pa giex going tete, 5Kaw pa tawx Khuan Cao ka pex mai pa yuh mhai pa daox am ka daux pex, Nawh yuh kheu twah klaung pex ka lox lai beenli lie? Phan ang mawh nan, mawh kheu yum rhawm pex ka lox bwan pa mhong tix lie?
6Awm hoik yum rhawm Abraham ka Siyiex mai hoik sawn krax yum rhawm an mawh pa rahsee son nawh heue.#Jah 15:6; Ro 4:3
7Mawh kheu nan een ti tawng grawng kix pa koe krax yum rhawm, mawh kawn Abraham heue.#Ro 4:16 8Phuk lai sigang khri hoik grux yaox grawng Siyiex tak sang kieh pui tang ceu khankix hoek ka krax rahsee kheu krax yum rhawm, tom hoik grux sidiex lox bwan gaux rhawm ka Abraham ah nin, “Ceu pui khawmuik tak sang pon bwanson ka daux maix heue.”#Jah 12:3 9Mawh kheu nan kix pa koe krax yum rhawm khankix pon bwanson tau mai Abraham pa yum rhawm heue. 10Can pui pa dex dawd mai pa twah klaung ka lox lai beenli khankix ot ka greem pa jhax lawg, grawh grawng nawh hoik tiiem ti deuh ah nin, “Ku kaux daux pui pa ang lai hawt ti yuh ku ceu khawmuik can pa hoik tiiem ka daux phuk lai beenli, mawh pa jhax lawg kah heue.”#Pi 27:26
11Lheu khaing an grawng pui tix kaux kawx ang hoek krax rahsee sivoe Siyiex kheu lox lai beenli, hoik sidawng kah, grawh grawng nawh, “Pui pa rahsee tak sang im kheu krax yum rhawm heue.”#Ha 2:4 12Lox tawm lai beenli ang dex dawd mai krax yum rhawm, “Kaw pa hawt ti yuh lox tawm an khankix, tak sang im ka daux lox tawm an khankix heue.”#Krub 18:5
13Cao Khrit hoik taoh ex khaing pa jhax lawg lox lai beenli, kheu hoik mawh Nawh pa jhax lawg son ex, grawh grawng nawh hoik tiiem ti deuh ah nin, “Pa preue ka piang khaox ku kaux daux pui, mawh pa jhax lawg heue.”#Pi 21:23
14Son sang pon pui tang ceu khankix bwanson Abraham ka daux Cao Khrit heue. Son sang pon ex sijax mukheu grawng Khuan Cao, kheu krax yum rhawm heue.
Lox Lai Beenli Mai Lox Sijax Mukheu
15Puxaik khankix eue, aux krai hawt awm been pui. Viang mawh ngie sijax mukheu pa yuh kawn pui kawx, khaix hoik een sijax mukheu an ti mawh pa lung loi, pui tix kaux kawx ang pon ti tik sijax mukheu an mai ang baox thiien thie kah heue. 16Lox sijax mukheu khankix hoik krai ka Abraham mai ka ru nawh heue. Nawh Cao ang ah “Doeh ru khankix,” awm sang ah grawng pui hun, hoik ah, “Doeh ru maix,” #Jah 12:7 awm sang ah ngie grawng tix kaux khaing, pa mawh Cao Khrit heue. 17Aux ah nin, sijax mukheu pa hoik grux een Siyiex ti mawh pa lung loi, lox lai beenli, pa jah ti kieh mawh khaix an pon yieh tixngoe num,#Lih 12:40 ang pon tiyieh laux, son sang kieh lox sijax mukheu an mawh pa giex going heue. 18Phan sin an mawh pa dex dawd mai lox lai beenli, ang baox lai mawh pa dex dawd mai lox sijax mukheu,#Ro 4:14 Siyiex hoik tawx sin an ka Abraham, ka lox sijax mukheu heue. 19Phan mawh nan lox lai beenli mawh son pa yuh ka mawx? Hoik baox thiien thie lox lai beenli kheu phimap, tom sang hoek ru pa hoik tawx lox sijax mukheu kah heue. Hoik kieh kawncau Siyiex khankix teei ti tawx lox lai beenli ka tawm taix pui sinax heue. 20Pa ah pui sinax ang mawh ngie son tix kaux khaing, Siyiex mawh ngie tix kaux khaing heue.
Pa Bak Yiak Daux Lox Lai Beenli
21Phan mawh nan lox lai beenli mawh pa cha ka lox sijax mukheu Siyiex lie? Ang doh mawh nan. Phan hoik tawx lox lai beenli pa chix kieh im, tak lai pon pa rahsee kheu lox lai beenli tete heue. 22Viang mawh nan phuk lai sigang khri hoik laung pui khawmuik ka greem phimap, son sang tawx lox sijax mukheu an kheu krax yum rhawm kix ka Yesux Khrit heue.
23Viang mawh nan ka sivoe sang hoek krax yum rhawm, hoik laung mai pau ex ka greem lox lai beenli, sonsang khre ex son krax yum rhawm pa tak sang lih bleeh khaix heue. 24Mawh kheu nan lox lai beenli hoik mawh cao thong cao gau ex tom hoek Cao Khrit, sonsang hoek ex krax rahsee kheu krax yum rhawm heue. 25Viang mawh nan yam in kheu hoik hoek krax yum rhawm an ex ang lai baox ot greem cao gau heue. 26Grawh grawng nawh pex khawmuik mawh kawn Siyiex kheu krax yum rhawm ka Yesux Khrit heue. 27Can pex pa hoik cubcom ka daux Yesux Khrit, hoik ceep ka Cao Khrit heue. 28Ang doh lai pon koe pui Yudax phan ang mawh nan, pui Helasax, ang doh lai pon koe siliex, phan ang mawh nan pui ploi, ang doh lai pon koe simex, phan ang mawh nan bun, mawh kheu pex khawmuik mawh ngie tix kaux khaing ka daux Yesux Khrit heue. 29Phan pex mawh cie Cao Khrit, pex mawh ru Abraham mai cao pa pon sin awm pa khaw mai lox sijax mukheu heue.#Ro 4:13
Currently Selected:
KALATIX 3: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
